Read Maasai Bible – Biblia Sinyati 1 Ilmakabayo 7 Bible Online

1 Ilmakabayo 7 - Maasai Bible – Biblia Sinyati bible

1 Ilmakabayo 7

¹Ore to lari le 151[2] neipang Demetrio olayioni le Seleuko te Roma o ltung'ana kuti nebaya enkanasa natii embata o lomanaa le naiposha, ore teine neitaa kewan olaiguanani.

²Ore eloito enkaji enkitoo oo loo nkakuyiaa lenyena, neibung isikarini Antioko le miet o Lisia, ejo peyie eya ninche enetii Demetrio.

³Ore peyie ening Demetrio lelo omon, nejo “Mayieu nadol ninche.”

⁴Near isikarini Antioko le miet o Lisia, neya Demetrio enkitoo.

⁵Nepuo lelo Yahudi pooki lemeyiolo Enkai erikito Alkimo ilo apa oyieu neaku olapolosani kitok enetii Demetrio.

⁶Nelikioo lelo kulikai Yahudi ejo, Ore Yudas o lalashera lenyena netaara pooki tung'ani likitaretuo iyie aisho enkaina, nemiraa iyiook te nkop ang.

⁷Neaku kijoki iyie irriwai oltung'ani lisilig oleng peyie elo adol eneba ina kinyalata nainyala yuda imasaa ang o enkop o laiguanani, neitame Yudas o lalashera lenyena o lelo pooki ootareto ninye.

⁸Negelu olaiguanani obo loo laikook lenyena, oji Bakide laa ninye apa olgafanai le Siria naa oltung'ani apa kirotet ninye te nkitoo pooki olaiguanani.

⁹Neirriwari ninye o ilo arruoni oji Alkimo, laa ninye etegelua olaiguanani peyie eaku olapolosani kitok, neitanapi ninye peyie eitalaku elap too Lyahudi.

¹⁰Neipang ninche te Antioko, nebaya Yudea o enjore sapuk, nejo alej Bakide Yudas o lalashera lenyena airiwaki olkilikui le seriani.

¹¹Kake ore peyie edol Yudas o lalashera lenyena eneba ina jore nayautua ninche, neitu eitoki airuk ilo kilikuai.

¹²Nelotu oltim loo laiteng'enak loo nkitanapat enetii Alkimo o Bakide eikilikuanu esujata esipata.

¹³Ile Hasidi apa Ilyahudi le dukuya otetema aaitayu osotua o Alkimo o Bakide.

¹⁴Keisilig apa ninche Alkimo, laa ninye apa olapolosani le eishoi e Aaron, ejo ninche meeinyal ninche.

¹⁵Neibalie Alkimo te ninche eseriani nenya olmumai ajo meiteleki ninche enkaina enye aashu ilchoreta lenye.

¹⁶Kake ore ake peyie eiteru ninche aisilig ninye, neibung iltung'ana intomoni ile near ninche, anaa enajo ilkigerot

¹⁷“Eibukori osarge loo iltung'ana linono asipak, neidapasha iseseni lenye aaman Yerusalem pooki, neaku meetai hoo obo otung'uayioki metunukai ilmeneng'a.”

¹⁸Ore peyie easa ina, neureyu iltung'ana Alkimo o Bakide nejo ninche, “Mikiyiolo iyiook ajo kainyoo naa esipata aashu esujata esipata, amu einosa ninche olmumai neitoki aagil!”

¹⁹Neipang Bakide te Yerusalem nelo ashet olng'oborr te Bet-Saiti. Nejo peyie eibungi Ilyahudi asipak o lelo kumok lemeshilaa nkitanapat ootushulare ninye, neisho metaari ninche nenang'akini engumoto.

²⁰Neisho Bakide Alkimo meitoria enkop neing'uaa sii enjore peyie eretu ninye, neshuko alo enetii olaiguanani.

²¹Neiteru Alkimo enkitirrishakinoto naituduparie kewan anaa olapolosani kitok.

²²Neshulare lelo pooki ooitanyamalisho. Neaku ninche ooitore enkop pooki e Yudea neyaki ninche ilyahudi anyamali sapuk oleng.

²³Nedol Yudas ina nyamali nayau Alkimo o ltung'ana lenyena ajo aitorrono alang enoo loreren.

²⁴Nelo Yudas aman enkop pooki e Yudea eitalaku elap too lelo tung'ana ootushulare Alkimo neibok sii lelo ootii enkanasa mepuo ake teina kop.

²⁵Ore peyie edol Alkimo ajo kegira Yudas agolu o iltung'ana lenyena, neiyiolou ajo meidim airisha ninche neshuko ninye enetii olaiguanani neiteeniki intorok ile Yudas.

²⁶Neirriwaa olaiguanani Nikanori, obo loo lkituaak oanyiti oleng oiba ninye Ilyahudi neitanap ninye peyie eidakie ninche.

²⁷Nelotu Nikanori Yerusalem o enjore sapuk, nejo alej Yudas o lalashera lenyena airrriwaki olkilikuai le seriani. Nejo,

²⁸“Mikintoki aara iyiook o ntae, kalotu enitii o loti tim loo ltung'ana pee kiro.”

²⁹Ore peyie elotu enetii Yudas neirorokino te mboron kake ore lmang'ati le Yudas neterretenate peyie eibung ninye.

³⁰Ore peyie eyiolou Yudas ajo ore ina lotunoto e Nikanori naa olosek te nkaraki ninye, neureshoyu ninye neany etumore Nikanori.

³¹Neyiolou Nikanori ajo etujurroki nelo te Yerusalem atumore Yudas to larrabal te mbata e Kafar-salama.

³²Near iltung'ana le Nikanori obaya iip imiet, neisik ae rubata enjore aisikaki osempewuet te nkanasa e Daudi.

³³Ore te nkiti rishata nelo Nikanori oldoinyo le Sion. Ore embata oo lapolasak neipang te nkaji e Nkai tenebo embata oo larikok loo iltung'ana aitoomon Nikonari too lomon le seriani neitodol olasar opejori ogira aitayu te nkaraki olaiguanani.

³⁴Kake nesukeny ninche, neidurukie ilo asar, neiro to lwuasa

³⁵ore te ngoro nenya olmumai ajo, “Tenemeishoru aate Yudas o lalashera lenyena aasioki, kapejoo ena aji e Nkai tenashukunye aidipa atimirisho.” Nelo te ngoro enye.

³⁶Nejing lapolosak atua, neitashe to lperere lo lasar le nkaji e Nkai, neiteru aashir neomon Enkai,

³⁷“Olaitoriani, itegelua ena aji e Nkai peyie enap enkarna ino neaku ewueji e nkomono o esayiata too iltung'ana linono.

³⁸Neaku, ntalaku elap tele tung'ani o enjore enye inchoo ninche eye to larrabal. Tadamu enkiroroto enye e ntorroni te nkaraki iyie nimincho hoo obo lenye ejeu.”

³⁹Neipang Nikanori te Yerusalem neshet olng'oborr te Bet-horon neshulare enjore e Siria.

⁴⁰Ore ninye Yudas neshet olng'oborr te Adasa o iltung'ana inkalifuni uni. Ore teine neomon Yudas, ajo,

⁴¹“Olaitoriani, kejoki iyiook ilkigerot, ore teneirriwaa olaiguanani ilkiliku mikitamoro, near olmalaika enjore enye, iltung'ana inkalifuni iip nabo o ntomoni isiet o miet.

⁴²Neaku ake nji sii nkuna, ndakie ena jore te dukuya iyiook, neyiolou pooki ajo Nikanori egirae aaitame amu etamoro ninye enkaji e Nkai sinyati. Entamio ninye anaa enairirikino entorroni enye.”

⁴³Netumo njoreitin to larrabal te nkolong e tomon okuni to lapa le Adari, nemiri enjore e Nikanori, naa ninye ole dukuya pee eari.

⁴⁴Ore peyie edol enjore enye ajo etua, neitiaaya imasaa o larrabal neisik ninche.

⁴⁵Nesujaa Lyahudi enkolong o endama nasho aiteru te Adasa ometabaiki Gasara. Ore epuoito nekut ninche intarumpetani aipotosho te nkaraki olarrabal,

⁴⁶nepuku iltung'ana too nena aing'itie namanita Yudea nedoik lelo mang'ati oisikita too inchot pooki. Neisimaki ina lmang'ati peyie eshukokino lelo Lyahudi oomirita ninche, near lmang'ati pooki, meetai hoo obo otajeuo.

⁴⁷Neya Lyahudi yarunot enye nedung'oo elukunya e Nikanori o nkaina e tatene natuutishore apa ninye to lwuasa. Neya ina lukunya o nkaina neutaa te Yerusalem.

⁴⁸Neshipa Ilyahudi, neitaa ina olong enkolong osirua,

⁴⁹nepik ilkingerot inchere ore enkolong e tomon uni o lapa le Adar keaku enkolong osirua too larin pooki.

⁵⁰Netum enkop e Yudea eseriani te nkiti rishata.