Read Maasai Bible – Biblia Sinyati 1 Ilmakabayo 2 Bible Online

1 Ilmakabayo 2 - Maasai Bible – Biblia Sinyati bible

1 Ilmakabayo 2

¹Ore teina rishata, netii olapolosani lo lmarei le Yehoiarib oji Matatias, olayioni le Yohana, ole nkakuyiaa le Simeon, neidur te Yerusalem nelo amany Modein.

²Neeta Matatias inkera imiet naa lewa pooki; Yohana oji Gadi,

³Simon oji Tasi,

⁴Yudas oji Makabayo,

⁵Eliesa oji Afarani, o Yonatan oji Afusi.

⁶Ore pee edol Matatias Ing'ok naasitae te Yudea o Yerusalem,

⁷Nejo: “Kainyoo pee aatoiwuoki nanu pee adol kuna baa torrok, enkidaata o iltung'ana laainei o enkanasa sinyati? Kainyoo pee aton ake nanu tene aigor, eishori enkanasa ilmang'ati, neing'uekini enkaji e Nkai iltung'ana omon?

⁸Etotiwuo enkaji e Nkai anaa oltung'ani lemeeta euriata.

⁹Ore enkikodo enye sidai oleng netupurroyioki. Netaaraki nkera ang too nkoitoi naa ore ilbarnot neari too lalema loo lmang'ati.

¹⁰Ore inkuapi pooki e nkop netamanya ina anasa, nepurroo imasaa enye pooki.

¹¹Ore imasaa enyena pooki newaki; etaa ninye errindik, meekure elakuno ninye.

¹²Ing'ura enkaji e Nkai, meekure eeta esidano o enkisisa, eisarkionie iloreren.

¹³Ainyoo pee kintoki aaishu?”

¹⁴Nepolos Matatias o inkera enyena inkilani enye, neishop ilkuniyiani neishir ninche oleng.

¹⁵Ore ilkituaak lo laiguanani lelo ogiraa apa aisimaki iltung'ana pee meyanyit Enkai, nepuonu enkanasa e Modein aasimaki iltung'ana meitayu ilasarri loo lemeyiolo Enkai.

¹⁶Nepuonu Isiraeli kumok aatumore ninche etii Matatias o layiok lenyena.

¹⁷Nejoki Matatias lelo kituaak lo laiguanani, “Ira iyie olarikoni oyanyiti oleng tena anasa, niata enkaina o layiok o sotuaitin linono.

¹⁸Ainyoo pee mme iyie ole dukuya eas enatejo olaiguanani? Ore iloreren pooki, iltung'ana le Yudea o iltung'ana ootung'uayoki te Yerusalem netaasa nejia. Tenias ina, ore iyie o layiok linono naa keyanyiti ntae neji intae ‘Ilchoreta lo laiguanani,’ neishori intae olerrinyore le nkosholai o saabu o nkishoorot kumok.”

¹⁹Newaliki Matatias to ltoilo sapuk ajo, “Mashilaa nanu tenaa keyanyit pooki oreren ootii ena kitoria olaiguanani netonyorraitie aing'uaa nkitanapat o lkerreti lenye,

²⁰maing'uaa nanu o inkera aainei o sotuaitin laainei, aikiimbung iyiook osotua le Nkai o loo papa.

²¹Ore te retoto e Nkai nimiking'uaa iyiook nkitanapat enyena aashu kiany kiyanyit.

²²Mikiyanyit iyiook ikitanapat o laiguanani nimikibeleny enkoitoi e seremare ang.”

²³Ore pee eidip airoro, nenyorraa obo le lelo oing'uaa Modein inkitanapat o laiguanani, nelotu dukuya pooki ng'ae pee eitayu olasar loo lelo lemeyiolo Enkai to lperere otii ine,

²⁴ore pee edol Matatias negoro oleng, neikirikira te ngoro, near ilo tung'ani teilo perere.

²⁵Near lelo kituaak lo laiguanani oogira aaisimaki iltung'ana meitayu olasar, negil olperere.

²⁶Ore teina nataasa Matatias eitodolua enyorrata enye o nkitanapat, anaa Finehasi enataasa pee ear Zamri enkerai e Salu.

²⁷Neim Matatias enkanasa ebuakita, “Ore pooki tung'ani asipani te Nkai o to sotua neanyit nkitanapat, tusujuaki!”

²⁸Neisikaki Matatias o nkera enyena ildoinyo, neing'uaa imasaa enye.

²⁹Ore Isiraeli kumok teina rishata, lelo oing'oru sipat te Nkai te nkoitoi enkiyanyitata oo nkitanapat, nepuo amany ong'ata,

³⁰o inkera enye o kituaak o inkishu te nkaraki ina kitorogonyata naitorogonyitae.

³¹Nelikini ilkituaak lo laiguanani o enjore e Yerusalem inchere ore lelo ootanyita eibung nkitanapat o laiguanani neshomo aisudori ti ong'ata.

³²Nesujaa ilkumok neinepu ninche nerretena te nkaraki olarrabal te enkolong e sabato.

³³Nejoki ninche, “Enchoo ebaiki ine! Entupuku entaas anaa enajo nkitanapat o laiguanani naa ibikoo.”

³⁴Kake nejo ninche, “Mikipuku nimikiaas anaa enajo nkitanapat o laiguanani neaku isarkionie enkolong e sabato.”

³⁵Neiteru ilmang'ati aar,

³⁶kake eitu eishankarra ninche Lyahudi, eitu ninche enang'aki isooito aashu emitiki elusie e nkapune nagira aaisudoriyie.

³⁷Nejo ninche, “Inchoo matuata te nkitashoto e sipata. Inchoo keper o nkop eaku shakeni inchere iaritata iyiook nemetii esipata.”

³⁸Neidaikie olmang'atinta ninche te enkolong e sabato, near iltung'ana kituaak o inkera o inkishu enye. Neye iltung'ana enkalifu.

³⁹Ore pee ening Matatias o lchoreta lenyena nena, neisinanuo oleng

⁴⁰nejokino, “Tinikiaas pooki anaa enataasa Lyahudi, aany kiarare iloreren mikimitu enkishui ang o lkuaak lang, kemuti iyiook te nkomom e nkop too nkolong'i naataana.”

⁴¹Ore ina olong nemut ajo ore pooki ng'ae oarare enkolong e sabato, naa kemitu ate, pee meeye anaa Lyahudi lenye otuaata te nkapune.

⁴²Neshulare iltung'ana lo lkioma loo Lyahudi, lelo oopi negoli too iltung'ana pooki le Israel, oitautuo aate pee emitu nkitanapat.

⁴³Ore lelo pooki oisikita te nkaraki enkisilisili neshulare neitagol ninche.

⁴⁴Ore naa amu keeta enjore, near ilaing'okok metuata te ngoro enye neiteru aarare lelo Yahudi ootanya eibung inkitanapat, ore lelo oaisika nepuo ashulare iloreren.

⁴⁵Nelo Matatias o lchoreta lenyena negil ilpereren le lelo lemeyiolo Enkai

⁴⁶neikonyaa aamurat ilkayiok pooki lememurata ooinepuaki too lpolosien le Israel.

⁴⁷Neibung lelo kituuak loo iloreren oomenisho.

⁴⁸Nesaru nkitanapat e Musa too nkaik oo loreren o laigunak lenye, negil engolon eilo aiguanani torrono Antioko.

⁴⁹Ore pee eaku keye Matatias, nejoki nkera enyena, Erishata ena o larrabal o nyamali, keitore iyiook iltung'ana oomenisho neitaa iyiook entoki nasukenyi.

⁵⁰Kake ore intae nkera aainei, entayu ate te nkaraki nkitanapat nimitutu te keeya osotua le Enkai oloo papa linyi.

⁵¹Entadamu inataasa loo kakuyiaa linyi too inkolong'i enye. Entusuj nena utarot, naa itumutumu errepet niakuku yiolot oleng.

⁵²Entadamu enkisiligata apa naata Abraham te Enkai pee etemi, neitiship Enkai nedamu ninye.

⁵³Ore apa Yosef te nkata e nyamali, neyanyita nkitanapat e Nkai neaku ninye olarikoni le nkop pooki e Misiri.

⁵⁴Ore kakuyiaa lang Finehas te nkaraki enyorrata enye sapuk, neishooki ninye enkisiligata nchere keaku eishoi enye enoo lapolosak.

⁵⁵Eitaaki Yoshua olarishani le Israel amu eibung'a ninye nkitanapat e Musa.

⁵⁶Eyauwua Kaleb olkilikuai sidai ayaki olorere, neishori enkop anaa enashe.

⁵⁷Eitaaki Daudi olaiguanani, neishori osiligi nchere ore eishoi enye pooki naa keaku enoo laiguanak, te nkaraki enyorrata enye nauno te Nkai.

⁵⁸Ore Eliya te nkaraki enkitayunoto enye too nkitanapat, neyai ninye keper.

⁵⁹Eitajewuo Enkai Hanania, Asaria o Mishaeli to balbal le nkima te nkaraki enkirukoto enye.

⁶⁰Ore Danieli naa oltung'ani apa oata enkanyit sapuk, neitajeu Olaitoriani te nkutuk oo lng'atunyo.

⁶¹Enchoo eaku kulo loo papa pooki enkitanyaanyukoto naa iyiolou ajo ore pooki ng'ae osiling Olaitoriani nemelau ninye engolon.

⁶²Emincho eiture ntae nena eilo tung'ani torrono. Entadamu ajo keye, neiting enkishiaa enye pooki too lkuru oonya osesen lenye ong'uoyu.

⁶³Ore taata naa keanyiti oleng kake ore taaisere neimin neshuko osesen lenye nkulupuok neishunye dupoto enye,

⁶⁴kake ore intae nkera aainei, entagoluoyu niminchosho iltauja linyi epalari igirara aamitu nkitanapat amu ore enkisisa inyi sapuk naa ina kitanapata eimu.

⁶⁵“Aing'en olalashe linyi Simon, entoning ninye anaa nanu igirara aaning.

⁶⁶Kegol apake ninye Yudas le Makabayo te inkishui enye pooki keaku ninye olarikoni linyi kerikoo intae to larrabal loo lmang'ati.

⁶⁷Empoto iltung'ana pooki ooyanyit nkitanapat Enkai pee eretu intae nintalakuku elap too intorrok pooki naitaasa iltung'ana linyi.

⁶⁸Entalaaki iloreren too nena naataasa niyanyititi nkitanapat.”

⁶⁹Nemayian ninche Matatias neye.

⁷⁰Nenukari te nkurare o lmarei te Modein, neishiraki ninye iltung'ana le Israel. Etaase ena to lari le 146 eitu eini Kristo (E.E.K).