Read Maasai Bible – Biblia Sinyati Matayo 10 Bible Online

Matayo 10 - Maasai Bible – Biblia Sinyati bible

Matayo 10

¹Neipot Yesu lelo ooiteng'eni lenyena tomon o aare, neisho meitoria nearaa iloiriruani ooiduruk, neishiunye sii mpukunot pooki oo muoyiaritin o nkeyaitin.

²Naa kuna nkarn oo lkipaareta lenyena pokira tomon o aare; ole dukuya naa Simon oji Petero, o Andrea olalashe lenye; Yakobo le Sebedayo o Yohana olalashe lenye;

³Filipo, o Bartolomayo; Tomas o Matayo olasotoni le kodi; Yakobo le Alfayo, o Tadayo;

⁴Simon onyor olosho lenye o Yudas Iskariot laa ninye otakaldayie Yesu.

⁵Kulo pokira tomon o aare eirriwayie Yesu neitanap ajoki, “Emipuo nkoitoi oo Loreren, nimijing'ijing'i enkang hoo nabo oo ltung'ana le Samaria

⁶kake enchom enetii ntare kiminat e nkaji e Siraeli.

⁷Ore ipuopuo, entolikioi entejo ‘Etinyikua enkitoria e keper.’

⁸Enchiunye iloomuoi, entopiu ilootuata enchiunye ilooata enkeeya oo lbolot, entaarai iloiriruani. Eishooki intae pesho, enchooi sii intae pesho.

⁹Emishoroo saabu anaa mpisai too lbenia linyi,

¹⁰nimishoroo olbene te lototo inyi, anaa inkilani maare, anaa inamuka, anaa eng'udi, amu keishiaakino olaisiaayiani endaa enye.

¹¹“Ore pooki ang sapuk o enkiti nijing'ijing'i, enkilikuanisho tenaa ketii oltung'ani supat atua, nitonini tenebo ninye o metaba anaa nidumunyenye aapuo.

¹²Naa tinijing'ijing'i enkaji eroroki.

¹³Naa te neitoomoni intae teina aji, nejing osotua linyi shumata ninye, naa te neitu eitoomoni intae, neshukokino intae osotua linyi.

¹⁴Ore pooki ng'ae lemeng'amaa intae, anaa olemening ororei linyi, ore pee ipukuku aaing'uaa ina aji, anaa ina ang, nimpiripiroo enterit natii nkejek inyi.

¹⁵Esipa ajoki intae, keikashieki Sodom o Gomora teina ang te nkolong enkiguana!

¹⁶“Kairriwaa intae anaa nkerra atua suyian, enteng'enita anaa lasuriaa, niborrurru anaa nturkuluoni.

¹⁷Kake entodol ate too ltung'ana amu keishooyo intae meiguanareki neidong intae tiatua nkajijik enye e ntumo

¹⁸Naa keriki intae dukuya ilbalosuni o laiguanak te nkaraki nanu, pee iakuku shakeni te ninche o too Loreren.

¹⁹Kake ore ina kata te nerik intae, eming'aeng'ae aajo, ‘Kaa kijo’, amu keishori intae teina kata enijojo.

²⁰Amu mme intae ooiro, Enkiyang'et e Papa linyi nairo tiatua intae.

²¹“Naa keishooyo olalashe olikae, metaari metua, neishooyo menye enkerai, nedumakino nkera ntoiuo enye neishooyo ninche metaari metuata.

²²Naa keibayu intae iltung'ana pooki, te nkaraki enkarna ai, kake ore olong'iri o metabaiki enkiting'oto nejeu.

²³Naa te nearari intae te nkang nabo, esikaki enkae, amu esipa ajoki intae, miishushu nkang'itie e Siraeli pooki eitu elotu Enkerai e Tung'ani.

²⁴“Melang oloiteng'eni oloiteng'en ninye, nemelang osinka oloitore ninye.

²⁵Keidim oloiteng'eni atotiuo anaa oloiteng'en ninye, netiu osinka anaa oloitore ninye. Pasa taa etejo olopeny enkaji Beelsebul, kebaa eitulusoo aajo neijia lootii enkaji enye!

²⁶“Metaa emiure lelo tung'ana amu meetae embae naisudoyioki nemeyiolouni.

²⁷Ore enajoki nanu intae te naimin embalunye te wang'an, ore enining'ining'i te nkiok, entolikioi too nchumarot oo nkajijik.

²⁸Emiureyu ilo oar osesen nemeidim aatar enkiyang'et, enare ti niureyuyu ilo oidim aidaikie pokira are enkiyang'et o sesen tiatua olbalbal le nkima.

²⁹Ai meinosieki imotonyi are empisai nabo, kake mesulunye nabo aosh enkop, meyiolo Papa linyi.

³⁰Ore ninche intae, eikenaki o metabaiki lpapit loo lukuny inyi.

³¹Ore te nkaraki ina emiureishoyu amu irara ile tipat inkashikasha aalang imotonyi kumok.

³²“Ore naa pooki laaibalie te dukuya ltung'ana, naa kaibalie sii ninye te dukuya Papa lai otii keper.

³³Ore pooki laamiki te dukuya ltung'ana naa kamiki sii nanu ninye te dukuya Papa lai otii keper.

³⁴“Emidamu nijojo kaewuo ayau osotua enkop; eitu alotu ayau osotua, kake olalem ayaua.

³⁵Aewuo nanu airriki olayioni o menye nairriki entito o ng'otonye, nairriki entito o enkaputani.

³⁶Ore lmang'ati lo ltung'ani keaku lelo le nkaji enye.

³⁷“Ore olonyor menye anaa ng'otonye aitalang nanu, anaa olonyor olayioni lenye anaa entito enye pee aaitalang nanu, nemaishiaakino nanu.

³⁸Ore olemenap osalaba lenye naasuju nemaaishiakino nanu.

³⁹Ore ologolie enkishui enye neiminie, ore oloiminie enkishui enye te nkaraki nanu negolie.

⁴⁰“Ore olong'amaa intae, nanu etang'amayie, ore olaang'amaa nanu naa ilo lairriwua etang'amayie.

⁴¹Ore olong'amaa oltung'ani supat te nkaraki naa supat, netum olerrinyore lo ltung'ani supat.

⁴²Ore oloisho obo le kulo ooti, enkikompe e nkare nairobi te nkaraki naa oloiteng'eni lai, esipa ajoki intae, meimin olerrinyore lenye.”