Read Maasai Bible – Biblia Sinyati 1 Ilmakabayo 6 Bible Online

1 Ilmakabayo 6 - Maasai Bible – Biblia Sinyati bible

1 Ilmakabayo 6

¹Ore eimita olaiguanani Antioko li ong'uan Mesopotamia, nening ilomon le nkanasa te Pasia naji Elimaisi, naning'o oleng te karsisisho enye e nkosholai o saabu.

²Aikarsis apa ina aji e Nkai neeta ilong'oi e saabu o elong'o o larrabal o masaa naatung'uaitie apa Aleksanda le Filipo le Makedonia laa ninye apa ole dukuya pee eitore Ilgiriki.

³Nelotu Antioko atem aibung ina anasa o masaa kake eitu etumoki, amu etasiokoki aajur ninye lelo leina anasa,

⁴neitayu enjore enye aairish ninye. Ore to sina sapuk neshuko Babilon.

⁵Nebaiki olkilikui oing'uaa Pasia nelimu ajo ore ina jore apa nairriwayie ninye Yudea netimiraki ninche.

⁶Neisik Lisia o ina jore enye nagol ailany Ilyahudi, netagolo ninche amu etoponikiaki imasaa o larrabal o nena masaa naawaita apa ninche ina kata peyie emir ina jore.

⁷Etuuroitie Ilyahudi ilo perere le nkai o lminong otesheta apa Antioko te shumata olperere te Yerusalem, neitamana apa ninche enkaji e Nkai isunta naado anaa enatiu apa te dukuya, newaita sii neshet aaitang'ejuk enkanasa e Betsur ina anasa nabo o laiguanani.

⁸Ore pee ening olaiguanani kulo omon, neibung oloputukunyi, nelo endapash enye nemuoyu amu eitu eitobirari mbaa anaa enaisiligita apa.

⁹Neirrag teina dapash inkolong'i kumok amu eshomo dukuya emion enye ometoduaa ajo etaa keye.

¹⁰Neipot ilchoreta lenyena nejoki ninche, “Meekure nanu atum injoo, naatigile oltau to sina o te nkuretisho.

¹¹Naikilikuan kewan ajo kainyoo pee anoto nanu enyamali naba nji naa ore te nkitoria ai nataa supat natonyorra ilkumok.

¹²Kake nadamu intorrok nataasa te Yerusalem ina kata pee aikonyaa te nkaji e nkomono nena masaa oo mpisai o ne saabu, naidaikie lelo oomanya Yudea.

¹³“Kayiolo ajo te nkaraki ina peyie egira kuna baa torrok aasa, netaa peyie aye, aiminie nanu osiligi te nkop narayie omoni.”

¹⁴Neipot ninye Filipo, obo le lelo autarok lenyenea ooisilig ninye, negelu ninye meitoria ina kitoria enye pooki.

¹⁵Neisho ninye olmarisian le nkitoo, olkila o lgisoi lo laiguanani, neitanap ninye peyie eisum enkerai enye Antioko le miet neitubulu ninye peyie eaku olaiguanani.

¹⁶Neye olaiguanani Antioko to lari le 149.

¹⁷Ore peyie ening Lisia ajo etua olaiguanani, neitaa ninye Antioko oti olaiguanani peyie eya ine wueji e papaai lenye. Eitubulua apa ninye Antioko te keraisho enye, neaku eeishoo ninye enkarna ajo Upatori.

¹⁸Ore teina rishata, neibooyo lelo mang'ati ootii emanyata oo sikarini te Yerusalem iltunga'ana le Israel teine wueji namanita enkaji e Nkai, neyau enyamali erishata pooki, neret sii kulikae iloreren.

¹⁹Nemut Yudas aidakie ninche, neipot iltung'ana pooki peyie eman aamuat emanyata oo sikarini.

²⁰Neiturruro ltung'ana aamuat emanyata oo sikarini to lari le 150. Neshet ninche iltaleta o kulie masaa olarrabal.

²¹Kake ore embata oo lelo tung'ana oibung'aki neisik tenebo Lyahudi lemeshilaa nkitanapat, nepuo enetii olaiguanani nejoki,

²²“Kebaa erishata neton iya eitu intalaku elap too nena naitaasaki iltung'ana le nkop ang?

²³Kitonyorraitie iyiook aaisiaai papaai lino, nikimbung enejo, nikianyit sii nkitanapat enyena.

²⁴Kake kaa sidano eyaka iyiook ina? Taata etaa iltung'ana le nkop ang ilmang'ati lang. Etaara ninche enkumoi oo lelo lang ooineputua lang, nepur sii imasa ang.

²⁵Kake mme iyiook ake eitanyamala, etadoikitio elatia enye pooki.

²⁶Netamana taata ina manyata oo sikarini te Yerusalem ejo pee eya. Netesheta isunta te nkaji e Nkai o te Bet-Suri.

²⁷Esosiono embooi amu keas ninche kulie baa kumok, nimikintoki aaidim aaitasheyie.”

²⁸Ore peyie ening olaiguanani lelo omon negoro oleng. Neiturrur ilkituaak pooki le njore, o lelo loo ngarrin oo mbartan o lelo autarok lenyena osilig ninye.

²⁹Neiger isikarini oolaki le kulie kuapi o looing'uaa olemankale loo Lgiriki.

³⁰Ore enjore enye nera inkalifuni iip nabo oo isikarini loo nkejek o inkalifuni tikitam iloo ngarrin oo mbartan o iltomia tomon uni o aare oitamooki olarrabal.

³¹Neimaa olaiguanani o enjore enye Idumea, neman Bet-Suri, ine apa nataarare te rishata naado. Neshet ninche o iltaleta kulie masaa o larrabal, kake ore lelo Yahudi neipang te nkanasa nepejoo lelo taleta.

³²Neitayu Yudas enjore enye teina manyata oo sikarini te Yerusalem, neshet olng'obor te Bet-sekaria, peyie ebiooyo ina jore o laiguanani nagira anyiku.

³³Ore te nkakenya eina ai olong, neitasiooyo olaiguanani enjore enye aya enkoitoi nalo Bet-sekaria, ore teine nerretena enjore enye te nkaraki olarrabal nekut intarumpetani.

³⁴Neitook iltomia enkare oo sabibu o enkare o lng'aboli peyie eitipij te nkaraki olarrabal.

³⁵Neidapashakini nena ng'uesi sapuki lelo timito loo inkejek. Ore lelo tung'ana enkalifu nabo neishooki oltome obo neeta nkilani o nkopiyiani o suyai too lukuny enye. Ore engues pooki neriamariyie enjore oo ngarrin oo mbartan iip imiet,

³⁶neiriamariyie ilo tome pooki wueji nelo neitu eing'uaa.

³⁷Nesheti oltalet ogol oguetuno te nkoriong e pooki tome, nereu sikarini okuni pooki ng'ues, tenebo o larewani lo ltome.

³⁸Nepik Lisia nena garrin oo mbartan naatelekutua, pee elonyie isikarini loo nkejek ena kata egira ninche aarare ilmang'ati.

³⁹Ore pee eilang enkolong nena long'oi e saabu o no suyai, neshuku oldoinyo ina wang'an netiu anaa oltaa oilang'isho oleng.

⁴⁰Ore erubata enjore o laiguanani neidapashakino ildonyo oado ore ae rubata nedoiki ong'ata, kake nepuo ninche dukuya te nkarriyiano.

⁴¹Neirut pooki ootoning'o ilo toilo oitayu imasaa o larrabal o inkejek eina jore magilani negol eloito.

⁴²Nenyiku ninye Yudas o enjore enye te nkaraki olarrabal, near teine ake enjore o laiguanani nabaya iip ile.

⁴³Ore peyie eyiolou Eleasari Afarani ajo eisapuk oltome obo alang ilkulikai, neimulumulaki te long'o e nkitoria, nejo ninye olaiguanani otii, nejo ninye nine ke olaiguanani otakedo ilo tome.

⁴⁴Neitayu Eleazari enkishui enye anaa olasar peyie eitajeu iltung'ana lenyena, neaku yioloti.

⁴⁵Nekuetiki ninye ilo tome, otii apa polos oo lelo loo inkejek. Nelo dukuya earita iltung'ana otii kedianye o tatene, omeisika sikarini lo laiguanani te pooki shoto.

⁴⁶Nelutoo oltome nerem metua, neurokino near ninye metua.

⁴⁷Kake ore peyie eyiolou Ilyahudi engolon eina jore olaiguanani o mpijan enye, neshuko siadi.

⁴⁸Nelo olaiguanani dukuya o enjore enye, near Ilyahudi te Yerusalem, neman Yudea pooki o Yerusalem.

⁴⁹Neitayu osotua o lelo Yahudi le Bet-Suri neidur ninche teina anasa. Amu metii apa endaa nabaiki ninche teina anasa amu olari le sabato, nemetii nkurman naauno.

⁵⁰Nemany olaiguanani Bet-Suri, nepik enjore narrip.

⁵¹Neman ninye enkaji e Nkai te rishata naado. Neshet oltalet ong'erie isunta o eneng'ororieki imasaa o larrabal o enenang'arieki enkima oo soito, imbaa o sooito.

⁵²Neitobir sii ninche Ilyahudi imasaa o larrabal te nkaraki ilmang'ati, nelo olarrabal dukuya te rishata naado.

⁵³Kake meetae endaa natelekua te nkaji e Nkai amu olari apa le sabato, naa ore lelo ooisikutua too loreren nepuonu aaisudori te Yudea, nemut ina daa natipikaki anaa olchumati.

⁵⁴Ore te nkaraki meeti endaa neidapasha iltung'ana apuo nkang'itie, neing'uari ilkuti tung'ana te nkaji e Nkai.

⁵⁵Ore ina rishata, ore Filipo laa ninye apa etegelua olaiguanani Antioko eton eitu eye peyie eiteng'en enkerai enye naaku olaiguanani,

⁵⁶neshukunye te Pasia o Midia. Neshukunye ninye o enjore o laiguanani, eeta enkipirta nayayie enkitoria pooki. Ore peyie ening Lisia lelo omon,

⁵⁷neisosion anapa peyie elo. Nejoki olaiguanani oti o lkituaak lenyena o ltung'ana, “Kigira aashalu pooki olong, nemeekure kiaata endaa nabaiki iyiook, naa ore ene wueji nikitamanya naa kegol. Neme ina ake etii sii imbaa e nkitoria naayiu neing'urari aasioki.

⁵⁸Neaku emaing'oru eseriani oo Lyahudi o losho lenye pooki.

⁵⁹Nikipalaa ninche metusuja nkitanapat enye o lkuaak lenye anaa enaasita apa te dukuya. Amu eiterua apa ena nyamali pooki ina kata peyie king'eliki, ninche aaiwuang'ie inkitanapat o lkuak lenye.”

⁶⁰Nerrepaki olaiguanani ninye ina o lkituuak, neisho Lisia Ilyahudi enkipirta eina seriani osotua nenyorraa ninche.

⁶¹Ore peyie enyorraa olaiguanani o lkituuak lenye, neipang'u lyahudi too sempewueti lenye.

⁶²Kake ore peyie ejing olaiguanani oldoinyo le Sion nedol ilo sempewuet ogol, negil ninye ilo ning'o neitanapisho peyie egili nena sunta naamanita.

⁶³Nesiooyo ashuko Antiok, neinepu Filipo eitore enkanasa. Nedoiki olaiguanani ina anasa neikonyaa.