Read Maasai Bible – Biblia Sinyati 2 Ilmakabayo 2 Bible Online

2 Ilmakabayo 2 - Maasai Bible – Biblia Sinyati bible

2 Ilmakabayo 2

¹Ore anaa enatiu too ntepen neitodolu oloiboni Yeremia eitanap lelo apa oogirae aidurrie pee enap enkima anaa enatejoki,

²ore pee eidip aishoo oloiboni inkitanapat o nkiteng'enat lelo ogirae aidurrie pee merikino ake inkitanapat Olaitoriani, aashu eitapong'ori to ndamunot te nedol saabu o nkitobirunot e nkosholai o eseremare naseremi.

³Ore too lkulikae laijo lelo neitukuja ninche pee meing'uaa inkitanapat iltauja lenye.

⁴Keliki sii iyiook intepen inchere ore Yeremia, erikoo Enkai, neitanapishe paa ore olng'obor le ntumo o sanduku lo sotua, neiriamari tenebo ometabaiki oldoinyo ewueji apa neitasheyie Musa neing'or enkop apa naisiligie Enkai iltung'ana lang.

⁵Ore pee ebaya Yeremia oldoinyo nedol enkapune sapuk, neya ine olng'obor o sanduku lo sotua o lperere lo lasar neiken ina apune.

⁶Etii sii ilchoreta le Yeremia ootejo matusujai pee etum aatipik olmonekie enkoitoi kake eitu etum ina apune.

⁷Ore pee eyiolou Yeremia ina neisikong nejoki: “Meyiolouni ine netii enkapune o meiturrurro Enkai iltung'ana lenyena aigil neitodol olng'ur lenye.

⁸Teine taa elo Enkai aibalunye kuna tokitin, naa kedoli enkitoo e Nkai o enkatampoi anaa enatoduaaki te nkata e Musa o anaa enatejo Solomon pee eiteng'eli neitisinyi ine wueji.”

⁹Eibalunyeki sii aajo eitayio Solomon olasar le nkitarasaroto o enkidipata e nkaji e Nkai te mborei eng'eno.

¹⁰Ore anaa enatoomono Musa Olaitoriani nedou enkima naing'uaa shumata nenya olasar, etoomono sii ninye Solomon nedou enkima nenya olasar le nkishooroto.

¹¹Nejo Musa, “Einosa enkima ilo asar amu eton eitu enyai ekishooroto o lasar le ng'oki.”

¹²Neshipakino solomon osirua too nkolong'i isiet.

¹³Eigeroki sii nena baa too ntepen o laiguanani o too ntepen e Nehemia oiterua ewueji neisumareki neiturrurru ilkigerot le Daudi o mpala o laiguanani naaipirta inkishoorot o mbukui naaimaki ilaiguanak o loibonok.

¹⁴Eiturrurruo sii Yudas imbukui naaidapashaki apa te nkaraki olarrabal, neton kiata nena bukui

¹⁵neaku tenelo ake niyieu irriwai iltung'ana mikiyaki.

¹⁶Ore amu etaa aikijo pee kishipakino osirua le nkitisinyata, kingeroki iyie aaitoomon. Keidimayu pee idamu nena olong'i?

¹⁷Enkai naitajewuo iltung'ana lenyena pooki, nerrinyoki enjung'ore enye pooki o nkitisinyata o noo laiguanak o ne mpolosare o enkisiaayiare e nkaji e Nkai,

¹⁸anaa enaisiligie too nkitanapat. Kiata osiligi te Nkai inchere aikitum olng'ur te ninye neiturruru iyiook te pooki wueji tiabori keper apik iyiook wueji enye sinyati, amu eitajewuo iyiook too mbaa sapuki torrok neitisiny ine wueji.

¹⁹Enkatini e Yudas loo lmakabayo o lalashera lenyena e nkitisinyata e nkaji e Nkai kitok o nkitarasaroto o lperere.

²⁰Einosua ilarrabali tialo Antioko o layioni lenye oji Eupata

²¹o mpukunoto naing'uaa keper te lelo oosuj too ltauja lenye pooki Ilyahudi, paa ore hoo naa kuti te siana neibung enkop pooki

²²nerrinyu aigil e nkaji e Nkai yioloti te nkop pooki nekordu enkanasa e Yerusalem neitirrish inkitanapat apa naata pee erikinisho netaasa kuna pooki te nkaraki aisupat Olaitoriani neeta olg'ur tialo ninche.

²³Ore nena pooki naainosua Yason le Kirine too mbukui miet naa aikitem aaitodorrop enkigeroto te mbuku nabo ake.

²⁴Ore enkumoi o mbaa nemeidimayu pee elimuni amu keinaur oloyieu nening'u ina atini.

²⁵Kake atetema nanu aitelelek mbaa te nkaraki ilaisumak, ore lelo ooisum pee eitiship ate naa keshipakino, ore ilooyieu neyiolou imbaa naatasate nemetum engolon.

²⁶Ore iyiook otaasa ina siaai nagol aaitodorrop lelo kigerot nemelelek, keitaarisho enkima nekenyiki iyiook.

²⁷Ore anaa enemelelek te nerreten oltung'ani osirua oshipakino pooki ng'ae. Kake kimbung'a ilo sina te nchipai pee kitum enashe too ltung'ana kumok.

²⁸Aiking'ueiki esiaai oltung'ani arriyia loo nkaatini meing'urai te nkarriyiano imbaa kutiti nikitem te sipata aaitodorrop.

²⁹Keishaakino paa ore olashetani kitok le nkaji ng'ejuk nedamu ae aji o naiko te nekus too matofali naa kaitanyaanyukie esiaai ang enolashetani arriyia.

³⁰Esiaai oo ltung'ana liapa pee etum aimaki imbaa too lubot pooki nejur imbaa te nguton,

³¹kake ore ilo olimu inkaatini neishaakino nelimu te mpijan enye pooki.

³²Neaku emaiteru ainosu inkaatini ang amu emodai tenikilimu ilomon kumok te mbuku o nkaatini nikintodorrop enkatini makewan!