Read Maasai Bible – Biblia Sinyati 2 Ilmakabayo 12 Bible Online

2 Ilmakabayo 12 - Maasai Bible – Biblia Sinyati bible

2 Ilmakabayo 12

¹Ore pee eidipayu olning'o lo sotua lo Lyahudi o Lesiria, nerrinyokino Lisia olaiguanani, nerrinyokino Ilyahudi enturore.

²Kake ore ilgafanani too nkulie wuejitin, Timoteo o Apolonio olayioni le Genayo o Hironimas o Demofon neitu eisho metotona te seriani naa nejia etiu Nikanori olkitok loo sikarini oing'uaa Kupro.

³Neitaas tena rishata iltung'ana le Yopa Ilyahudi embae torrono. Neitaakuno anaa ilchoreta lo Lyahudi ninche, neitoomon te nebo o ltung'ana lenye meiriamari te nebo to melin enye.

⁴Ore naa amu etumuta nabo iltung'ana leina anasa pee eas neijia, neitu eing'aying'ae Ilyahudi, nenyorraa ina nikitomoono toltau obo. Kake ore etii enaiposha neidaikie iltung'ana le Yopa Ilyahudi ora iip are, neye pooki

⁵Ore pee etum Yudas ilomon le ntorroni ootasate tialo Ilyahudi neliki ilewa lenyena

⁶Ore pee eidip aatoomon Enkai, nerasaki lelo arak. Nepejoo ine wueji kewarie neitasheyie melin o melin pooki, near metuata lelo pooki ooisudori too melin.

⁷Ore naa amu eikenoki inchomito pooki e nkanasa, nerrinyo Yudas kake eeta endamunuto pee eeigil ashukunye amut emanyisho pooki e Yopa

⁸Neitoki aning Yudas ajo keyieu iltung'ana le Yamnia near metuata Ilyahudi le nkanasa enye.

⁹Nerasaki iltung'ana le Yamnia kewarie nepejoo eneitasheyie melin tenebo o melin pooki natii ine nedoli olng'ejep le nkima te Yerusalem, elakuani o nkilomitani onom.

¹⁰Ore etaa inkilomitani are pee ebaiki Yamnia epuoito aatumore Timoteo to larrabal, nerasaki ilarabu oolus to nkalifuni imiet o sikarini akedok loo mbartan iip imiet.

¹¹Ore pee elusoo olarrabal ogol te retoto e Nkai, nemirisho Yudas o ltung'ana lenyena. Ore lelo ootimiraki neomonu shoruetisho oo lyahudi, neisiligie pee eisho ninye inkishu neret iltung'ana lenyena too nkulie oitoi.

¹²Nedol Yudas ajo keeku dupoto to Lyahudi too nkoitoi kumok nenyorraa pee eitayu osotua o ninche. Ore pee elusoo nena nerinyo Ilarabu apuo ilng'oborri lenye.

¹³Neitoki sii Yudas arasaki enkanasa e Kaspini, nasheta too sunta. Ore iloopeny oomanya naa iltung'ana loo nkulie kuapi

¹⁴ong'idare engolon o sunta enye neng'idare sii endaa sapuk naata ninche. Nekueniyie ninche Yudas o ltung'ana lenyena nebuaaki ninche nemor Enkai enye.

¹⁵Kake etoomono Ilyahudi Enkai, Olaitoriani le nkop otuuroyie isunta e Yeriko te rishata e Yoshua, neitu eurorie inareta etung'ani aashu kulie ake.

¹⁶Nerasaki te mpijan nena sunta, neibung ina anasa te yieunoto e Nkai, near iltung'ana kumok oleng lemeikenayu. Ore enaiposha nataaniki ine nara te lalai inkilomitani are, neliooyu eiputa osarge oleng.

¹⁷Ore pee eidip aashom inkilomitani iip o onom nebaiki enemanya Ilyahudi te Karaksi embata e nkanasa e Tobu.

¹⁸Kake eitu einepu Timoteo teine amu eidipa ninye ashomo. Eitu apa eas ninye ae toki teine kake etung'uayie enjore kitok.

¹⁹Ore ilkituaak aare le Yudas Makabayo, Dositio o Sosipateri nerasaki ina jore near metuata iltung'ana inkalifuni tomon.

²⁰Neor Yudas Makabayo isikarini. Neitaa Dositio o Sosipateri ilarikok, neipang aisarisar airiamariyie Timoteo orikito isikarini oopuo too nkejek oora iip nabo o tikitam o lakedok loo mbartan inkalifuni are o iip imiet.

²¹Ore pee eyiolou Timoteo ajo kesujita Yudas neiturukie inkituak o nkera o lolan meshomo Karnaim enkanasa apa nataana nemeidimayu pee emani aashu ebaikini amu aironkeni inkoitoi naapuo ine wueji.

²²Kake ore pee eipang'u enjore e dukuya e Yudas, neiput enkuretisho isikarini lolmang'atinta te nkaraki enduata nairriuwa Enkai nadol pooki toki. Ore te nkuretisho enye neiter aakuet netum ilbaa enkumoi enye, edung ilalema lenye.

²³Nemir Yudas o ltung'ana lenyena ninche near metuata isikarini lenye tomoni uni.

²⁴Neibung'i Timoteo makeon isikarini le Dositio o Sosipateri. Kake ore amu kalamas apa ninye oleng nelej ninche nchere keena isotuatin lenye kumok naa keeri ninche metuata enemelakuni ninye meshomo.

²⁵Ore te siadi pee eisiligie ninche too sayia sapuk ajo kerriny iltung'ana o sikarini lenye te seriani, nelakuni Timoteo.

²⁶Nerasaki Yudas enkanasa e Karnaim o nkaji e nkomono e Targati near metuata iltung'ana inkalifuni tikitam o miet,

²⁷neidaikie enkanasa tenebo e nkaji enkomono. Neitoki arasaki ina anasa kitok nasheta e Epron ine nemanya Lisia o ltung'ana ooing'uaa inkuapi pooki. Neitashe ilbarnot oogol aaman isunta neirishisho te mpijan. Ore tiatua ina anasa netii inareta kumok o larrabal.

²⁸Nepou dukuya Ilyahudi aomonu eretoto to laitoriani odim atigila engolon olmang'atinta. Neibung ina anasa near metuata iltung'ana oobaya inkalifuni tikitam o miet.

²⁹Neipang aapuo Skitopoli, enkanasa natii inkilomitani iip nabo o tikitam te Yerusalem

³⁰Ore Ilyahudi otii ine wueji neliki Yudas eramatare nataramata iltung'ana le ina anasa neisulaki to rishata e ngoloto.

³¹Neisho enashe Yudas o ltung'ana lenyena neomon pee eas neijia anaake tialo Ilyahudi to nkolong'i napuonu. Neipang aapuo Yerusalem nebaya eton eitu eiteru osirua le nkikesare.

³²Ore pee elusoo osirua le Pentekoste neipang Yudas o ltung'ana lenyena agilunore Gogia olgafanai le Idumea,

³³otarare ninye o sikarini iip uni o lakedok lo mbartan iip ong'uan.

³⁴Ore teilo arabal netaaraki metuata Ilyahudi kuti.

³⁵Kake eetae Olyahudi obo oing'uaa enkanasa e Tobu, olakedoni loo mbartan, oata engolon oji Dositeo, neibung olkila le Gogia, neiteru adung'udung Gogia te ngolon pee etum aawa eishu. Ore nabo kata, nekuetiki olarewani obo loo mbartan le Tarakia Dositeo nedung enkaina enye; neisho Gogia meilanyaki enkanasa e Marisa.

³⁶Ore teina rishata Ilyahudi oti tiabori olkitok Esdri netotona to larrabal te rishata naado neaku etanaurate. Neomon Yudas Olaitoriani pee eitodolu ajo ketii apa enkalo enye nerikito isikarini lenye pooki.

³⁷Ore eranyita Juda osinkolio te nkutuk o lopapa lenye neishir emowuo o larrabal, nerasaki Ilyahudi Gogia o ltung'ana lenyena; neilanyisho ilmang'ati.

³⁸Ore pee elusoo olarrabal nerik Yudas iltung'ana lenyena enkanasa e Adulam, eton apa eng'or enkolong e sabato, neitisiny ate anaa enatiu olkuaak lo Lyahudi neibung enkolong sinyati

³⁹Ore enkolong natusujua nedol ajo ene tipat pee esot iseseni lo ltung'ana ootaaraki metuata to larrabal nenuka to nkuraren o loo menye.

⁴⁰Ore to seseni pooki netum inkaitin naaseremi te Yamnia naisudoro tiatua inkilani enye, nemeishoruno pee eishop Ilyahudi. Neyiolou Ilyahudi ajo kanyioo pee etaaraki metuata kulo tung'ana.

⁴¹Neisis inkoitoi o Laitoriani, olarishani oata esipata neibalunye inaaisudoro,

⁴²neomon Olaitoriani pee ejutoo ina ng'oki. Neomon Yudas iltung'ana pee eilany ingok amu etoduaakita ate inataasate tialo lelo lewa otaasa ng'ok.

⁴³Nesot impisai too lewa lenyena naabaya nkiloi are e nkosholai neirriwa Yerusalem te nkaraki enkishooroto o lasar loo ngok. Neas Yudas ena bae e tipat amu eiruk ninye empiunoto o lootuata.

⁴⁴Tenemeeta enkirukoto ajo keitopiuni ilotuata na enaata aa emodai o empesho enkomono naomonokini ilootuata.

⁴⁵Kake tena ke nkishooroto sidai ereshito naishori ilotuata asipak te Nkai, naa endamunoto sidai sinyati ina. Neitayu Yudas olasar le mpalakinoto pee etumi aiwuang'ie ing'ok enye.