Read Maasai Bible – Biblia Sinyati 1 Ilmakabayo 5 Bible Online

1 Ilmakabayo 5 - Maasai Bible – Biblia Sinyati bible

1 Ilmakabayo 5

¹Ore peyie ening elatia oo iloshon ajo etesheta Ilyahudi olperere lo lasar neitobir enkaji e Nkai anaa enaikununo apa, negoro ninche oleng,

²nemut nabo ajo keidaikie Ilyahudi pooki oomanya tenebo ninche. Neiteru ninche aar iltung'ana lang.

³Ore te Akrabatene e Idumea near Yudas eishoi e Esau, amu etelejishote te Israel. Near Yudas ninche aidakie neya imasaa enye.

⁴Nedamu ninye enkarruoisho oo nkera e Baeani, lelo apa ooisomitita iltung'ana le Israel, oorresh aaibung iltung'ana loo Siraeli too nkoitoi sapuki.

⁵Neikenoo Yudas lelo le Baeani too iltaleta lenye, nemut ajo keidaikie ninche nepejoo iltaleta lenye te nkima o lelo pooki ooboitare.

⁶Nelang alo aidaikie lelo le Amoni, neinepu enjore sapuk naata egolon o iltung'ana kumok orikito Timoteo.

⁷Nearare Yudas ninche too larrabali kumok, nemir ninche.

⁸Neibung sii Yaseri o inkang'itie enye aya, neshuko Yudea.

⁹Neiturruro iloreren te Gilead te nkaraki Isiraeli pooki oomanya enkop enye. Kake neisik Isiraeli aapuo ilo sempewuet le Datema,

¹⁰neirriwaki ninche Yudas o lalashera lenyena empalai najo, “Eibung'ate iloreren te nkitoria e Timoteo. Kisika iyiook peyie kimitu ate,

¹¹negira ninche anapa peyie edaikie iyiook.

¹²Etara ninche embata oo iltung'ana lang. Wou intajeu iyiook!

¹³Etaaraki iltung'ana pooki loo Lyahudi leina luboto enkop e Tob, ewaki inkituaak enye o enkera anaa irrindiki, neyai sii imasaa enye. Eidakieki enjore o ltung'ana obaya iip nabo teine.”

¹⁴Eisumitai ena palai, ina kata peyie ebau ilkiliku oteng'era inkilani enye te mion neyau ninche olkilikuai le Galilaya.

¹⁵Nejo ninche, “Eibung'ate enjore naing'uaa Tolemai, Tirsa, Sidon o lkerenket pooki le Galilaya peyie eidakie iyiook.”

¹⁶Ore peyie ening Yudas o ltung'ana nena baa, neipotu entumo sapuk, peyie eiguana aajoo kainyoo eas pee eretu lelo iltung'ana le nkop enye, oata enyamali olmangatinta.

¹⁷Nejoki Yudas olalashe Simon, “Tegelu iltung'ana linono, shomo intajeu Lyahudi lang te Galilaya, ore nanu o lalashe lang Yonatan nikupuo Gilead.”

¹⁸Neing'uaa Yudas enchoto e njore enye pee emitu Yudea neitaa Asaria o Yosefu enkera e Sekaria metaa larikok lenye.

¹⁹Nejoki ninche, “Atung'uayie intae entoria ene, kake mipuopuo ake arare iloreren omatushukunye.”

²⁰Neiriamariyie iltung'ana inkalifuni uni Simon apuo Galilaya, neleku iltung'ana inkalifuni esiet o Yudas peyie epuo Gilead.

²¹Nelo Simon Galilaya neara o loreren ilarrabali kumok. Kake nemir ninche

²²nesujaa ninche ometabaiki enkanasa e Tolemai, near iltung'ana obaya inkalifuni uni, neya imasaa enye.

²³Neya Ilyahudi ootii apa Galilaya o Arbata, inkera enye o nkituaak enye o imasaa enye, neyau ninche Yudea te nchipai sapuk.

²⁴Ore teina rishata, netalang'a ninye Yudas le Makabayo o lalashe lenye Yonatan olkeju le Yordan, nepuo too inkolong'i uni ti ong'ata.

²⁵Neinepu iltung'ana le Batea supati oleng, neliki ninche nena pooki naatasate too Lyahudi te Gilead.

²⁶Neliki ninche ajo kumok Ilyahudi ooena too nkanas nasheta too sunta e Bosra, Bosori, Alema, Shasfo, Makedi o Karnaimu,

²⁷neena ilkulikai too nena anasa kutiti e Gilead. Nelimu ajo etanapate ilmang'ati peyie edaikie ilo sempewuet loo Lyahudi teina olong nasuju, te nkolong nabo.

²⁸Neluam Yudas o enjore enye neidakie Bosra te nkoitoi e ong'ata, neibung ninche ina anasa, near iltung'ana pooki otii, nepur ina anasa imasaa pooki nepejoo.

²⁹Nepuku teine apuo enkewarie pooki apuo osempewuet le Datema.

³⁰Ore te nkakenya nedol Yudas o ltung'ana lenyena enjore sapuk edoiki osempewuet, egira ninche aanap inkedeta o imasaa o larrabal ejo maibung'a ilo sempewuet.

³¹Ore peyie ening Yudas ororei o lbuaa o ltoilo le ntarumpeta eing'uaa enkanasa, neyiolou ajo eiterua olarrabal,

³²nejoki iltung'ana lenyena, “Entaarata taata tele arrabal te nkaraki Ilyahudi lang!”

³³Nepuo enjore e Yudas too ilkererin okuni, nedoiki ilmang'ati te siadi. Ore epuoito dukuya nekut intarumpetani neomon sii Enkai to ltoilo sapuk.

³⁴Ore peyie edol enjore e Timoteo ajo Yudas le Makabayo, neshuku ina jore siadi neisik. Neidakie ninye Yudas ninche, near iltung'ana inkalifuni isiet ina olong.

³⁵Neibelekenyakino Yudas enkanasa e Alema, neibung ina anasa, near iltung'ana pooki otii. Nepur ina anasa nepejoo.

³⁶Ore peyie epuku teine, nelo aibung enkanasa e Shasfo, Makedi, Bosori o kulie anas e Gilead.

³⁷Ore peyie eidip ina neiturrur Timoteo ai jore nepik ilng'oborri lenye teidi alo Rafoni, aishoto olkeju.

³⁸Neirriwaa Yudas iltung'ana peyie epuo aajur ilng'oborri, nepuonu ninche aalimu nchere ore iloreren pooki teilo kerreti netaa nabo o Timoteo netaa ninche enjore sapuk oleng.

³⁹Eigero apa ninye Timoteo ilmaisero loo Larabu peyie eretu ninye, netipika ninche ilng'oborri idia alo o lkeju peyie erasaki Yudas. Nelo Yudas anang'are te nkaraki olarrabal.

⁴⁰Ore etaa kebaiki Yudas o enjore enye enkare, nejoki Timoteo lkituuak lenyena, “Ore te nepunyu alotu ometalang'u olkeju, nimikintoki aaidimu aatarare ninche naa kemir iyiook.

⁴¹Kake teneureshoyu ninye neitashe teidia alo olkeju, naa ekilang iyiook nikiarare ninye naa ekimir ninye.”

⁴²Ore peyie ebaiki Yudas embata olkeju, neitanap ilkituaak lenyena peyie meitashe ake, kake pee epuo dukuya pooki ng'ae to larrabal.

⁴³Neaku Yudas ole dukuya elang olkeju, nesujaa iltung'ana lenyena, neari ilmang'ati, neidapasha ninche neituraa imasa enye neisikaki lelo lemeyiolo Enkai te Karnaim.

⁴⁴Kake ore ninye Yudas o iltung'ana lenyena neya ina anasa, nepejoo enkaji e Nkai o lelo pooki otii atua. Nesulaa Karnaim, neaku meitoki iloreren agolong'aki Yudas.

⁴⁵Neiturrur Yudas Ilyahudi pooki te Gilead, peyie eshuko ninche Yudea o ninye. Naa olamayio apa sapuk ninche tenebo inkera enye o nkituuak enye o imasaa enye pooki.

⁴⁶Nepuo ometabaiki Efroni, enkanasa sapuk apa naasheta sunta. Meidimayu peyie eman too nchot pokira, neim ninche nkoitoi natii polos enkanasa.

⁴⁷Kake nemit iltung'ana ootii apa ina anasa eim ninche, neiken inchomito too soito.

⁴⁸Neirriwaki Yudas ninche olkilikui le mboron, “Enchoo iyiook maima enkop inyi, kishuko enkop ang. Meetae obo olang oiteleki intae enkaina, ekiim ake iyiook apuo.” Kake neany ninche ebol inchomito e nkanasa.

⁴⁹Nejoki Yudas lelo pooki oiriamariyie o enjore enye peyie eitashe.

⁵⁰Nejoki enjore enye peyie enapa te nkaraki olarrabal o ina anasa e Efroni, neara ninche dama o kewarie ometimira ina anasa.

⁵¹Near Yudas iltung'ana pooki le Efroni, neidakie ina anasa. Neim ninye o enjore enye ina anasa eitunyoo iseseni loo iltung'ana.

⁵²Nelang ninche Yordan nebaya ong'ata teidia alo Betshean.

⁵³Ore epuoito te nkoitoi neiturrur ninye Yudas lelo tung'ana ootashala neleku te siadi neitagol ninche oishuaa ometabai enkop e Yudea.

⁵⁴Ore te nchipai o nashe sapuk, neilepaki ninche oldoinyo le Sion aaitayu olasar opejori amu etushukunye ninche te seriani, neitu eimin obo lenye.

⁵⁵Ore apa etii ninye Yudas o Yonatan Gilead, negira ninye olalashe lenye Simon arare Tolemai te Galilaya,

⁵⁶ore ninye Yosefu o Asaria, lelo kituaak le njore e Yudea, netoning'o nena baa o eimirishoi.

⁵⁷Nejokino ninche, “Emaape olarrabal o loreren oomanita iyiook, peyie kitum sii iyiook enkisisa.”

⁵⁸Nedoiki ninche o iltung'ana lenye lelo le Yamnia.

⁵⁹Neipang Gorgia o ltung'ana lenyena teina anasa aatumore ninche to larrabal.

⁶⁰Nemir ninche Yosefu o Asaria to larraabal nesujaa ninche ometabaiki ilpolosien le Yudea. Etaaraki llyahudi lemeitong'or inkalifuni are ina olong.

⁶¹Ore ina mirishoi sapuk naa te nkaraki keyieu apa lelo kituaak loo Lyahudi neaku ilaiguanak magil, netanyaita sii eyanyit Yudas o lalashera lenyena.

⁶²Nemeina ake, mme apa loo lmarei le Makabayo ninche, lelo ootegelua Enkai peyie eyaki iltung'ana le Israel elakunoto.

⁶³Kake ore ninye Yudas o lalashera lenyena nenoto enkanyit sapuk too Siraeli o loreren. Ore peyie ening iltung'ana olning'o lenye,

⁶⁴neiturruro ltimito sapuki aaisis ninche.

⁶⁵Nelo Yudas o lalashera lenyena olarrabal o nkera e Esau te kopikop. Nedoiki Hebroni o nena anas naamanita, neidakie nena sunta naasheta, nepejoo iltaleta oomanita.

⁶⁶Nelo enkop oo Filistia neimaa Marisa[1].

⁶⁷Ore ina olong netaaraki esiana oo lapolosak amu keyieu apa ninche neaku ilaiguanak magil, ore te modai nepuo olarrabal.

⁶⁸Neibelekenyakino Yudas Ashdodi te Filisti, negil olperere lo lasar, nepejoo inkitanyaanyukot oo nkaitin enye, neidakie enkanasa enye, neshuko alo Yudea.