Read Maasai Bible – Biblia Sinyati 1 Ilmakabayo 12 Bible Online

1 Ilmakabayo 12 - Maasai Bible – Biblia Sinyati bible

1 Ilmakabayo 12

¹Ore peyie edol Yonatan ajo asidain imbaa, neirriwaa ilkiliku Roma peyie eintang'ejuk neibalie shoreisho o le Roma.

²Neirrriwaa empalai olkilikuai oyia neijia Spata o kulie wuejitin.

³Nepuo lkiliku Roma, neitoomoni ninche enkiguana oo lpayiani, nelikioo ilo kilikuai lo lapolosani kitok Yonatan o enkop oo lyahudi inchere peyie epuonu aitang'ejuk ina shoreisho o lning'o le Roma.

⁴Neisho le Roma ninche empalai enkitoria inchere ore nkuapi pooki naimaa ninche eshuko Yudea neishori eseriani.

⁵Kulo lkigerot leina palai nairriwakaki lelo le Spata:

⁶Yonatan olapolasani kitok, esiamo kitok oo larikok, lapolasak o ltung'ana pooki le Yudea enetii lalashera lang te Spata, airoroki intae.

⁷Ore te rishata natulusoiye, eirriwaka apa olaiguanani linyi Ario empalai olapolosani kitok Onia, elikioo enabaikino kulo oshon aare, anaa enaitodolu ena sashati eina palai apa.

⁸Etangamua apa Onia lkiliku te nkanyit newalu empalai inyi ina apa naibalie ilo ning'o le shoriesho o lalashe.

⁹Kake mikiyieu ilo ning'o amu kinotito ina ngolon too mbukui sinyat nikiaata,

¹⁰nikingero aaitange'juk ilo ning'o e shoreisho o ntae. Mikiyieu nikitiu anaa lemenyioloro netaa larin kumok eitu kiro.

¹¹Ore te lelo aarin pooki kitadamutua intae too siruai lang o nkulie olongi. Kintayu olasar lang o enkomono ang anaa enashiaakino too lalashera.

¹²Nikishipa sii amu etoninge olning'o linyi.

¹³Kake kinotito iyiook inyamalaritin kumok nikitaarare ilarrabali kumok, amu etadoikitio iyiook iloshon oomanita iyiook.

¹⁴Ore teina rishata mikinyieu apa nikintanyamal intae aashu kulikai shoreta lang,

¹⁵amu kiaata eretoto o Laitoriani, laa ninye otimira ilmang'ati neitajeu iyiook te ninche.

¹⁶Neaku kitegelutua Numenio enkerai e Antioko o Antipateri enkerai e Yasoni, nikirriwa ninche Roma anaa ilkiliku peyie epuo aitange'juk shoriesho o lning'o o le Roma.

¹⁷Nikitiakita sii meetu enitii te nkirorokino neisho intae ena palai te nkaraki enkitang'ejukoto olning'o loo lalashera.

¹⁸Neaku kiomonu ewalata ena palai.

¹⁹Ena esashati e ina palai apa:

²⁰“ ‘Olaiguanani Ario le Spata enetii Onia olapolosani kitok, airoroki,

²¹kinotito empalai te nkaraki iyiook ile Spata o Lyahudi inchere kira osotua naa ore lelo oshon aare naa eishoi e Abraham.

²²Ore taa amu kitayioloito ina, kitasayia intae erriwu enaikuno imbaa.

²³Naa kingeroki intae empalai kintodolu ajo kitii tenebo niking'ar imasaa ang, inkishu o pooki toki nikiaata tiniasiasa neijia, kintanapa ilkiku lang peyie eliki ntae pooki toki.’ ”

²⁴Neyiolou Yonatan ajo enyaakita lkituaak le Demetrio aadoiki ninye te enjore sapuk.

²⁵Nemeyieu apa ninye neisho erishata metijing'a enkop enye oleng, neaku nelo Yerusalem anang'are ninche to lkerenget le Hamat.

²⁶Neirriwaa Yonatan ilaikitalak ilo lng'oborr loo lmang'ati, neishoru ninche ilomon inchere kejo lmang'ati peyie edoiki lyahudi kewarie.

²⁷Ore teipa neitanap Yonatan enjore enye pee eshololo nenapa o masaa enye olarrabal amu keluami kewarie. Neitaman ilarripok ilng'oborri.

²⁸Ore pee eyiolou enjore oo lmang'ati ajo etanape Yonatan o ltung'ana lenyena te nkaraki olarrabal, neiureishoyu ninche neisik neing'uaa inkimaitie eyupuyup too lng'oborri.

²⁹Nedol Yonatan o ltung'ana lenyena inkimaitie, kake eitu eyiolou ninche enataase omekenyu.

³⁰Nesujaa Yonatan ninche kake eitu einepu amu eidipa ninche aatalang olkeju le Utero.

³¹Neibelekenya Yonatan nedoiki olosho lo Ilmarabu oji Lzabedi, nemir ninche neya imasaa enye.

³²Negil ilng'oborri nelo Dameski neimaa ilkerenketi pooki.

³³Ore teina rishata ake nerrikoo ninye Simon enjore nelo dukuya ometabaiki Askaloni o sempewueti oo taniki. Neshukokino Yopa neluam ninche

³⁴nepik embata enjore enye ine amu etoning'o apa ninye inchere kejo apa ltung'ana peyie eishooyo osempewuet le Yopa aaisho enjore e Demetrio.

³⁵Ore peyie esuko Yonatan, neipot enkiguana oo lpayiani tenebo nening'okino o ninche peyie eshet isempewueti te Yudea,

³⁶peyie elepie isunta e Yerusalem neshet isunta naado naaor osempewuet oe nkanasa. Peyie aikenoo ilo sempewuet, negolu too lmang'ati eitoki ainyang'u aashu aamir.

³⁷Neasisho ltung'ana tenebo aaitagol enkirripoto e nkanasa amu ore enchoto e suntai too loosaen netigile neitobir sii enchoto naji Kafenata.

³⁸Neshet Simon enkanasa e Adida te ong'ata e Shefela neitaman isunta neshetaki inchomito.

³⁹Netem Trifo aibelekeny olaiguanani Antioko peyie eaku ninye olaiguanani le Asia.

⁴⁰Neureishoyu ninye ajo menyoraa Yonatan ina naa kelo larrabal peyie eibooyo ina. Neaku nelo Trifo o enjore enye Betshean ejo peyie eibung Yonatan near metua.

⁴¹Kake nelotu sii ninye Yonatan o enjore enye padan oo inkalifuni artam Betshean.

⁴²Ore peyie edol Trifo esiana enjore e Yonatan, neureyu atengeliki ninche.

⁴³Neng'amu ninye Yonatan te nkanyit oleng, neitayielo ninye lelo autarok lenyena, neisho nkishoorot neitanap lelo autarok o sikarini peyie eanyit Yonatan anaa enayanyit ninye.

⁴⁴Neikilikuan Yonatan, “Kainyoo peyie intanyamala kulo sikarini nemetii olarrabal?

⁴⁵Ainyoo peyie mishuk ninche ang? Tegelu ilkuti tung'ana litonini tenebo niriamariri o nanu Tolemai. Kaisho intae ina anasa o sempewueti lenyena o enjore o lkituuak pooki. Nalo nanu, ina pee atii ene.”

⁴⁶Neiruk Yonatan ninye, esujaa utarot e Trifo neirriwa isikarini Yudea.

⁴⁷Erikito apa ltung'ana inkalifuni uni, kake neing'uaa inkalifuni are te Galilaya, ore inkalifuni nabo nepuo o ninye.

⁴⁸Kake ore peyie ejing Yonatan Tolemai, neiken ltung'ana leina anasa inchomito neibung ninche near pooki oetuo o ninye.

⁴⁹Neirriwa Trifo isikarini loo inkejek o lakedok loo mbartan Galilaya o nong'ot e Yesreel peyie ear lelo kulikai sikarini le Yonatan.

⁵⁰Nejo enjore oo Lyahudi ebaiki neibung'aki neari Yonatan tenebo lelo oiriamarie, neitagol ate peyie epuo olarrabal.

⁵¹Ore peyie enyiku enjore oo lmang'ati nedol aajo etanapate Lyahudi to larrabal pee emitu enkishui enye, neshuko ninche.

⁵²Neshuko enjore oo Lyahudi Yudea te seriani kake te nkuretisho sapuk. Neisinanuo enkop pooki ejo ninche etaaraki Yonatan o ltung'ana lenyena pooki.

⁵³Ore nkuapi pooki naamanita netem aaidakie ninche. Ejo ninche meeta Lyahudi olarikoni aashu osotua neaku erishata sidai nikidaikie ninche neishunye enkatini enye.