Read Maasai Bible – Biblia Sinyati 2 Ilmakabayo 1 Bible Online

2 Ilmakabayo 1 - Maasai Bible – Biblia Sinyati bible

2 Ilmakabayo 1

¹Enkirorokino o eseriani too Lyahudi ootii Misiri naing'uaa ilalashera linyi Ilyahudi le Yerusalem o Yudea.

²Meitaasa intae Enkai isidan, metadamu Enkai olning'o lenye te nebo Abraham o Isaak o Yakobo isinkan lenyena asipak.

³Meishoo ntae pooki oltau liseremiemie ninye niasiasa eyieunoto enye too ltauja linyi pooki.

⁴Metaboloki iltauja linyi nkitanapat enyena neyaki ntae osotua.

⁵Metoning'o Enkai enkomono inyi neshukokino ntae, nemeiturraa ntae te nkata e nyamali.

⁶Kigira aaomonoki ntae.

⁷Ore to lari le iip nabo o ntomon ile o naudo (169), aa Demetris liare olaiguanani le Siria, nikingerokito intae too naaipirta osina o erishata nagol nikiaata apa pee eidip Yason o lturrur lenye aatogolong'u te nkop sinyati.

⁸Nepej Yason o ltung'ana lenyena kutukaji e nkaji e Nkai near iltung'ana lemeata entiyoto. Kitoomono Enkai nening enkomono ang. Nikintayu ilasarri loo ng'uesi o le ntapa sidai nikinok oltaa te nkaji e Nkai nikipik imukateni sinyat.

⁹Ina pee kisai intae embung'a ilo sirua to lapa pooki le Kislef enkolong e masho anaa olapa loo lng'oborri o lari le ipnabo o ntomoni siiet o isiet (188).

¹⁰Iyiook iltung'ana le Yerusalem o Yudea o lkioma kitok loo lpayiani o Yudas kingeroki iyie Aristobulo le ishoi oo lapolosak ooputo naa olaiteng'enani lo laiguanani Tolemai o Lyahudi ootii Misiri, kiroroki intae nikiyiewuaki intae biotisho.

¹¹Ore eitajewuo intae Enkai aitung'uaa batisho o enkurare, kijoki ninye ashe amu etaa ole nkalo ang tialo olaiguanani.

¹²Etimiraiye Enkai lelo pooki ootigilunore enkanasa sinyati.

¹³Ore pee ebaiki Olaiguanani Antioko le Pasia te ng'olon nemeidimunoyu, nedung'udung'i te nkaji e nkomono e Nanea te lejare o lapolosani le Nanea.

¹⁴Eshomo apa Antioko enkaji e nkomono tenebo o laikook lenyena eji pee eyam enkai lipong, kake ore enkipirta enye sapuk naa pee etum aawaa imasaa naatii ina aji e nkomono pee eitaa ine nkaputi.

¹⁵Ore pee eidip aterretena olapolosani le nkaji enkomono e Nanea olchumati, nejing'u Antioko o ltung'ana lenyena kuti pee etum aawaita imasaa neiken kutuk aji.

¹⁶Ore pee ebolo kutuk aji naisudoro te nchumata enkaji, nenang ilarikok too soito o ltung'ana lenye nedung'oo ilukuny enye nenang'aki iltung'ana ootii boo.

¹⁷Meisisi Enkai too nkoitoi pooki amu eiguanare iltorrok!

¹⁸Ore te nkolong e tikitam o miet to lapa le Kislef kipuo aashipakino enkolong naitisinyi enkaji e nkomono nikijo aisidai tenikiliki ntae pee itumutumu aatishipakinoto osirua tenebo anaa enishipakinono osirua otadouo e nkima oishoruno ina kata pee eshet Nehemia enkaji enkomono o lperere lo lasar.

¹⁹Ore eyaitai iloo papa eyararoto te nkop naji Pasia, nedumu enkima o lperere olapolosani le ina rishata neisudoo tiabori ereyiet nemetii enkare, neisudoo meetae oloyiolo ina bae.

²⁰Kake ore pee elusoo ilarin kumok te yieunoto e Nkai, neitanapi Nehemia Antioko olaiguanani le Pasia meirriwai iltung'ana lo lapolosani ooisudoitie enkima meyau. Ore pee eishoru oratioti ajo eitu etum enkima kake enkare nairrusha enoto, neitanap ajoki eyau.

²¹Ore pee eidipi aaiteleiki olperere pooki toki, nejoki Nehemia ilapolosak pee ebukoki ina are olasar.

²²Ore pee eidipayu nelusoo inkolong'i, neliooyu enkolong tiatua nkatampo, nepejori pooki toki nati olperere. Neing'or pooki ng'ae te nking'asia.

²³Ore einosita enkima olasar, neriko Yonatan olapolasani kitok iltung'ana te nkomono nening'okino pooki o ltung'ana te nebo o Nehemia.

²⁴Inji ejo enkomono e Nehemia, Olaitoriani Enkai, olaitobirani le pooki, ira ole nking'asia niata enkidimata, kibore olng'ur o esipata. Iyie ake olaiguanani. Nemeetae osupat leme yie;

²⁵kibore empiris o esipata. Ira kitok intarasi, nirretena intarasi pee intajeu Israel te nyamali. Itegelua loo nkakui lang metaa iltung'ana linono gelunot.

²⁶Tang'amai ele asar likinchoru te nkaraki Israel; torripo iltung'ana linono gelunot nintisiny iyiook.

²⁷Talaku lelo oora irrindiki te nkop eiiking'a ninturrurru tenebo iltung'ana lang ooidapashate. Ing'urrie iltung'ana lang oinyalitai nemeni pee eyiolou inkuapi pooki ajo ira Enkai ang.

²⁸Ntamio iltung'ana torrok ooironya iyiook

²⁹nintasheyie iltung'ana linono te nkop ino sinyati ana enitejo eimu Musa.

³⁰Nerany ilapolosak osinkolio.

³¹Ore pee emut enkima olasar, neitanapisho Nehemia ajo ore enkare natelekua nebukokini isoito sapuki.

³²Ore pee eidipayu ena, nepuku olng'ejep le nkima kake ore pee epuku ewang'an naing'uaa olperere neye enkima.

³³Ore pee eyiolouni ena bae, nelikini olaiguanani le Pasia aajoki ore ewueji neisudorie olapolosani enkima, netupukuo enkare naa ninye etapejorie Nehemia oloboitare olasar,

³⁴nejur olaiguanani ina kias, neiken ine wueji neiteng'el.

³⁵Ore lelo pooki oonoto omom to laiguanani neishori inkishoorot sidain.

³⁶Neipot Nehemia o lelo oboitare ajo “naftari,” nchere enkitisinyata, kake ore too ltung'ana kumok naa keji nafta.