Read Maasai Bible – Biblia Sinyati 2 Ilmakabayo 10 Bible Online

2 Ilmakabayo 10 - Maasai Bible – Biblia Sinyati bible

2 Ilmakabayo 10

¹Neriko Olaitoriani Yudas Makabayo tenebo o ltung'ana lenyena neitoki akordu enkaji e Nkai o enkanasa e Yerusalem.

²Neng'er, neinyal ilpereren ootesheta ilomon te wueji nemirishoreki neinyal sii ae wueji nateshetaki naseremishoreki.

³Neitisiny enkaji e Nkai neshet likae perere lo lasar, neinok enkima neitayu olasar le dukuya tiatua erishata oo larin aare leitu aikata eitokini aitayu neinok iltaai neyau imukateni naaitisinyaki.

⁴Ore pee eidip ataasa kuna pooki neirrag te nkop neomon Enkai pee meitoki anyorraa metaasata mbaa torrok anaa naataasate. Neomon sii pee etum olng'ur te neitoki aitame ing'ok neidim anyaaki atasa te siadi, pee meitoki aitarasaki inkaik iltung'ana arruok oomor Enkai nemeeta enkanyit.

⁵Neitisiny enkaji e Nkai te nkolong e tikitam o miet to lapa le Kislef, ina olong olapa naisarkenio iloreren enkaji e Nkai.

⁶Neshipakino osirua inkolongi isiet anaa enashipakino osirua loo lng'oborri.

⁷Ore eibung'ita mbenek naashal o lng'osil loo ntiyan nerany isinkoloitin le nkisisa eisho enashe ilo oidimie enkaji enye e nkomono meitisinyi.

⁸Nemut to ratioti otoning'okinote te oshoto e nkukuo nejo paa ore olosho pooki lo Lyahudi neibung nena olong'i to lari ake pooki.

⁹Ena enkiting'oto e Antioko oji Epifana.

¹⁰Aikinosu naa mbaa naataasate tiabori Antioko Epatori enkerai e ilo tung'ani lemeyanyit Enkai, naa aikidol te ndorropo intorok naayawua olarrabal lenye.

¹¹Ore pee eitaae olaiguanani negelu oltung'ani obo oji Lisia meta olaitaisheikinoni lo mbaa e nkop neeku olgafanai le Siria kitok o Foinike

¹²kake mme Tolemi Makaroni olaa ninye olgafanai lee dukuya oitasa Ilyahudi esipata nererioo mbaa torrok naaitaasaki ninche.

¹³Ore te nkaraki ina, nepuo ilchoreta lo laiguanani Epatori neitang'or Makaron aajo olaitang'oroni amu eilanya ninye olemankale le Kupro ina naitarasaka olaiguanani Filometo le Misiri meitoria. Neipot pooki ng'ae Makaron ajo olaitang'oroni neitu eitoki aisho enkanyit neishiakino enkitoo ometooko esayiet aar kewan.

¹⁴Ore pee eitaae Gogia olgafanai le Idumea neing'uraki kewan isikarini o nareta, nearare Ilyahudi too rishat pooki.

¹⁵Ore te pooki neibung iwuejitin e tipat neisilisil Iyahudi neitoomon lelo ooisika te Yerusalem nenyok te pooki aitasapuk olarrabal.

¹⁶Ore pee eidip Yudas Makabayo o ltungana lenyena atoomon Enkai neipang'u te siokinoto nerasaki te ngolon emanyisho o Ile Idumea.

¹⁷Neriny siadi lelo sikarin apa oorripito isunta neibung inkanas near metuata iltunga'na inkalifuni tikitam.

¹⁸Neisik isikarini oobaya inkalifuni naudo mang'ati neisudori too ltaleta oogoli oaare netii pooki tooki nayieu o larrabal.

¹⁹Nelo Yudas kulie weejitin naayieunyeki apa te siokinoto neing'uaa Simion o Yosef tenebo o Sakayo o ltung'ana lenyena. Aisapuk apa ina jore enaaidim atamuata ilmang'ati,

²⁰kake eetae ilkuti lewa le simion ooisepe ore pee eishori ilkiloi intomoni ile oong'uan le nkosholai neinguiki embata ooo lmang'ati meisika.

²¹Ore pee ening Yudas enataase neiturrur ilarikok le njore enye nelikio lelo lewa onyor eropare otungueikitia ilmang'ati pee erinyokino aarare ninche.

²²Near metuata lelo ootalakutua ilmangati, ore te siokinoto neibung isempewueti are.

²³Ore to larrabali pooki neisulie Yudas teina rasakinoto, near metuata iltung'ana inkalifuni tikitam ootii nene wuejitin are neegol.

²⁴Ore Timoteo otimira Ilyahudi te dukuya, neiturur isikarini akedok loo mbartan ooing'uaa Asia, o sikarini kumok maisero neigutaki eterretene pee erasaki Yudea.

²⁵Kake ore epunyakita ilmangati, neomon Yudas o ltungana lenyena Enkai neishop irkuniyani neelie ate nkulupuok ilukuny enye,

²⁶neeirrag to lkedet lo lasar neomon Enkai meidimie metareto to larrabal lo lmang'ati lenye, anaa enaisiligie to nkitanapat enyena.

²⁷Ore pee eidip aatoomon, nedumu inareta enye, nepuo aalakuaniki te Yeruslem, neitashe te mbata o lmangatinta.

²⁸Ore pee emanaa enkakenya neiteru olarrabal. Ore enjore oo Lyahudi neng'idare empijan enye o siligi lenye to Laitoriani pee emirisho, kake ore lmangati neng'idare enkariyiano o larabal o mpijan enye.

²⁹Ore pee eirowuaju olarrabal, nedol olmang'atinta ilewa miet oikishiaan ooing'uaa keper ooreuta mbartan neibung'ita ingusidin e saabu, erikito isikarini loo Lyahudi.

³⁰Neman lelo lewa miet Yudas, nerrip too long'oi enye, neng'or ilmang'ati to mbaa. Nemilo isikarini lo lmang'atinta neidapasha, nedung'udung Ilyahudi ninche,

³¹near metuata isikarini inkalifuni tikitam o iip miet o sikarini oked imbartan iip ile.

³²Neilanyisho Timoteo nelo ewueji eseriani naji Gasara, natii tiabori Kaerea, olalashe le Timoteo.

³³Neman Yudas Makabayo ina anasa inkolongi onguan,

³⁴ore iltungana ootii atua enkanasa nening etii eseriani nepuo dukuya aamor Enkai neiro irorei torrok.

³⁵Ore te nkolong e miet, tadekenya negoro iltung'ana le Yudas te nkaraki emoroto namoritoi Enkai, neked esuntai te mpijan neidakie pooki toki naineputua.

³⁶Neked kulikae isunta tiaishoto nepejoo isempewueti pooki. Nenya enkima ilmang'ati kumok. Ore ae jore oo sikarini negil inkutukajini neyau isikarini meibung'a ina anasa.

³⁷Near metuata Timoteo tenebo o lalashe lenye Kaerea o Apolofane.

³⁸Ore pee eishunye olarrabal, neshipakino Ilyahudi, nerany isinkolioitin le nashe to Laitoriani oishoo ninche emirishoi.