Read Maasai Bible – Biblia Sinyati 2 Ilmakabayo 4 Bible Online

2 Ilmakabayo 4 - Maasai Bible – Biblia Sinyati bible

2 Ilmakabayo 4

¹Ore Simion oimakaki te dukuya aa ninye otolikio Apolonio impisai neyau enyamali enkop pooki, netelejishe sii too naaipirta Onia, nejo ninye apa otaara Eliodoro neyau enyamali natusujua,

²etetema aitang'or Onia ejo etigilunore enkitoria, Onia apa oishorua inkishoorot te Yerusalem, netorripo sii enkaji e Nkai neing'ura sii ajo etusujaki inkitanapat pooki!

³Neitagol Apollonias olayioni le Menesteus, olgafanai le Siria, Simion te mbae ake pooki enkarruisho nataasa neponari eng'olong'u e Simion near iltung'ana metuata.

⁴Etayiolo Onia eneba entorroni nayeuo.

⁵Nelotoki olaiguanani neme pee eitang'or iltung'ana lenyena, kake te dupoto oo lyahudi pooki, te nkishui enye maate oe nepooki nga'e.

⁶Etayiolo ajo ore meetai naboisho te nebo olaiguanani nemetumi osotua enaata eshomo dukuya Simion te modai enye.

⁷Ore te siadi neye olaiguanani Seleusus neaku Antioko olaiguanani, Ore Yason olalashe le Onia neaku olapolosani kitok te nkoitoi e nkowuarisho.

⁸Nelo aduare olaiguanani neisho rratilini inkalifuni tomon oaare le nkosholai, neitoki aisiligie kulikae ratilini inkalifuni are o iip naapishana naaitoki alak te siadi.

⁹Neitoki ake Yason aponiki olaiguanani ratilini inkalifuni imiet e nkosholai pee eitobirie ewueji neiteng'enare iltung'ana ooti neitaa iltung'ana le Yerusalem iltung'ana le Antiok.

¹⁰Nenyorraa olaiguanani nena pooki. Ore ake pee eaku Yason olapolosani kitok neitung'uaa iltung'ana le Yerusalem olkuaak lenye neiteru aasuj olkuaak loo Lgiriki.

¹¹Neiteru Yason aing'uaa inkoitoi pooki oo Lyahudi naaishoruno te Yohana, menye Yupolemas, onyaaka alo aitayu olning'o o Roma. Neitoki Yason aitung'uaa olkuaak lang o Lyahudi, neiteru olkuaak ng'ejuk ogilunore inkitanapat ang.

¹²Neshet ewueji enkiguran te nkalo e nkaji e nkomono, neitukuj ilbarnot pee esuj olkuaak loo Lgiriki.

¹³Ore te nkaraki entorroni e Yason olapolosani kitok lemeure Enkai nesapuku entonata e nyorrata olkuaak loo Lgiriki neponari esujata olkuaak loo loreren.

¹⁴Ore ilapolosak neitu eitoki aata enyorrata esiaai enye. Etemenaitie ewueji sinyati neitu eitoki aaitayu ilasarri, ore pee eiteruni enkiguran nekuet aapuo aadala te wueji enkiguran netanya inkitanapat ang.

¹⁵Eitu eshilaa ae toki apa naata tipat to loo nkakui lenye kake etishilaitie imbaa oo Lgiriki ake.

¹⁶Naa ena nataa enkiterunoto oo nyamalaritin enye pooki, amu ore lelo tung'ana ootang'uarra olkuaak lenye neitamae neibelekenyate aaku ilmang'ati.

¹⁷Aitorrono oleng te nimenaa inkitanapat Enkai anaa enilo adol too naasuju.

¹⁸Ore nabo olong egirai aadala to lkerenket le Trisa te dukuya olaiguanani,

¹⁹neirriu olarruoni Yason iltung'ana olkerenket le Trisa ooing'uaa Yerusalem oata impisai inkalifuni tomon te nkaraki olasar oishori enkai naji Herkule. Kake eitu ninche edol iltung'ana aajo keishaa pee easishoreki impisai naaba neijia te nkaraki olasar,

²⁰neaku ore kuna pisai naa inaaishorieki Herkule olasar, nebelekenyi ainyang'unye imelin olarrabal.

²¹Ore pee eirriwari Apolonio olayioni le Menesteo Misiri meshomo osirua oputieki Filometori aitaa olaiguanani neyiolou Antiko ajo kegira Filometori agilunore, netum Antioko olng'ash tialo erripoto nkitoria enye, nelo Yopa neitoki alo Yerusalem.

²²Neng'amu Yason o ltung'ana le Yeruaslem Antioko te nkanyit sapuk o te nchipai nelo Foinike o enjore enye.

²³Ore etulusoitie ilarin okuni, neirriwaa Yason Menelao olalashe Simon meyaki impisai olaiguanani neitabaya esiana oo mbaa naata tipat.

²⁴Ore pee eitashe Meneleo te dukuya olaiguanani, neitoduaya enkitoo enye neishoru impisai inkalifuni tomon naalus inaaishorua Yason pee eitaae olapolosani kitok.

²⁵Ore pee eidip atang'amu enkitanapata olaiguanani nerrinyo meeta enkisisa olapolosani kitok, kake etorrinye eeta engoro torrono anaa eng'ues entim.

²⁶Ore anaa enatooruo Yason olalashe lenye enkitoo empolosare te lejare, neijia ake sii eikunaki ninye, neisikaki enkop oo Lamoni.

²⁷Neaku Menelao olapolosani kitok kake, eitu elak impisai anaa enaisiligie olaiguanani.

²⁸Kake eshomo dukuya Sostato olkitok le Yerusalem aikilikuanu impisai, amu esiaai enye pee eiturrur nena pisai neipoti pokira oaare too mbaa naaipirta isiaai oo mpisai.

²⁹Neisho Menelao olalashe lenye oji Lisimako enkitoo oloti lo lapolosani kitok neisho Sostato ilo orika Kirate olkitok le enjore le Kupro.

³⁰Ore teina rishata netumi larrabali too lkerenketi le Tarso o Malo, amu eishooyie olaiguanani nena anas aisho Antioka enkapiani enye.

³¹Neipang olaiguanani asiooyo aitoborr imbaa te Kilikia neing'ueki enkitoo Androniko obo loo lkituaak lenyena sapuki.

³²Nedamu Menelao ajo enoto erishata sidai nepurroo imaasa e saabu e nkaji e nkomono neisho Androniko, ore inkulie masaa nemiraki Tiro o lkerenketi le latia e Tiro.

³³Ore pee eyiolou Onia ina kias, neisikaki e nkaji e nkomono natii Dafne nanyikita Antiokia, neboloo Menelao te umata.

³⁴Neilejilej Menelao Androniko metaara metua Onia. Nelotoki Androniko Onia nelej to rorei le shoruetisho oe nkisiligata naisiligie ninye eseriani. Kake keetayie Onia olng'ash Androniko. Ore te siadi neipang'ie Androniko Onia te nkaji e nkomono teine netii eseriani, near ninye metua eitu eitoki ajo ayiolou esipata.

³⁵Neitagor oleng Ilyahudi o loshon kumok enarata nemetii esipata e Onia

³⁶Ore pee eshukunye olaiguanani te Kilikia nepuo Ilyahudi agilunore enarata e Onia neitodolu sii ninche Ilgiriki engoro e ntorroni enye tialo ina torroni.

³⁷Neisinanuo olaiguanani Antioko nenyamalu nebuku ilkiyio too nkonyek enyena edamu eneba eng'eno o lkuaak sidai le Onia.

³⁸Negoro oleng Antioko nepolos ilkilani le nkitoo le Androniko neoru ninye inkilani neton meishopo, neitamanaa to lkerenket o meitabai enetarie Onia metua near sii ninye teine. Inji eikuna Olaitoriani aisho Androniko enkitamioto naishiaakino.

³⁹Ore teina rishata neret olalashe le Menelao, Lisimako, ilo apa otaasa imbaa kumok engolong'u to lkerenket nepurrorri imaasa kumok e saabu te nkaji e nkomono. Ore ake pee eibulaa ilo omoni neiturrurro iltung'ana too lturrurri neiteru aiturrurro aagilinure Lisimako.

⁴⁰Neiput engoro ilo turrur loo ltung'ana. Nerik Lisimako enjore o ltung'ana inkalifuni uni ooata enareta pee eidapash lelo turrurri nerikito Aurano ina jore naa moruo ninye naa moruo sii eng'eno.

⁴¹Kake ore ake pee eyiolou Ilyahudi aajo eterretene Lisimako pee earare nedumu, isoito o siaren nenang Lisimako te nebo o enjore enye.

⁴²Netum ilbaa enkumoi enye, neye esiana, neilanyisho embata. Ore Lisimako makewan olapurroni le nkaji e nkomono neari te mbata olchumati le nkaji e nkomono.

⁴³Ore te nkaraki kuna baa pooki naatasate neibung'i Menelao pee eitang'ori.

⁴⁴Ore pee elotu olaiguanani enkanasa e Tiro, neirriu ilkituaak loo Lyahudi le Yerusalem iltung'ana okuni meetu aaitang'or Menelao

⁴⁵Kake ore pee edol Menelao ajo keidimuni nerop Tolemai, olayioni le Dorimene pee etum ailejileja olaiguanani.

⁴⁶Neomon Tolemai olaiguanani pee eipang aapuo boo tenebo, neomon pee eibelekeny ndamunot enyena

⁴⁷neibalunye ajo meeta Menelao entorroni nataasa, nelakuni Menelao hoo naa ninye oyaua enyamali pooki kake ore iladuoo tung'ana okuni lemeeta entioto nedung'okini enkig'uana e keeya.

⁴⁸Ore naa lelo oiroro engorito olkerenket o nkanas o maasa sinyat nedung'okini enkiguana metii esipata.

⁴⁹Neitagor oleng iltung'ana le Tiro ina torroni, neitodolu enkanyit enye nenukaa lelo meneng'a te nkanyit.

⁵⁰Ore te nkaraki enyorrata oo mpisai le ilo otii enkitoo nebik Menelao te siaai enye, eponaa entorroni neaku olmang'atinta loo ltung'ana lenyena.