Read Maasai Bible – Biblia Sinyati 2 Ilmakabayo 7 Bible Online

2 Ilmakabayo 7 - Maasai Bible – Biblia Sinyati bible

2 Ilmakabayo 7

¹Ore tiae rishata neibung'i enkitok oo Lyahudi o layiok lenyena oopishana. Neitayu olaiguanani enkitanapata pee eidong'i neerakini meinosa inkiri enkurue.

²Nejo olayioni obo: “Kainyioo igirara aaisiligu ajo itumutumu tena niasitata? Kiteretenate iyiook pee kiye alang tiniking'uaa olkuaak loo loo papa.”

³Neitagor olaiguanani kulo rorei neitanapisho pee epiki imotiok enkima.

⁴Neepiki imotiok enkima, nejo pee edunguni olng'ejep lo layioni oiroro nedotuni ochoni le lukunya nedung'i inkaik o nkejek enyenak engorita ngotonye o lalashera lenyena ile.

⁵Nedungidungi irubat enyenak ometeleku erubata e nkiringo naishu. Neitayu olaiguanani enkitanapata pee eyai ilo ayioni neitadoikini emoti nabo. Ore egira empuruo apuku teina kima, neitukuja ilalashera ile o ngotonye pee eyee te mpijan ejo,

⁶“Keingorita iyiook Olaitoriani Enkai naa ore te sipata neeta olngur te yiook, ana enaibalie Musa to sinkolio lenye eisikong lelo oituraitie Olaitoriani. Nejo, ‘Keingurie Olaitoriani lelo oisiai ninye.’ ”

⁷Ore pee eidip atua olalashe le dukuya, neiteru isikarini adotu ilpapit o lchoni le lukuya lo lalashe liare neikilikua: “Inya kuna kiri enkurue, aashu iyieu nikidungudung iyie inkaik o nkejek?”

⁸Newaliki olayioni te nkutuk o lopapa lenye, “Imanya aikata pii!”. Neisilsil isikarini anaa enaisilsilo olayioni le dukuya,

⁹ore eta kedungo tau nejo, “Intae ilarak! Indimidimi atar iyiook matuata, kake keitopiu iyook olaiguanani le shumata to lotuata neisho iyiook enkishui o ntarasi, amu kituata kimbingita inkitanapat enyena.”

¹⁰Neitoki asuju oliokuni, ore pee ejokini meitarasu olngejep lenye, neitarasu te siokinoto. Neitarasu inkaik enyena te mpijan

¹¹nejo te mpijan, “Aaishoo nanu Enkai ena. Kake inetipat inkitanapat enyena te nanu ilang inkaik ainei, naa kayioolo ajo kaitoki Olaitoriani arinyoki.”

¹²Neigasia Olaiguanani tenebo oloboitare te mpijan eilo ayioni, ewa ninye ili osilisili ana empesho.

¹³Ore edungo tau, neitoki ake aisilisil olayioni lionguan anaa enaikuna iledukuya,

¹⁴kake ore irorei lenyena obayie nejo, “Kashipa tenaye to nkaik inyi, amu kiata enkitisipata ajo keitopiu iyiook Enkai to lotuata. Keke meetai empiunoto enkishui ontarasi teyie, Atioko!”

¹⁵Neitoki isikarini aibung olayioni le mmiet neisilisil,

¹⁶neingor asipu olaiguanani nejo, “Te nkaraki niata enkitoria tialo iltungana, nira ake oltungani, kake midamu taa ajo etunguayie Enkai iltungana lang.

¹⁷Tareshu akeyie. Aikisilisil Enkai te ngolon enye o eishoi ino.”

¹⁸Neitoki aibung olayioni le ile, ore eitu edungo tau nejo, “Emilej ate. Kigira ayimaa olosilisil te nkaraki nikitasa engoki tialo Enkai ang. Ina pee egira kuna baa torok aasa tialo iyiook.

¹⁹Kake emidamu ajo meitamei intae te nkaraki nitetema arare Enkai.”

²⁰Ore ngotonye neingasiaisho alang ilayiok lenyena opishana, neishakino nedamuni ninye. Etoduaka ninye ilayiok lenyena opishana keya te nkolong nabo, nengiri ninye te mpijan sapuk amu eisiliga ninye Olaitoriani.

²¹Neitukuj ilayiok lenyena te nkutuk olo papa lenye, nepudie magilano enye o empijan o lewa.

²²“Imayiolo eneiterunore enkishui ino te nguset ai, imenanu naisho enkishui naram tenebo irubat osesen lino.

²³Enkai natasa, Enkai naitobira enkop o oltungana o pooki naiseuseu. Kebore ninye olngur naa aikirinyoki iyie enkishui nintoki ayang aigil amu itonyora inkitanapat enyena alang eninyor keon.”

²⁴Neitadedeyie Antioko ajo kegira ena kitok ayiet ninye, nenyok oleng aitungua olayioni otii, oishuu pee eingua inkitanapat olo menye. Neisiligie te nkinosata olmumai pee eisho imasaa kumok o reshata sidai, neisho enkito o engolon neita olchore lenye.

²⁵Kake eitu einining ninye, netem Antioko ailejilej ngotonye enkayioni pee eirorie enkayioni enye pee ekordu enkishui enye

²⁶nenyora enkitok pee eirorie enkayioni enye pee enyora.

²⁷Neiteleikino ngotonye enkayioni enye, Nelej Antioko neirorie enkayioni enye te nkutuk oo loo papa lenye, “Ingurieki olayioni lai. Tadamu ajo atanapa te nguset ai ilapaitin oudo naibung ilarin okuni. Ataramata to yieunot inonok pooki ometabaiki tata ena olong.

²⁸Kaomon enkerai ai, ingura sii iyie oloingange o enkop. Ing'ura pooki toki nidolita, niyiolou ajo Enkai naitobirua pooki ana enaitobirua iltungana.

²⁹Miureishoyu. Inchoi enkishui ino te yieunoto nintoduaya keon ino ajo keishiakino pee iyee ana ilalashera linono, paa ore tolngur le Nkai nangama ntae te nkolong empiunoto.”

³⁰Ore eitu eidip airoro nejo enkayioni, “Olaiguanani Antioko kainyo iyanyita iyie? Atanya aning inkitanapat inono. Inkitanapat ake airuk e Musa naisho ninye ilopapa.

³¹Itadamua imbaa pooki torok nintas iltungana lang, kake milany enkitamioto nikitushumaka Enkai.

³²Kesipa ajo ore Olaitoriani lang oishu netagore tialo iyiook neitame iyiook te nkaraki ingok ang, pee etum atarerioi neitame iyiook.

³³Kake enenkiti rishata, amu eton kira isinkan lenyenak, naa kepalaki iyiook.

³⁴Ira iyie arruoni aisu to ntokiting pooki naishu. Milej keon ajo iyaku kitok, nigira aitame iltungana le Nkai.

³⁵Meeta eninko pee ipashare enkitamioto to nkaik e Nkai nata engolon nedolisho.

³⁶Etamio ilalashera lainei te nkaraki esipata naitasheito te Nkai neti tenakata enkishui o ntarasi. Kake ibatatakino enkiguana Enkai nikintamei terisioroto entoroni ino.

³⁷Aishorua nanu enkishui o sesen lai terisioroto o nkitanapat olopapa anaa enatasa ilalashera lainei. Kaomon sii Enkai pee eitodolu olngur lenye toltungana lenyenak te siokinoto neitame intae o embalie ajo ninye ake Enkai.

³⁸Metaa nanu olalashera lainei ebayie engoro e Nkai nayewuo shumata enkop ang.”

³⁹Neitagor Antioko oleng kulo rorei neisilisili enkayioni te nkoitoi enkarueisho alangu ilalashera lenyenak.

⁴⁰Neye enkayioni eisiliga Enkai nebik asipani to Laitoriani.

⁴¹Neitoki aye ngotonye etuata ilayiok lenyenak

⁴²Atolimuo naipirta Ilyahudi eisilisilitoi nerakini meinosa inkiri enkoshoke o nguesi naitayunyeki olasar.