Read Maasai Bible – Biblia Sinyati 1 Ilmakabayo 15 Bible Online

1 Ilmakabayo 15 - Maasai Bible – Biblia Sinyati bible

1 Ilmakabayo 15

¹Neirriu te nkop natoyio oo Lgiriki Antioko enkerai o laiguanani Demetrio empalai arriwaki Simon olapolosani kitok olgafanai loo Lyahudi eo nkop pooki:

²“Olaiguanani Antioko enetii Simon olapolosani kitok, olgafanai eo nkop pooki oo Lyahudi, enkirorokino.

³Anaa eniyiololo, eibung'aki enkitoo oloo nkakuyiaa laainei ilarruok. Natumuta nanu ashuku ina kitoo o enkisisa enye pooki naata apa. Aiturrurro enjore sapuk nalaaki naitobira emelin olarrabal.

⁴Kajo peyie arasaki enkop narasaki lelo apa ooidaikie nkanas kumok neinyal enkop.

⁵Neaku ore aiteru taata aitudupa ina palakinoto elaata e kodi o kulie laat ake naishooki apa intae olaiguanani oiturukuo.

⁶Aishoo ntae entobira mpisai niasishorere te nkop inyi.

⁷Ore Yerusalem o enkaji e Nkai naa kepalakini kodi. Ore imasaa pooki nintobirutua o sempewueti pooki nitesheta nimanyimanya naa keaku kuninyi.

⁸Ore aitoki ake, isilen pooki niatata o lbene lo laiguanani aashu naapuonu te dukuya naa kejuti pooki.

⁹Ore ake pee aya enkitoria oina kitoo, kaaisho iyie o nkop ino pooki o enkaji e Nkai enkanyit neyiolouni nkitoo enkop ino too nkuapi pooki.”

¹⁰Ore to lari le 174, nerasaki Antioko enkop oloo nkakuyiaa lenye. Neibelekenya sikarini kumok aaku lenyena, neing'uekini Trifo lkuti oleng.

¹¹Nesujaa Antioko Trifo neisikaki ninye Dor enkanasa natii embata enaiposha,

¹²neiyolou ninye ajo etagolo amu eisika isikarini aing'uaa ninye.

¹³Neman Antioko enkanasa e Dor too sikarini ogeluno inkalifuni iip nabo o tikitam tenebo ngarrin oo mbartan inkalifuni isiet.

¹⁴Ore te naiposha netii apa melin naamanita ina anasa neitagol ninye oleng neaku metii oltung'ani ojing aashu oipang teina anasa.

¹⁵Ore ake teina rishata nebaya Numeni o lcholiek enye Yerusalem eingu'aa Roma oe mpalai naigerokoki laiguanak loo nkuapi:

¹⁶“Eing'uaa enetii Lukio olbalosi le Roma enetii olaiguanani le Tolemai, enkirorokino.

¹⁷Lkiliku oing'uaa enetii lchoreta naa osotua lang Lyahudi eyieu neitang'ejuk olning'o le shoreisho osotua. Neirriwua olapolosani kitok Simon o ltung'ana loo Lyahudi,

¹⁸neyautua anaa nkishoorot elongo e saabu naata enkiroshi eshekeli iip imiet.

¹⁹Neaku king'erokito ilaiguanak kumok loo nkuapi aajoki ninche peyie meinyal ake Lyahudi o nkanas enye aashu enkop enye. Mearare ake ninche aashu eretu lelo oorasaki Lyahudi.

²⁰Kitonyorraitie elongo enye e saabu, nikinyorra pee kirrip ninche.”

²¹“Neaku teneisik olaruoni te Yudea nelotu aisudori te nkop inyi, enchooi ninye aaisho Simon olapolosani kitok peyie eitame ninche anaa enajo nkitanapat oo Lyahudi.”

²²Eigeroko Lukio olaiguanani Demetrio empalai naiya neijia o Atalo o Ariarate o Asake,

²³o nkuapi e Sampame o Spata o Delo o Mindo o Sikioni o Karia o Samo o Pamfulia o Likia o Halikanaso o Rode o Faseli o Kosi o Side o Arado o Gotina o Nido o Kupro o Kirene.

²⁴Neirriwari sii esashati eina palai enetii olapolosani kitok Simon.

²⁵Neitoki ake aman olaiguanani Antioko enkata e are Dor, neigil ake arasaki, neshet ltaleta te nkaraki olarrabal neibooyo Trifo o ltung'ana lenyena amitiki ajingu atua aashu aipang.

²⁶Neirriwaa Simon isikarini inkalifuni aare peyie eretu Antioko o enkosolai oe saabu o kulie imasaa.

²⁷Kake neany Antioko eng'amu, negil olning'o le dukuya o Simon neaku ninye olmang'atinta le Simon.

²⁸Neirriwaa Antioko olkitok lenye osilig oji Atenobio peyie eirorie Simon. Nejoki Simon, “Imbung'a iyie Yopa o Gasaro o sempewuet le Yerusalem naa nkanas nena enkitoo ai.

²⁹Inyiala nena kuapi, eyakita ninche inyamalaritin kumok nimbung'a sii wuejitin kumok te nkitoo ai.”

³⁰“Neaku enchoru nena anas nimbung'a o impisai pooki e kodi ninotito o nena wuejitin nimbung'a naatii aulo lpolosien le Yudea,

³¹aashu kinchosho nanu intalantani inkalifuni tomon o naapishana e nkosholai o ne nkidaaroto niyautua o kodi oo nkanas, inkalifuni tomon o naapishana e nkosholai. Naa teneme ina kalotu aidaikie ntae.”

³²Nelotu Atenobio olchore lo laiguanani Yerusalem, ore peyie edol ina kishiaa e Simon o saanini e saabu oe nkosholai, te enkaji olaiguanini o karsisisho sapuk neing'asia, neisho Simon ilo kilikuai lo laiguanani,

³³newaliki Simon, “Eitu aikata kiya iyiook enkop oo lomon aashu ninye kimbung imasaa oo ltung'ana. Ore enikitaasa kitushukutuo ake imasaa nikitujung'o too loo nkakuyiaa lang, enkop apa natoorutuo iyiook lmang'ati.

³⁴Neaku kigira aashuku enkop ang eewuo erishata sidai nikiaasie ina.

³⁵Ore Yopa o Gasara nijoito iyieu, eki cho iyie inkalifuni uni iip ong'uan e nkosholai hoo netaasa iltung'ana le nena anas intorrok te nkop ang.” Eitu ewaliki Atenobio ninye,

³⁶kake neshuko enetii olaiguanani etagore. Ore peyie eliki olaiguanani enetejo Simon neliki sii enkishiaa e nkaji e Simon o nena pooki naatoduaa ninye, negoro olaguanani oleng.

³⁷Ore teina rishata nelo Trifo neked emeli neisikaki enkanasa e Otosia.

³⁸Negelu olaiguanani Antioko Kendebeo metaa olkitok le nkop namanita enaiposha neisho ninye isikarini loo nkejek o lakedok loo mbartan,

³⁹neitanap ninye peyie erare Yudea. Neitoki ashet enkanasa te Kedoni neitagol inchomito enye peyie eidimu ataarare ltung'ana loo Lyahudi. Ore ninye olaiguanani nelo dukuya asujaa Trifo.

⁴⁰Nebaya Kendebeo Yamnia neiteru aitanyamal Lyahudi erasaki Yudea, neibung near ninche.

⁴¹Neitoki ashet Kedoni nepik esiana oo lakedok loo mbartan oo sikarini loo nkejek peyie erasaki nerrip inkoitoi e Yudea anaa enaitanapa olaiguanani.