Read Maasai Bible – Biblia Sinyati 2 Ilmakabayo 5 Bible Online

2 Ilmakabayo 5 - Maasai Bible – Biblia Sinyati bible

2 Ilmakabayo 5

¹Ore tena rishata nerasaki Antioko le ong'uan Misiri erasakinoto e are

²Nedol iltung'ana le Yerusalem induaat too nkolong'i artam nedol enjore oo mbartan naaijo saabu epuoito to loing'ang'e. Ore ilarewak loo mbartan neeta ilalema o remeta.

³Neitashe pooki eterretenate to larrabal. Neosho ilong'oi o remeta neng'orori remeta o mbaa nedoli mpukunot o nareta o larrabal nedoli mbartan o larrabal

⁴Neomon pooki ng'ae paa ore ena duaata neaku olmonokie sidai loo mbaa sidain.

⁵Ore pee edumunye olkilikuai le mesipa inchere etua Antioko, nedumu Yason ilewa enkalifu nabo nerasaki Yerusalem. Nerrinyi iltung'ana siadi apa oterretenate too sunta e nkanasa, neibung Yerusalem. Neisik Menelao aisudori te nkalo oldoinyo le nkomono

⁶Ore earita metuata Yason o ltung'ana lenyena meeta olng'ur iltung'ana loo Lyahudi neitu eyiolou ajo te neidaikie iltung'ana lo losho lenye naa entoki torrono oleng. Kake ewa apa ninye anaa ilmang'ati earare kake olosho lenye.

⁷Kake eitu eya Yason enkitoria, neisikaki enkop oo Lamoni neyaki engolong'u enye enkurruna.

⁸Ore te siadi nenoto Yason enkiting'oto torrono, neen Yason olkitok lo Larabu oji Areta amu etejoki alarruoni Yason neibayuni amu etudoyie apa ninye olosho lenye, negira apa pooki ng'ae aingoru Yason neilanyisho eiloiki ilkerenketi neisikaki Misiri,

⁹ore tesiadi neilanyaki Lakedemonia eisiligu ajo keng'amari anaa olaisikani te nkaraki enkiba naata ninye tialo Lyahudi. Nee Yason anaa olaisikani too nkuapi eeiking'a olapa oitanyamala iltung'ana meisikaki nkuapi.

¹⁰Etara apa Yason iltung'ana kumok neing'uaa eitu enukaa, nee sii ninye neitu etumi oltung'ani oishiraka neitu enukari neitu etum erishata too nkuraren o loo nkakui.

¹¹Ore pee ening olaiguanani enaataasate te Yerusalem nejo ninye ke Yudea pooki natogolongua. Ore te ngoro napi neipang te Misiri nerasaki Yerusalem

¹²neitanap isikarini lenyena pee ear pooki nga'e onang'are metii olng'ur nesesekuan lelo pooki oopuo atua nkajijik.

¹³Neari metuata ilooti o lbotorok, neari ilayiok o nkituaak nedung'i ilgoso ntoyie nemeyiolo ilewa o nkeera kutiti.

¹⁴Ore tiatua nkolong'i uni neiturraa Yerusalem iltung'ana inkalifuni ntomoni siet, inkalifuni artam etaraki eitasheikinoi, o esiana narisiore ina oowaki eyararoto.

¹⁵Kake ore amu eitagolo Antioko elukunya nejing atua enkaji enkomono sinyati aisul pooki erikito Menelao ilo apa aitagoroni loo nkitanapat e nkop enye

¹⁶neya imasaa sinyat too nkaik enyena naaidurruk o inkishoorot naaishorutua kulikae aiguanak pee eponari enkanyit o enkitoo te nkaji enkomono.

¹⁷Neiput Antioko enchipai sapuk te nkaraki emirishoi enye natimirishe neitu eitoki ayiolou ajo Olaitoriani ake makewan otonyorrayie enkaji enye sinyati enkomono meidurukieki te nkaraki ing'ok oo ltung'ana le Yerusalem.

¹⁸Naa te neitu apa eas iltung'ana le Yerusalem nena ngok kumok anaata eitu eitamei Antioko te siokinoto nerishieki pee meas ake enkias e modai naijo ena nataasa.

¹⁹Kake eitu apa egelu Enkai olosho te nkaraki ewueji sinyati kake ewueji sinyati etegelua te nkaraki olosho.

²⁰Neng'arr enkaji e Nkai o ltung'ana osina, kake neitoki ang'arie karsisisho. Etung'uayie Enkai inakata pee egoro, kake etorrinyokine pee edoyio engoro enye.

²¹Neya Antioko te nkaji Enkai ratilini le nkosolai enkalifu ntomoni ile o are neisarisar alo Antiokia to lwuasa lenye, nejo ninye keidim emelini aashom te nkop natoyio, ore isikarini nepuo too nkejek aaporoo enaiposha.

²²Negelu Ilgafanani ooitanyamal iltung'ana te Yerusalem. Etipikaki Filipo le Frugia arruoni oleng alang Antioko.

²³Ore to ldoinyo le Gerisimu nepik Androniko. Netii sii Menelao ilo apa oitaasa Ilyahudi entorroni aisul Ilgafanani pooki. Keiba apa Antioko Ilyahudi oleng,

²⁴neya Yerusalem isikarini lo larrabal inkalifuni tikitam oaare oing'uaa Misia tiabori enkitoo oltung'ani oji Apolonio neitanapisho pee eari iltung'ana pooki nemirakini ilkulikae rindikisho inkera o nkituaak.

²⁵Nebau Apolonio Yerusalem ejo osotua ninye eing'oru. Ore te nkolong e nkiyeng'iyeng naji Sabato, egira Ilyahudi pooki aayeng'iyeng'a neitanap isikarini lenyena lo larrabal meibung'a enareta nerretena tiong'ata olkerenket.

²⁶Neitanap pee ear metua pooki ng'ae opuku to lkerenket aing'or lelo sikarini. Ore te siokinoto nejing atua ina anasa near iltung'ana kumok metuata.

²⁷Kake ore Yudas olmakabayoi o kulikae oobaya ooudo neisik apuo oldoinyo nepuo aamany anaa nguesi e ntim pee meidurukie ake ate nenya inkaitubulu entim ake.