Read Maasai Bible – Biblia Sinyati 1 Ilmakabayo 13 Bible Online

1 Ilmakabayo 13 - Maasai Bible – Biblia Sinyati bible

1 Ilmakabayo 13

¹Neyiolou Simon ajo eiturrurro Trifo enjore sapuk neitobirita ninye enaiko peyie edoiki Yudea aidaikie.

²Nedol ajo eiruto ltung'ana neureishoyu nelo Yerusalem neipotu neiturrur iltung'ana tenebo

³netem ajo aitagol ltauja ejoki, iyiololo eneba naataasa olmarei le papa olalashera lainei o nikitaasa te nkaraki inkitanapat e Musa o enkaji e Nkai. Niyiololo sii larrabali likitaarare o inyamalaritin nikinotito.

⁴Etaaraki lalashera lainei pooki te nkaraki inkitanapat, oe nkaji e Nkai o losho lang etaa nanu ake otelekua.

⁵Kake mincho ake eji, atejo nanu aitajeu enkishui ai te nkata enyamali, majo nanu kaikash alang ilalashera lainei.

⁶Kaitalaku elap te nkaraki enkop ai, oe nkaji e Nkai, nkituaak ang o nkera ang, amu eetuo nkuapi aaku nabo pee eidaikie iyiook.

⁷Ore ake peyie ening ltung'ana lelo omon negolu iltauja lenye,

⁸newaliki to ltoilo sapuk, “Itaa iyie olarikoni lang te rishata o olalashera lang Yudas o Yonatan.

⁹Shomo dukuya to larrabal naa aikiaas iyiook pooki nijoki iyiook.”

¹⁰Neiturrur Simon enjore tenebo neisosion alo Yerusalem aidip enchetata oo sunta neitagol erripoto enye.

¹¹Neirriwaa Yonatan enkerai e Absalom meshomo Yopa o enjore sapuk. Nemiraa Yonatan ltung'ana pooki oomanya Yopa nemany ina anasa.

¹²Nedoiki Trifo o enjore sapuk Yudea eing'uaa Tolemai neya Yonatan olalashe le Simon anaa oloena.

¹³Neshet Simon olng'oborr te Adida oipirta ong'ata.

¹⁴Ore peyie ening Trifo ajo ewa Simon ine wueji erikore e Yonatan netanape ninye te nkaraki olarrabal, neirriwaki ele kilikuai:

¹⁵“Aata olalashe lino Yonatan aibung'a ninye amu ore etii apa ninye erikore neitu elak esile olbene lo laiguanani.

¹⁶Kake kalaku ninye tinilak intalantani inkalifuni uni e nkosholai o nkera enyena are meteeni, peyie ore tinikigueiki ninye meitoki akaita agolong'aki iyiook.”

¹⁷Neyiolou Simon ajo kegirae aalej ninye, kake neirriwa meyauni impisai o nkera peyie eibooyo engor too Lyahudi.

¹⁸Eturia ninye inchere kejo iltung'ana etua Yonatan amu eitu eirriwaa Simon impisai o inkera.

¹⁹Neas Simon anaa enatejo apa Trifo, kake negil Trifo enkisiligata enye eitu elaku Yonatan.

²⁰Nelotu Trifo ajo aidaikie enkop e Yudea, nemanaa te nkoitoi naimaa Adora. Kake nesujaa Simon o enjore enye pooki eneshomo.

²¹Ore teina rishata nerewaki sikarini mang'ati otii osempewuet le Yerusalem Trifo lkiliku, ejoki peyie elotu asieku neimu enkoitoi o lpurkel neirriwaki sii endaa.

²²Nenapa Trifo o lakedok loo mbartan peyie edoiki Yudea, kake ore ina kewarie netadowuo empaso oe nkirobi nairoshi nelaikino atakedo oldoinyo, nelo ninye Gilead.

²³Ore etaa kebaiki Baskama, neitanapisho metaari Yonatan metua nenukari osesen lenye.

²⁴Neibelekenya Trifo ashuko enkop enye.

²⁵Neitanapisho Simon meyauni osesen lo lalashe lenye Yonatan enkop e Modein, peyie enukari te nkanasa oloo nkakuyiaa lenye.

²⁶Ore pooki tung'ani te Israel neishir te mion, neishir ninche te rishata naado.

²⁷Ore te shumata nkurare e papai lenye eo noo lalashera lenyena neshet Simon esoit naado naliyoo tenelakua naaku enkitadamunoto. Neimulumuli too soito sidain dukuya o siadi.

²⁸Neshet iltaleta oopishana too nchot pokira te nkaraki menye o ng'otonye o lalashera lenyena oong'uan.

²⁹Ore te nkaraki iltaleta neitobir ninye ing'apeta naado, ore te shumata ing'apeta nepik imasaa naapaasha, peyie eaku enkitadamunoto nabikoo. Ore too nchot nepik emeli naguetuno, ore pooki opuo te naiposha nedol.

³⁰Ore ina nkurare natesheta te Modein neton etii otaata.

³¹Ore teina rishata ake near Trifo olaiguanani kiti Antioko le ile,

³²neya enkitoo enye e Asia, eyaua apa ninye enyamali sapuk ina kop.

³³Neitoki Simon ashet sempewueti le Yudea too ltaleta oado o sunta naagol o nchomito nepik sii lchumat le ndaa.

³⁴Neirriwaa ilkiliku enetii olaiguanani Demetrio li are peyie epalakini kodi amu eloito apa ninye dukuya Trifo aidaikie ninye.

³⁵Neirriwa Demetrio ena palai anaa ewalata:

³⁶“Olaiguanani Demetrio enetii olapolosani kitok Simon, o lchoreta loo laiguanak le nkop oo Lyahudi o larikok, enkirorokino.

³⁷Atangamua olmarisian le saabu o ilng'osil loo ltuka likirriwakita, nagira anapa te nkaraki olning'o le seriani o ntae, najoki sii lkituaak le kodi peyie epaliki intae.

³⁸Ore olning'o lang oituruko naa neijia ake etiu, ore sempewueti litesheta naa ikulinyi.

³⁹Kapaliki intae teng'ilata olning'o otaata, napaliki sii ntae elaata e kodi neitu ilakilaka ae akekodi nasotuni taata te Yerusalem.

⁴⁰Ore Lyahudi pooki arriyiak naa keigeri te siaai olaiguanani. Inchoo eaku eseriani te iyiook.”

⁴¹Neaku ore too lari le 170 neitaikini Lyahudi ina shata enye e murt oo loreren.

⁴²Neiteru ltung'ana aiger olning'o lenye te kulo omon: “Ore to lari le dukuya le Simon olapolosani kitok, olkitok le njore naa olarikoni loo Lyahudi.”

⁴³Ore teina rishata neman Simon o enjore enye Gasara. Neshet oltalet lo larrabal neyau isunta e nkanasa, nedoiki oltalet obo neibung.

⁴⁴Ore lelo tung'ana otii oltalet loo larrabal nedoiki enkanasa nesapuki olkinyoi oleng.

⁴⁵Ore lelo omanya ina anasa o inkituaak enye o nkera enye neng'er inkilani enye te mion neked ninche isunta enkanasa. Nesai Simon te nkaraki olning'o le seriani.

⁴⁶“Ing'urrie iyiook,” kitasayia iyie,. “Mintame iyiook anaa enatiu enkarruesho ang, kake terishioroto olng'ur lino!”

⁴⁷Nening'ore Simon ninche neishunye olarrabal. Nejo peyie eing'uaa ltung'ana ina anasa, neitisiny ninye nena ajijik natii apa nkitanyaanyukot, ore eidipe ina nejing ninche too sinkolioitin le nkisisa.

⁴⁸Neitayu ninye pooki toki naidim aidurukie ina anasa, neitamany ltung'ana oanyit inkitanapat e Musa. Neitagol erripoto ina anasa neshetaki kewan enkaji olaiguanani teine.

⁴⁹Ore lelo otii osempewuet le Yerusalem neiboori ninche pee mepuko aapuo ainyaang'isho aashu aamirisho. Neibung'a apa ninche olameyu sapuk neye lkumok te sumash.

⁵⁰Neomon ninche Simon eseriani. Nenyorraa ninye neitayu ninche t sempewuet neitisiny ninche.

⁵¹Ore te nkolong e tikitam oo kuni olapa li are lo lari le 171, netii apa Lyahudi osirua sapuk enkanasa amu eishunye ina kiputukuny nelotu seriani Israel. Nejing Simon o ltung'ana lenyena osempewuet eranyita sinkolioitin le nkisisa o le nashe enapita ninche ilng'osil loo ltuka, neiguran ninche too ilwululi loo usin o nkinantani.

⁵²Neimie Simon too lkigerot inchere ore ina olong keaku enosirua larin pooki. Neitagol erripoto enkaji e Nkai natii ldoinyio neigorita osempewuet, neitamany ltung'ana lenyena ine.

⁵³Ore olayioni le Simon oji Yohana netubulua aaku oltung'ani, neitaa Simon ninye olkitok le njore pooki neitamany ninye Gasara.