Read Maasai Bible – Biblia Sinyati 2 Ilmakabayo 6 Bible Online

2 Ilmakabayo 6 - Maasai Bible – Biblia Sinyati bible

2 Ilmakabayo 6

¹Ore te rishata nemeedo, neirriwaa olaiguanani olee obo meirorie Ilyahudi metung'uai nkitanapat o lomenye neing'ua sii nkitanapat e Nkai,

²neisarkionie enkaji e Nkai te Yerusalem neipot ajo “Enkaji e Seu,” enkai e Olimpia. Enkaji natii apa enchumata oldoinyo le Gerisimu naipotoki ajo enkaji e Seu, Enkai e leng'on anaa enatejo iloomanya pee eipoti ajo neijia.

³Netorronu oleng enkirronya natusujua nemenyorrarroyu

⁴neiput iloreren enkaji e Nkai e nkomono o mpukunot kumok e nkowuarisho. Neiput imulayoni enkaji e Nkai nkomono ore ntokitin apa natanyaki te nkaji e nkai neitinjing'uni e nkaji e nkomono,

⁵neimulumul olperere ilasarri lemeishakino otanyaki to nkitanapat.

⁶Eitu eitoki adamu ashipakino Sabato ashuu isiruai lo loo menye neitu eitoki aibalunye ate ajo Ilyahudi.

⁷Ore to lapa pooki, etae osirua le inoto o laiguanani neerakini Ilyahudi meinosa inkiri enkoshoke o ng'uesi o lasari. Ore to rishat o sirua le Dionisio, Enkai e divai, neyieuni neishop inkopiyani e nkitoo to lukuny enye neidikidiko to lamal.

⁸Neitayuni enkitanapata to lkerenketi lo Lgiriki pee enya ilasarri

⁹near metuata Ilyahudi pooki lemenyorra aibelekenya asuj olkuaak lo Ilgiriki. Neitodolu ajo egira alotu enkata engoloto.

¹⁰Etudung'okoki enkiguana nkituaak are naibung'aki etumurata inkera enye. Neitamanari too lkerenketi eililio eibung'ita ikii lenye, nenang'uni te suntai naado.

¹¹Ore kulikae ooiturrurrote to nkapunia nataana, pee etum aibunga enkolong e napishana, neudori neyiolou Philipo nepeji tenebo, amu etojo ninche matangor ate teina olong sinyati aisul.

¹²Aitanap naa lelo ooisum ena buku pee megila iltauja to mbaa o sina naataasate naitureisho, kake pee eyiolou ajo ore ina kitamioto naa eneutaroto ake kake mme pee eidaikie ninche.

¹³Ore enkitamioto oltungani kiminati naa olmonokie lo lgurr sapuk, alang tenepalari te rishata naado eitu eitamei.

¹⁴Amu ore tolkulikae oshon na kengirri Olaitoriani eitu eitame ometabaiki emborei oo ng'ok enye; kake eitame ninye iyiook eitu kias ing'ok;

¹⁵pee meitoki ake aitalaku elap tenekumoku ing'ok ang.

¹⁶Meiuwang'ie aikata ninye olngur lenye te yiook. Hoo neitame iyook to mpaldaka, merikino aikata iltungana lenyena.

¹⁷Atolimuo kuna baa pee eaku enkitadamunoto. Matoning'u naa enkatini.

¹⁸Etae apa olaiteng'enani kitok oyanyiti to nkitanapat oji Eliasa otarakaki meinosa ilbitiro.

¹⁹Kake etonyorayie keeya alang enkishui naisarkenio. Nenotu inkiri nelo inewueji olosilisili,

²⁰neitodolu empijan eanyata o ndaiki naiduruk, hoo duo neidim oltungani aiturai enkishui.

²¹Ilchoreta apa le Eliasa ilaitaisheikinok lo lasar oiduruk nejoki ninye to nkisudorot pee eyau nkiri nasinya neishia pee enya neitakuno keinosita nena kiri apa natejo olaiguanani pee enya,

²²pee eidimayu nekorduni te keeya, neitasi esidai amu ilchoreta ninche.

²³Nemut nabo Eliasa nanarikino olpayian kitok. Ore e nkerai neibung'a inkitanapat sinyat e Nkai, newal ninye nejo, “Entaraki matua tene tenakata.

²⁴Ore oltungani kitok ana nanu naa enkurruna te nelejisho enabanji. Pee melo ake nejo ilbarnot atomikio enkirukoto ai o larin ntomoni naudo.

²⁵Tenalo aitakuno kainosita kuna kiri naiduruk pee abik aishu nayaka keon enkurruna e sulare neitapongori ilbarnot kumok.

²⁶Amu ore tenabik atapashare enkitamioto o ltung'ana ooishiaakino, nemaidim ailanya enkaina Enkai ilo oata engolon naisho enkishui.

²⁷Tenaaye nanu ara ololarin kumok, naitodolu ajo kanarikino enkito ai

²⁸neitodolu enkitanyanyukoto sidai naishakino ilbarnot pee eibung inkitanapat sinyat neenyit.”

²⁹Ore iladuoo shoreta ota ilchoreta lenyana te rishata dorop neibelekenyakino ninye amu etejo ninche eiroro ana olmadai.

³⁰Neidong, ore etaa keeye, nebuaku Eliasa nejo, Keyiolo Olaitoriani pooki. Keyiolo ninye ajo enata eitu atum olosilisili obanji o keeya. Keyiolo sii ajo atingiria kuna pooki te nchipai amu aserem nanu ninye.

³¹Neijia apa eikununo keeya e Eliasa. Nedamuni keeya o empijan enye neeku enkitanyanyukoto neme tolbarnot ake kake to losho olulunga.