Read Maasai Bible – Biblia Sinyati 2 Ilmakabayo 11 Bible Online

2 Ilmakabayo 11 - Maasai Bible – Biblia Sinyati bible

2 Ilmakabayo 11

¹Ore te rishata dorrop etaaraki Timoteo, nening Lisia laa olarriponi naa olalashe lolaiguanani naa olkitok sii le nkitoria enataase, negoro

²neiturrur isikarini intomoni siet o lakedok pooki o mbartan pee egilunore Ilyahudi. Keyieu apa ninye neitaa ina anasa enkanasa o Lgiriki,

³neitalaku kodi anaa enatiu te kulie ajijik pooki e seremare e kulie kuapi, nemir sii enkapisi o lapolosani kitok pooki ari.

⁴Eitu eitaa toki Lisia enkidimata e Nkai kake enoto ninye olwuasa te nkaraki inkalifuni o sikarini o ltomia lenyena inkalifuni intomoni siet.

⁵Nerasaki Yudea neinyal osempewuet le Bet-suri elakuani oo nkilomitani tomoni uni e kopikop e Yerusalem.

⁶Ore pee etum Makabayo o ltung'ana lenyena kulo rorei neishir o ltung'ana lenyena pooki neomon Olaitoriani meirriu olmalaika meitajeu ninche.

⁷Yudas Makabayo oitera adumu inareta, neikilikuan ilkulikae tung'ana metipika enkishui enye bata tenebo o ninye pee etum atomitu Ilyahudi alashera lenye. Ore te yieunoto sapuk nekuet te nebo.

⁸Ore etii embata e Yerusalem, nedol olarewani le mbarta oishopo inkilani naaibor neimerrlelie enaret e saabu.

⁹Neisis Enkai tenebo neisho enashe to lng'ur lenye; eitu ake eisho empijan naarare oltung'ani kake enaarare sii ing'uesi torrok o enagilie isunta naasheta to suyai.

¹⁰Nepuo dukuya eteretenate to larrabal tenebo o ilo aretoni oing'ua Keper amu etoduake Olaitoriani olng'ur.

¹¹Nerasaki ilmang'ati lenye anaa orng'atuny near isikarini inkalifuni tomon obo o lakedok loo mbartan enkalifu nabo o iip ile neilanyisho embata.

¹²Ore enkumoi e lelo ooilanyishote neeta ilbaa neiminie inareta enye. Neilanyisho sii ninye Lisia te nkurruna.

¹³Ememoda Lisia tenedamu emirata natimiraki netayiolo ninye ajo Enkai magilani natomituo Ilyahudi. Neirriwaki Ilyahudi olkilikuai,

¹⁴netem ailejilej ninche pee enyorraa metoning'unoto neisiligishore pee eas pooki naidimayu pee eita olaiguanani olchore.

¹⁵Ore te nkaraki eretoto o ltung'ana lenye, nenyorraa Yudas Makabayo iutarot e Lisia, amu etang'amua olaiguanani nenyorraa enkomono pooki naisho Yudas Lisia too lkigerot.

¹⁶Ore enasuju naa empalai naigeroko Lisia Ilyahudi: “Nanu Lisia oigeroki Ilyahudi, airoroki ntae.

¹⁷Aayakita Yohana o Absolom, lelo kiliku likirriwuakitia, empalai naaomon pee anyorraa inaaigero teina palai.

¹⁸Atolikio olaiguanani imbaa pooki naishiaakino nelikini, netonyorrayie ina naidimayu

¹⁹Ore pee ipuopuo aaku ilooisiligayu to laiguanani naa kaas pooki naaidimayu to nkolongi naaponu, te nkaraki dupoto o losho linyi.

²⁰Ore to naipirta ilkiliku linyi, naitanapa iltung'ana laainei tenebo o ninche pee etumo te nebo neimaki imbaa pooki.

²¹Kayieuwuaki ntae eseriani. Eigeroki ena palai te nkolong e tikitam oong'uan o lapa le Dioskorinto to lapa le iip nabo o artam o isiet.”

²²Inji eikununo empalai o laiguanani: “Nanu olaiguanani Antioko aigeroki olalashe lai Lisia, enkirorokino.

²³Ore amu eshomo papaai lai aaku tenebo nkaitin, kang'uar pee meitanyamali enkitoria ai.

²⁴Kitoning'o aajo menyorraa Ilyahudi orkuak lo Lgiriki anaa enayieu apa papaai lai kake etonyorra ninche aibung'a inkitanapat enye maate, netoomonutuo pee ishori meibung'a inkitanapat enye.

²⁵Ore naa amu kiyieuwuaki netoni elakuno anaa ilkulie oshon te nkitoria ai, ore eneekiimie naa inchere pee eshukokini ninche enkaji enye e nkomono, nenyorrikini pee etoni too olkerreti loo loo menye.

²⁶Keaku embae e tipat te nikiliki enikitonyorraitie inchere pee eidim aatorikoi imbaa enye maate to sotua metii enkurretisho.”

²⁷Ore enasuju naa empalai o laiguanani natisiraka Ilyahudi, “Nanu olaiguanani Antioko aigeroki ilarikok lo Lyahudi ol kulikae Yahudi pooki Enkirorokino.

²⁸Kaisilig ajo aisidain imbaa inyi pooki anaa enekiyieu. Kira sii yiook biot.

²⁹Etolikio iyiook Menelau inchere iyieuu nishukunyenye ang pee itumutumu atanyamaliki imbaa inyi maate.

³⁰Kaitanap naa lelo linyi orrinyo aapuo ang te nkolong e tomoniuni to lapa le Kasantiko pee meureishoyu.

³¹Indimidimi aibung'a imbaa inyi o lkuak, enkinosata e ndaa o kulie kuaaki anaa eniasitata oshiaake, nemetii olyahudi oitamei te nkaraki imbaa naas te modai.

³²Kairriu Menelau meitukuja neitagol indamunot inyi.

³³Eseriani. Etisiraki ena palai te nkolong e tomon o miet olapa le Kasantiko olari le iip nabo o artam o isiet.”

³⁴Eirriwakita sii Iroma Ilyhudi empalai najo nji, “Kuinto Memio o Tito Manio, o laitaisheikinok loo Roma te nkop oo lyahudi, entasupa.

³⁵Ekinyorraa imbaa pooki naaishoo intae Lisia olalashe lo laiguanani.

³⁶Ore naa amu kitii enkoitoi kipuoito Antiokia entujuru nena baa naikilikuana Lisia olaiguanani. Ore pee indipidipi niyakiki iwalat te siokinoto pee kindim aitasheiki ntae to laiguanani te dupoto inyi. Entaas ina te siokinoto,

³⁷emimutie pee kitum aatayiolo enitumuta.

³⁸Entaserian. Etisiraki te nkolong e tomon o miet olapa le Kasantiko olari le iip nabo o artam o isiet.”