Read Maasai Bible – Biblia Sinyati Matayo 19 Bible Online

Matayo 19 - Maasai Bible – Biblia Sinyati bible

Matayo 19

¹Ore pee eidip Yesu atejo kuna baa neing'uaa Galilaya nelotu enkop e Yudea te lido kekun lo lkeju le Yordan;

²nesuj ninye iltung'ana kumok; neishiunye ninche teine.

³Nepuonu Ilfarisayo enetii aatem aajoki, “Keishiaakino te neorore olee enkitok enye te pooki bae?”

⁴Newaliki ajoki, “Keitu isumusumu aajo ore oloitobira ninche te nkiterunoto, eitobira olee o eng'oruoi?

⁵Nejo ninye te nkaraki ena eing'uaa olee menye o ng'otonye neibung'are enkitok enye, neaku ninche pokira osesen obo?

⁶Metaa meekure aa are, kake osesen obo. Ore enaitutumo, Enkai, mincho erish oltung'ani.”

⁷Nejoki Ilfarisayo ninye, “Kainyoo naa pee eitanapishe Musa meishori empalai e oro, neing'uaro?”

⁸Nejoki Yesu, “Eishoo Musa intae entoorore inkituaak inyi te nkaraki engolon oo ltauja linyi, kake mme neijia apa etiu te nkiterunoto.

⁹Ajoki nanu intae, ore pooki ng'ae oorore enkitok enye neme te nkaraki eloloito neyam ae, netololoite, ore oloyam enda natoororeki naa keloloito.”

¹⁰Nejoki lkipaareta ninye, “Te naa inji naa etiu, embae o lmoruo o enkitok enye, meeta tipat enkiyama.”

¹¹Nejoki Yesu ninche, “Mme pooki ooidim aatang'amai ele rorei, kake lelo ake ooishoro.

¹²Amu etii ilooini aa sunashi too nkoishuaa oo noo ng'otonye, netii iloogelem iltung'ana, netii ilooitaa ate sunashi te nkaraki enkitoria e keper. Ore ilo oidim atang'amu ena, inchoo eng'amu.”

¹³Neyakini Yesu inkera kutiti pee eiteleiki nkaik enyena, neomonoki. Neisikong lkipaareta lenyena ilooyautua.

¹⁴Nejoki Yesu, “Entapal inkera kutiti emimitiki epuonu enatii, emimitiki amu enoo naatiu anaa kuna enkitoria e keper.”

¹⁵Neiteleiki ninche inkaik enyena nelo teine.

¹⁶Nelotu oltung'ani nejoki, “Olaiteng'enani, kaa bae naikishiaan aas pee atum enkishui nemeish?”

¹⁷Nejoki Yesu ninye, “Kainyoo pee kinkilikuan nanu inenkishiaa? Obo ake eetai aa supat; te naa iyieu nijing atua enkishui, imbung'a inkitanapat.”

¹⁸Nejoki, “Akua?” Nejoki Yesu, “Kuna, miar metua, miloloito, mipurrisho, minchakenoki elejare.

¹⁹Iyanyita minyi o ng'utunyi, tonyorra ole latia ino anaa kewan.”

²⁰Nejoki ilo barnoti ninye, “Aidipa aibung'a nena pooki: kainyoo ae naatong'orikia?”

²¹Nejoki Yesu, “Te naa iyieu niaku bayaroti, shomo timira masaa pooki niaata, inchoo ilaisinak, neaku iata olchumati te keper, nikilotu asuj.”

²²Ore pee ening ilo barnoti ilo rorei, nelo eisinanuo amu eeta masaa kumok.

²³Nejoki Yesu lkipaareta lenyena, “Esipa ajoki intae nchere kegol pee ejing olkarsis enkitoria e keper.

²⁴Naitoki ajoki intae, kelelek te ntames eim enaudoto o ltidu alang olkarsis ejing enkitoria e Nkai.”

²⁵Ore pee ening lkipaareta lenyena neing'asia oleng nejo, “Aing'ae naa oidim atajeu?”

²⁶Nekurraki Yesu nkonyek nejoki ninche, “Meidimayu ina too ltung'ana, kake eidimayu pooki te Nkai.”

²⁷Newaliki Petero teina kata ajoki, “Ng'ura ajo kitung'aitie iyiook pooki toki, nikisuj iyie, kainyoo naa kenya kitum?”

²⁸Nejoki Yesu ninche, “Kesipa ajoki intae, ore intae likitusuja nanu, ore te nkop ng'ejuk te neton kenya Enkerai e Tung'ani to lorika le nkitoo enye, ore intae likitusuja nanu nitonini sii intae too lorikan tomon o aare aaiguanare lelo oshon tomon o aare loo Siraeli.

²⁹Naa ore pooki ng'ae otung'uayie inkajijik, anaa lalashera, anaa nkanashera, anaa menye anaa ng'otonye, anaa nkera, anaa nkurman te nkaraki enkarna ai naa ketum ninche inaalus o enkishui nemeish.

³⁰Kake keaku ilkumok le dukuya ile siadi, neaku ile siadi ile dukuya.