Read Maasai Bible – Biblia Sinyati Matayo 17 Bible Online

Matayo 17 - Maasai Bible – Biblia Sinyati bible

Matayo 17

¹Ore pee elusoo inkolong'i ile, nerik Yesu Petero o Yakobo o lalashe lenye Yohana ailepie ninche oopeny shumata oldoinyo oado.

²Neibelekenya empukunoto e Yesu newang'u enkomom enye anaa enkolong, neiborru inkilani enyena aatiu anaa ewang'an.

³Neipang'aki Musa o Eliya aairorie ninye.

⁴Neirorie Petero Yesu nejoki, “Lo Kitok, ai sidai kitii ene, naa te naa iyieu naitobir ilng'oborri okuni, olino obo o le Musa o le Eliya.”

⁵ Ore eton eirorita, neitushur enkatampoi nawang; neningi oltoilo teina atampoi ojo, “Enkerai ai ena nanyor, natishipe te ninye. Entoning ninye.”

⁶Ore pee ening lkipaareta lenyena neirut oleng nebatata aairrabalakino enkop.

⁷Nelotu Yesu neiseyie nejoki, “Enyoito emirut.”

⁸Nejo mataraposhu nkonyek, neitu edol likae tung'ani Yesu ake openy.

⁹Ore edou ninche to ldoinyo neitanap Yesu ajoki, “Emiliki oltung'ani nena nitoduaa ometaba anaa nepiu Enkerai e Tung'ani aing'uaa ilootuata.”

¹⁰Neikilikuan lkipaareta lenyena aajoki, “Kainyoo naa pee ejo ilaiteng'enak loo nkitanapat eji keng'as Eliya alotu?”

¹¹Newaliki Yesu ajoki, “Kesipa eng'as Eliya alotu neitobir imbaa pooki.

¹²Kake ajoki intae, eidipa Eliya aeu, neitu eyiolou ninche ninye, kake eitaasa pooki ninye naayieu. Neijia sii etiu Enkerai e Tung'ani, keisilisil ninche.”

¹³Neyiolou taa teina kata lkipaareta aajo Yohana Olaibatisani eimaka.

¹⁴Ore pee ebaya enetii iltung'ana nelotu oltung'ani obo agilaki kung nejoki,

¹⁵“Lo Kitok, ing'urrie enkerai ai amu keeta enkiterria neisilisilo oleng amu katitin kumok eurokino enkima nesulakino enkare.

¹⁶Natorikoko lkipaareta linono, netalaikinote aaishiunye.”

¹⁷Newaliki Yesu ajoki, “Oi intae iltung'ana lena ishoi lemeeta enkirukoto, ootapong'ori, kaboitare intae o anu? Kang'iri te intae o anu? Entorikokoki.”

¹⁸Neisikong Yesu oloirirua, nepuku oloirirua aing'uaa neishiu enkayioni teina kata.

¹⁹Nepuo ina kata lkipaareta enetii Yesu oopeny nejoki, “Kainyoo pee kitalakinote iyiook aataarai?”

²⁰Nejoki, “Te nkaraki naa kiti enkirukoto inyi, amu kesipa ajoki intae, ti niaatata enkirukoto naba anaa ene kantererai naji karadali, naa indimidimi aatiaaki ele doinyo ‘Tadotunye te ne, shomo idie;’ nedotunye; nemetii embae nemeidimayu te intae.

²¹Kake mepuku eneeijo ena mme te nkomono o te mpukoroto.”

²²Ore eiturrurro te Galilaya nejoki Yesu lkipaareta, “Etaa kepiki Enkerai e Tung'ani nkaik oo ltung'ana;

²³near ninche ninye metua, ore te nkolong e uni neitopiuni.” Neisinanuo lkipaareta oleng.

²⁴Ore pee epuonu Kapernaum, nepuo iloosotu olpisiai le shekeli e kodi enetii Petero nejoki, “Aimelak Olaiteng'enani linyi shekeli e kodi?”

²⁵Nejo, “Kelak.” Ore pee ejing aji nemurutoki Yesu aikilikuan ajoki, “Ijo aa Simon? Ai ng'ae eitalak ilkituaak le na kop kodi oo masaa aashu enoo ltung'ana, ai nkera enye ana ineeiking'a.”

²⁶Ore pee ejo Petero, “Ineeiking'a.” Nejoki Yesu ninye, “Neijia etiu, metii nkera enye esiana.

²⁷Kake ore pee mikintagor, shomo iyie enaiposha tanang'aki orreshet nintayu osinkirri ling'as aibung; nibol enkutuk, nitum shekeli, niya aitainye kodi ai o enino.”