Read Maasai Bible – Biblia Sinyati 2 Ilmakabayo 3 Bible Online

2 Ilmakabayo 3 - Maasai Bible – Biblia Sinyati bible

2 Ilmakabayo 3

¹Ore emanyitai enkanasa sinyati to sotua o esujata oo nkitanapat te nkaraki enkanyit olapolosani kitok Onia o enkiba enye naiba enkarruoisho,

²neyanyita ilaiguanak ine wueji tenebo o enkaji e Nkai o te nkishorunoto sidai,

³ore olaiguanani Selukas, olaiguanani le Asia nelak pooki toki natasishoreki te ilo asar.

⁴Kake eetae oltung'ani oji Simon, lo losho le Benjamin, oitaaki olkitok le nkaji e Nkai otapong'ote o lapolosani kitok to naaipirta enkitasheikinoto enkanasa kitok;

⁵ore pee elaikino aatoning'unoto o Onia nelo enetii Apollonio le Tarso, Olgafanai le Soelesiria o Foinike.

⁶Nejoki, keeti imasaa kumok olbene le nkaji e Nkai nemeidimayu ninye pee eikeni; ore naa amu imeyiuni nena pisai te nkaraki inkishoorot keidimayu pee epiki inkaiki olaiguanani.

⁷Ore pee etumo Apolonio o laiguanani, neliki inaipirta nena pisai, naitanap olaiguanani Eliodoro, pee eyaki nena pisai.

⁸Nedumunye Eliodoro alo eneiriwayioki, kake eitakune ninye anaa kegira aing'or inkariak naaitobiraki kake esiaai olaiguanani egira aitabaya.

⁹Ore pee ebaya Yerusalem neitomon olapolosani kitok le ina anasa, nelimu enyeuo aing'oru neikilikuanu tenaa kesipa nena natolikioki.

¹⁰Nejoki olapolosani kitok eetae apa impisai naatipikaki eneshumishoreki e nkaji e Nkai, kake ore embata e nena pisai naa inoo nkolia o nkera okishin,

¹¹ore nkulie naa imaasa e Hirkano olayioni le Tobia, oltung'ani yioloti oleng.

¹²Neponaa ajo imeidimayu katukul pee einyali iltung'ana ootipika osiligi lenye esinyatisho o eseriani e nkaji e Nkai nayanyitaki te nkop pooki.

¹³Kake ore Eliodoro netejo pee eyakini nena pisai te nkaraki olbene lo laiguanani, anaa enaitanapishe olaiguanani.

¹⁴Nerreten enkolong nalo e nkaji e Nkai aitasheiki nena pisai. Neyau entorroni sapuk oleng to lkerenket pooki.

¹⁵Nebatata ilapolosak kituaak te dukuya olperere eishopito ilkilani lenye le mpolosare neomon Enkai metorripo nena pisai amu eishorua enkitanapata pee erripi nena pisai iltung'ana ooti enkaji e Nkai.

¹⁶Ore pooki oing'or olapolosani kitok nepiki olbae oltau lenye neibelekenya emua enkomom enye neibalayu emion oltau lenye.

¹⁷Neiput enkuretisho, oloputukunyi lelo pooki ooing'ura neitu eisudori enkuretisho oltau lenye.

¹⁸Nepuku iltung'ana too nkajijik enye te nkisosion, nepuo aaboita te nebo o lapolosak kituaak te nkomono te nkipirta e nkaji e Nkai pee meisarkionieki.

¹⁹Ore inkituaak neishop ilkuniyiani too lgoitie lenye neiput olkerenket. Ore intoyie naatii atua aji nekuet apuo inkishomin, ore inkulie nekuetiki isunta ore inkulie neing'orisho too lusien

²⁰neibung'a inkaik eing'or keper neomon Enkai.

²¹Ore te sipata osina sapuk tenidol olapolosani kitok etig'ilig'ile oltau neeta emion sapuk, nidol iltungana pooki enyamal neirrag te nkop.

²²Ore eipotito Olaitoriani pee etum atorripo ina naisilig'ie ninche nerrip sii lelo ooisilig'ie,

²³neas Eliodoro anaa enatumutaki.

²⁴Ore pee ebau Eliodoro o larripok lenyena enetii imasaa, neyau Olaitoriani loo nkiyang'eta e pooki Keper o nkidimat pooki enkias enking'asia; ore pooki otetema ajo ajing tenebo o Eliodoro neiputukuny neishunye engolon to seseni lenye te nkuretisho.

²⁵Ore teina kias nedol embarta o lakedoni lenye. Neeta embarta enchipai neitureisho olakedoni le mbarta. Ore te rishata dorrop near embarta Eliodoro too nkejek enyena e dukuya.

²⁶Neipang'u ilbarnot oaare oata eng'olon e nking'asia neishopito ilkilani le nkitoo, neipang'aki Eliodoro neitashe obo te tatene neitashe olikae te kedianye; neidong Eliodoro.

²⁷Nebatata Eliodoro neiterre. Nedumu iltung'ana lenyena nepik erruat ooltamweyia,

²⁸neipang'ieki boo. Ore terishata dorrop netijing'ua ele tung'ani iltung'ana lenyena kumok, neti ilarripok lenyena pooki, kake egirai aaipang'ie te rruat oltamweyiai. Neibalie iltung'ana enkidimata kitok e Nkai.

²⁹Ore teina oshoto naing'uaa e Nkai neirag Eliodoro enyamal, nemeidim airoro nemeeta osiligi le nkishiunoto,

³⁰neisis Ilyahudi Olaitoriani anaa enataasa terishata oo laisinak. Ore enkaji e Nkai apa naiputa iltung'ana ooiputa enkuretisho, neiput enchipai sapuk.

³¹Neomon ilchoreta le Eliodoro Onia, olapolosani kitok pee eitung'uaa batisho e keeya.

³²Neitayu olapolosani kitok enkishooroto to siligi ejo keidim Enkai aishiunye Eliodoro, amu meyieu apa neyiolouni aajo Ilyahudi apa ootasa ina kias.

³³Ore egira Onia aitayu ina kishooroto, ore iladuoo barnot oaare eishopo ilkilani lenye neitoki aaipang'aki Eliodoro nejo: “Inchoo enashe sapuk olapolosani kitok; amu te ninye eitajewuo Olaitoriani enkishui ino.

³⁴Tadamu inchere Enkai e shumata nikintamio. Inyo shomo, niliki pooki ng'ae eneba eng'olon Enkai.” Ore pee eidip atejo nena, neimin iladuoo barnot.

³⁵Neitaiki Eliodoro Enkai olasar neitayu inkisiligat kumok, amu etomituo Enkai enkishui enye. Neisho olesere Onia nerrinyokino olaiguanani o enjore enye.

³⁶Teine etolikio pooki ng'ae enaitaasa Olaitoriani Enkai naata enkidimata too nkaitin pooki.

³⁷Ore pee eikilikuan Olaiguanani Eliodoro ajo aing'ae oltung'ani oisul pee eirriwa Yerusalem newaliki Eliodoro

³⁸ajoki, tenaa iyata olmang'atinta aashu iyiolo ologira aipiru entorroni tialo enkitoria ino, irriwai ninye, naa kerrinyunye etaraki oleng tenaa kerrinyunye doi ninye amu ketii eng'olon Enkai ine wueji.

³⁹Ore Enkai e Keper nerrip ina aji enye neidaikie pooki ojo ainyal.

⁴⁰Kuna nataasate te nkishui e Eliodoro o karsisisho narripi te nkaji e Nkai.