Read Maasai Bible – Biblia Sinyati Matayo 13 Bible Online

Matayo 13 - Maasai Bible – Biblia Sinyati bible

Matayo 13

¹Nepuku Yesu teina olong ti ang, nelo aton te mbata e naiposha.

²Neiturrurrokino iltung'ana kumok, nejing empeut aton, neitashe olorere te mbata e naiposha.

³Neirorie ninye too nkitanyaanyukot ajoki, “Etupukuo olaunoni alo aunisho.

⁴Ore eunisho, nedoiki kulikae anterera embata e nkoitoi, nepuonu imotonyi aanya.

⁵Nedoiki kulikae olkarkar loo soito ewueji nemetii enkulupuoni sapuk, nebulu nabo kata, amu metii enkulupuoni sapuk.

⁶Ore pee edalu enkolong nepej, ore te nkaraki nemeeta ntona netoyu.

⁷Nedoiki kulikae atua ilkiku negor ilkiku nkaitubulu.

⁸Nedoiki kulikae enetii enkulupuoni sidai, neiu obo iip neiu likae ntomoni ile, neiu likae tomoni uni.”

⁹“Oloata nkiyiaa toning'o.”

¹⁰Nepuonu lkipaareta le Yesu nejoki ninye, “Kaji etiu pee irorie ninche too nkitanyaanyukot?”

¹¹Neng'amaa ajoki, “Te nkaraki naishooki intae entayiolo inkisudorot e nkitoria e keper, kake eitu eishori ninche.

¹²Amu ore oloata naa keishori neponikini ninye enadooyo, ore olemeeta neoruni ninye ina naata.

¹³Te nkaraki ina pee airorie nanu ninche too nkitanyaanyukot amu kedolisho too nkonyek nemedol, nening'isho too nkiyiaa nemening, nemejing'aa.

¹⁴“Naa te ninche eitabari enaibon e Isaya pee ejo, ‘Ining'ining'i nimining'ung'u hoo pito, ning'oring'oro, nimidolidolo toki,

¹⁵amu eiroshiutuo iltauja le kulo tung'ana, netiripate inkiyiaa mening, neikeno nkonyek enye, pee medolisho ake too nkonyek enye, nening'ishoyu too nkiyiaa enye, neyiolou ltauja lenye, naaibelekenyakino nanu pee aishiunye ninche.’

¹⁶“Kake emayiana inkonyek inyi amu idolishosho, nemayiana nkiyiaa inyi amu ining'ishosho.

¹⁷Kesipa ajoki intae, kumok iloibonok le Nkai o ltung'ana supati oong'uar apa pee edol kuna baa nidolitata intae, neitu edol, o pee ening kuna baa nining'ining'i intae, neitu ening.

¹⁸“Entoning naa intae enkitanyaanyukoto o launoni.

¹⁹Ore pooki tung'ani oning ororei le nkitoria e keper nemejing'aa, nelotu ilo torrono awuapaa inaatuunoki to ltau lenye. Nena etuunoki te mbata e nkoitoi.

²⁰Ore inaatuunoki to lkarkar loo soito, na elde oning ororei neng'amaa nabo kata te ng'ida;

²¹kake meeta intona makewan, kake keton penyo, ore pee epuonu isinaitin anaa olosilisili te nkaraki eilo rorei nerrorro.

²²Naa ore inaatuunoki tiatua lkiliku, naa ilo oning ororei, neirony isinaitin le na kop, o elejare oo masaa e na kop, negor ororei nemeisho.

²³Ore nena naatuunoki te nkulupuoni sidai, naa ilo oning ororei nejing'aa naa keiu ilng'anayio, aiu obo iip, neiu likae intomoni ile, neiu likae tomoni uni.”

²⁴Neitoki aliki ae kitanyaanyukoto ajo, “Etiu enkitoria e keper anaa oltung'ani otuuno enkano te nkurma enye.

²⁵Kake ore eirura ltung'ana nelotu olmang'atinta aun endiati tiatua enkano, nelo.

²⁶Ore pee ebulu enkano, neiu ilng'anayio nebulu sii ninye eriaa.

²⁷Nepuo isinkan enetii olopeny enkaji nejoki, ‘Lo kitok, keitu iyie iun enkano te nkurma ino? Kaji eing'uaa eriaa?’

²⁸Nejoki, ‘Olmang'atinta lai oikuna neijia.’ Nejoki isinkan, ‘Iyieu nikipuo aadotu aaiturrurru?’

²⁹Nejoki, ‘Emipuo pee midotunyenye eriaa enkano.

³⁰Entapal metubulu pokira are ometaa enkata nadung'i, paa ore enkata enkikesare, najoki iladung'ok entang'as enturrurro eriaa, enteen irridat, entapejoi, ninturrurrokiki enkano olkompe lai.’ ”

³¹Neitoki Yesu aliki ninche ae kitanyaanyukoto ajo, “Etiu enkitoria e keper enaa enkantererai naji karadali natuuno oltung'ani te nkurma enye.

³²Naa kiti ninye alang ilanterera pooki, kake ore pee ebulu neaku sapuk alang inkaitubulu ometaa olchani, omeetu imotonyi aapik nkajijik ilng'osil lenyena.”

³³Neitoki aliki ninche ae kitanyaanyukoto nejo, “Etiu enkitoria e keper anaa enkaisuishoi natudumua enkitok neitushulaki imboreitin uni e nkurma e nkano ometaba anaa neisuishoyu pooki.”

³⁴Einosaka Yesu olorora mbaa pooki too nkitanyaanyukot, neitu hoo einosaki likae rorei metii enkitanyaanyukoto.

³⁵Pee etum atabai enatolimuo oloiboni le Nkai otejo, “Too nkitanyaanyukot abol enkutuk ai, alimu mbaa naaisudoro apa te musano pee eitamanyuni enkop.”

³⁶[8] Neing'uaa Yesu siamon nejing aji, nepuonu lkipaareta lenyena nejoki, “Imbalakinye iyiook enkitanyaanyukoto endiati te nkurma.”

³⁷Neng'amaa ajoki, “Ore oloun ilanterera sidain, naa Enkerai e Tung'ani.

³⁸Ore enkurma naa enkop, ore ina antererai sidai naa nkera e ina Kitoria, ore endiati na nkera e ilo torrono.

³⁹Ore ilo mang'atinta oun naa Sheitani, ore enkikesare, naa enkiting'oto e nkop, ore ilooikes naa ilmalaika.

⁴⁰Ore anaa enatasotuoki endiati aapejoo te nkima, neijia sii etiu te nkiting'oto e nkop.

⁴¹Keirriu Enkerai e Tung'ani ilmalaika lenyena, meitayu tiatua enkitoria enye inkitadiaat pooki o loas intorrok.

⁴²Nenang'aki ninche olmoti le nkima, neaku enkishirata o eonyoto oo lala.

⁴³Ore teina kata newang'u isupati anaa enkolong te nkitoria e Menye. Oloata nkiyiaa naaning'ie, toning'o.

⁴⁴“Etiu enkitoria e keper anaa olchumati oisudoyioki tiatua enkurma, netum oltung'ani neturoo aisudoo, ore te nchipai enye, nelo amir pooki toki naata nelotu ainyiang'u ina kurma.

⁴⁵“Etiu enkitoria e keper anaa oltung'ani omirisho, oing'oru soito oogol enkinyang'a.

⁴⁶Ore pee etum obo, nelo amir intokitin pooki naata, neinyang'u ina.

⁴⁷“Ore ake sii, etiu enkitoria e keper anaa orreshet otanang'akaki atua enaiposha, nejing impukunot pooki oo sinkir.

⁴⁸Ore pee eiput neyietuni embata e naiposha, netoni aagelaki isidain ilbenia, neiturrarri iltorrok.

⁴⁹Neijia etiu te nkiting'oto e nkop. Kepuonu ilmalaika aagelu iltorrok aarishie isupati.

⁵⁰Nenang'akini ninche atua olmoti le nkima, neaku enkishirata o eonyoto oo lala.”

⁵¹Neikilikuan Yesu ajoki, “Itoning'utuo nena pooki?” Nejoki ninche, “Ee.”

⁵²Nejoki, “Te nkaraki ina, ore pooki aiteng'enani loo nkitanapat ng'en te nkitoria e keper etiu anaa oltung'ani liopeny enkaji oitayu te nkaji enye nashumishoreki olchumati lenye, ing'ejuko o musan.”

⁵³Ore pee eidip Yesu atolimu kuna kitanyaanyukot nelo.

⁵⁴Ore pee ebaya enkang enye, neiteng'enisho te nkaji e ntumo, neing'asia iltung'ana oleng, nejo, “Kaji enotie ele tung'ani eng'eno o enkidimata naasie kuna naas e nking'asia?

⁵⁵Ae mme ele doi olayioni lo laguetani? Neji ng'otonye Mariamu? Ae emeji lalashera lenyena Yakobo o Yosef o Simon o Yuda?

⁵⁶Ae metii sii nkanashera enyena pooki atua iyiook? Kaji enotie ele tung'ani kuna baa pooki?”

⁵⁷Neaku etanyaita ninche ninye, kake etiaaka Yesu ninche, “meishori oloiboni le Nkai enkanyit te nkop enye aashu te nkaji enye.”

⁵⁸Neitu eas Yesu inenking'asia kumok teine te nkaraki enkirukoto nemeeta ninche.