Read Maasai Bible – Biblia Sinyati 2 Ilmakabayo 8 Bible Online

2 Ilmakabayo 8 - Maasai Bible – Biblia Sinyati bible

2 Ilmakabayo 8

¹Etudumunye Yudas Makabayo amanaa o lchoreta lenyena omenoto Ilyahudi Inkalifuni Ile ootaa asipak te nkirukoto enye.

²Neomon Olaitoriani metareto iltung'ana lenyena oisisiloki iloreren pooki neduaki olng'ur enkaji e Nkai naisairekenioki

³neing'urie Yerusalem nainyalaki neininig osarge oishirita eingua ninye.

⁴Eikilikuana sii Olaitoriani meitodolu enkiba naiba engoki eitalaku elap lelo pooki otara metuata iltungana lenyena, lelo otara inkera metuata meeta olngur nejo imba enkarueisho tialo Olaitoriani.

⁵Ore pee eidip Yudas ateretena enjore enye neitu eidimayu pee eitaisheikinore Ilmemurata amu ore engoro e Nkai tialo Israel neibelekenye aaku olngur.

⁶Nerasaki Yudas inkanas o lkerenketi nepejo. Neibung inkanas e tipat, netumoki aisulaki te nkewarie. Eyimakita iltungana le nkop pooki empijan enye.

⁷Neyiolou ajo kewarie esidai te rasakinoto. Neimakini empijan e Yudas te nkop pooki.

⁸Ore pee eyiolou Pilipo Olgafanai le Yerusalem ajo kegira Yudas agolu anaa nkolongi netumito enkisulata e anaake, neigeroki empalai Ptolemi olagafanai le Siria kitok eomon pee engor iyieunot enyena e nkito.

⁹Nedumu Potlemi Nikanor olayioni le Patroklas olchore lo laiguanani nerriwa ninye osikarini inkalifuni tikitam lo nkuapi napasha metujutu Ilyahudi pooki te nkop pooki. Enyaka sii Potlemi adumu Gorgia oata enkariyiano to mbaa o sikarini lo larabal pee eiriamari te nebo o ninye.

¹⁰Eta apa olaiguanani Antioko esile o Roma, Neretena Nikonar pee elak ina sile elo amir Ilyahudi oibungi tolarabal ana irrindiki.

¹¹Neiriwa ilkiliku ilkerenketi pooki otii embata enaiposha, nejoki kelo amir Ilyaudi pooki. Kake eitu ninye eyiolou enkiguana natushumaka Enkai ninye.

¹²Neyiolou Yudas ajo egira Nikanor alotoki tenebo o sikarini lenyena Yudea, neliki ilewa lenyena

¹³ore lelo kureti nemeirik Enkai neisik ailanyisho.

¹⁴Ore kulikae nemir imasaa enye pee eikena Enkai ajo iloishakino pee eitajeuni tialo olaruoni Nikanor otimira ninche ana isinkan enton ninye eitu eiterunye olarrabal.

¹⁵Neomon Enkai nejo, tenemeidim Enkai atokordu ninche, naa keidimayu pee ekordu ninche te nkaraki olningo oitobira tenebo o lopapa naa ore Enkai kitok enkingasia neipoto ninche aita iltungana lenyena

¹⁶Neiturur Yudas iltungana lenyena pooki ora inkalifuni ile neitkuj ninche pee mekuretu ashuu eisik ailanyisho te nedol enkumoi esiana olmemurata kake etiaka pee eitashe nerare te mpijan

¹⁷nedamu entoroni natasa ilmemurata tialo enkaji Enkai enaitanyamala Yerusalem neitu eibung inkitanapat Olyahudi.

¹⁸“Nejo Yudas Keisilig ninche imaasa olarabal o mpijan enye,” Kake kisilig iyiook Enkai magilani, oidim aidaikie enkop pooki.

¹⁹Nelo dukuya Yudas aitadamu inkoitoi nataretie Enkai ilopapa lenye: ore te rishata e Senakarib neidaikieki ilmangati inkalifuni iip nabo ontomoni siet omiet (185,000),

²⁰ore te Babilon neponu Ilyahudi inkalifuni siet (8,000) akordu iltungana inkalifuni onguan (4,000) le Makedonia nemir inkalifuni iip nabo otikitam (120,000).

²¹Neitagol irorei le Juda ilewa lenyena nemut pee epik enkishui enye bataa te nkaraki enkirukoto enye neor enjore enye katitin onguan.

²²Neitoki aut ilalashera lenyena, Simion, Yosef o Yonatan pee etum aitasheiki oltungani obo enjore o ltungana enkalifu nabo o ipmiet.

²³Ore pee eidip aikilikuana Eliasa meisuma embuku sinyati neisho ilewa lenyena ele rorei lolarabal: “Keretu iyiook Enkai,” nerik enjore edukuya arare Nikanor.

²⁴Ore te ngolon Enkai neer metuata iltungana inkalifuni naudo nepik ilbaa ilkumok neisik enjore pooki olmangatinta.

²⁵Neoru impsai najo ilmangati pee einyangunye aita irindiki. Nemir ninche olamangatinta ore peemutu nerinyunye

²⁶amu eta keiteru esaa e Sabato.

²⁷Ore pee eidip awaita nareta pooki olmangati nepur ilotuata, neshipakino Sabato, neisis Olaitoriani neisho enashe amu etomitwuo ninche neitabaiki enkolong e Sabato, neisis Olaitoriani neisho enashe amu eyaua ninche te seriani teina olong neisho niche olmonokie le dukuya lenye lo lngur.

²⁸Ore pee eluso enkolong e Sabato neisho imasaa nayautua inkolia o nkera okishin; neorr inatelekutua tenebo olmareita lenye.

²⁹Netumo tenebo aomon Olaitoriani oata olngur, eikilikuan Olaitoriani pee erinyokino isinkan lenyena Lyahudi.

³⁰Neitoki enjore oo lyahudi arare enjore e Timoteo o Bakides neer metuata iltungana inkalifuni tikitam. Neibung iwuejitin kumok nenap imasaa enye neor aitoris tenebo o nkolia o nkera okishin o ltungana kituak o lelo pooki oji pee eisilisili.

³¹Nesotu ninche inareta pooki neisudo teneishaa, ore ikulie mali neya Yerusalem.

³²Neer niche ilkitok le njore e Timoteo, oltungani lemeure Enkai oitanyamala Ilyahudi terishata naado

³³Ore egira ashipakino emirishoi eye te nkanasa o lopapa lenye, nepejo eishu iltungana otapejoitie apa ikishomin enkaji e Nkai. Ore ilotuata naa Kalitenes oisudori apa te nkaji kiti, nengamu enkitamioto nanarikino te nkaraki intorok natasa.

³⁴Ore olaruoni Nikanor oyaua ilbiasharani enkalifu nabo meinyangu Ilyahudi,

³⁵nemiri ninye te retoto Olaitoriani ilapa tungana omen ninye aisul. Neiturra ninye irkilani lenyena neisik ailanyisho ana orindik ometabai Antiok. Enotoko ninye aidakie enjore enye olarabal.

³⁶Ore ele lee oyieu nelaki esile enkitoria o Roma ainosie iltungana le Yerusalem, neitodolu ajo imeidimunoyu Ilyahudi. Enkai natomituo ninche amu eibunga neiruk ikitanapat naisho ninche Enkai.