Read Maasai Bible – Biblia Sinyati Matayo 22 Bible Online

Matayo 22 - Maasai Bible – Biblia Sinyati bible

Matayo 22

¹Neitoki Yesu airorie ninche, too nkitanyaanyukot ejo:

²“Etiu enkitoria e keper anaa olaiguanani oitobiraka enkerai enye osirua le nkiyama.

³Neirriwaa isinkan lenyena meipoto ilooitoomonoki meetu osirua le nkiyama neany ninche epuonu.

⁴Neitoki airriwaa kulikae sinkan ajoki, ‘Entiaki lelo ooipotoki, Eng'ura Aidipa aitobira endaa o sirua, eyiang'a ilmong'i o lasho oopir eidipate intokitin pooki, wootu osirua le nkiyama.’

⁵Neitu ninche eshilaa ina, nepuo pooki nkolati enye, nelo likae enkurma enye, nelo likai emirare enye.

⁶Ore ilkulikae ootelekutua, neibung isinkan lenyena aainyal near metuata.

⁷Ore pee ening olaiguanani ina negoro oleng, neirriwaa iltimito loo lmurran lenyena metaara lelo tung'ana arruok, nepejoo enkang enye.

⁸Nejoki olopeny enkiyama isinkan lenyena, ‘Eoto indaiki o sirua le nkiyama, kake ore lelo ooipotoki nemeishiaakino nepuonu ele sirua.

⁹Enchom ineerishare inkoitoi ore pooki lidolidolo, empotoki osirua le nkiyama.’

¹⁰Nepuo lelo inkoitoi naalala enkanasa, neiturrurru pooki oonoto ninche, iltorrok o supati, neiput ilomon ina aji e nkiyama.

¹¹Nejing'u olaiguanani aing'or ilomon, nedol oltung'ani obo lemeishopito enkila e nkiyama; nejoki,

¹²‘Olchore kaji nkununye ene miaata enkila e nkiyama?’ Negira

¹³Nejoki olaiguanani isinkan lenyena, ‘Enteen ninye inkaik o nkejek, ninang'akiki enaimin e auluo; neaku enkishirata o eonyoto oo lala.’

¹⁴“Amu kumok ilooipotoki kake ilkuti oogeluno.”

¹⁵Nepuo ina kata Ilfarisayo aaiguanare enaiko pee erresh Yesu too nkirorot enyena.

¹⁶Neirriwaki ninche ninye lkipaareta lenye te nebo ile Herode aajoki, “Loaiteng'enani, kiyiolo aajo ira olasipani nintayiolo ltung'ana; enkoitoi e Nkai te sipata amu miing'or empukunoto o ltung'ani. Toliki naa iyiook.

¹⁷Ijo aa iyie? Keishaa ti nikincho Kaisari kodi ana eimeishaa?”

¹⁸Kake neyiolou Yesu esunkuroisho enye nejoki, “Lo sunkuro, kainyoo pee kitemiteme intae?

¹⁹Entoduaaki empisai e kodi.” Neyaki ninche ninye empisai.

²⁰Neikilikuan Yesu ninche ajoki, “Koleng'ae ele oip o ele kigeroto?”

²¹Nejoki, “Ole Kaisari.” Nejoki ina kata, “Enchoo Kaisari ine Kaisari, ninchosho Enkai ine Nkai.”

²²Ore pee ening ninche ina, neing'asia oleng nepuo aaing'uaa ninye.

²³Ore teina olong nepuonu Isadukayo, lelo oojo meetae empiunoto, neikilikuan aajoki,

²⁴“Lo Aiteng'enani, etejo Musa te neye oltung'ani neitu eiu inkera, neyam olalashe enkitok enye aiki inkera.

²⁵Etii apa atua iyiook ilalashera oopishana, neyamisho ole dukuya neye meeta inkera, neing'ueiki olalashe enkitok enye.

²⁶Neiko neijia ole aare o le okuni o metabaiki ole oopishana.

²⁷Ore te siadi pooki neye sii enkitok.

²⁸Amaa, kenya te mpiunoto, keaku enkitok ene ng'ae te lelo oopishana? Amu eyama pooki.”

²⁹Newaliki Yesu ajoki, “Ipong'oriri amu miyiololo ilkigerot anaa engolon e Nkai.

³⁰Amu ore te mpiunoto nemeyamishoe, nemeishoori meyami, kake etiu anaa ilmalaika te keper.

³¹“Kake ore too naaipirta empiunoto oo lootuata, keitu isumusumu enatiaaka intae Enkai pee ejo,

³²‘Kara Enkai e Abraham nara Enkai e Isaak nara Enkai e Yakobo?’ Mme Enkai oo lootuata, enoo looishu.”

³³Ore pee ening esiamo, neing'asia too nkiteng'enat enyena.

³⁴Kake ore pee ening Ilfarisayo inchere eitigira Isadukayo nepuo aatumo.

³⁵Neikilikuan olang'eni obo lenye atem Yesu, ajoki,

³⁶“Lo Aiteng'enani kaa kitanapata naisul inkitanapat?”

³⁷Nejoki Yesu, “Tonyorra Olaitoriani Enkai ino to ltau lino pooki ote nkishui ino pooki o te ng'eno ino pooki.

³⁸Ena kitanapata ene dukuya naa ninye naisul.

³⁹Ore eni are nanyaanyukie naa ena, ‘Tonyorra ole latia ino anaa kewan.’

⁴⁰Ore kuna kitanapat pokira are ninche naaun nkitanapat o loibonok le Nkai.”

⁴¹Ore pee eiturrurro lelo Farisayo neikilikuan Yesu ninche ajoki,

⁴²“Ijojo aa too mbaa e Kristo? Kole ng'ae?” Nejoki, “Ole Daudi.”

⁴³Nejoki ninye ninche, “Kaji naa etiu pee eipot Daudi te Nkiyang'et Sinyati ajo ‘Olaitoriani’, ejo,

⁴⁴‘Etiaaka Olaitoriani, Olaitoriani lai, Totona te tatene ai, ometaba anaa naitadou ilmang'ati linono apik abori nkejek inono.’

⁴⁵Amaa naa te naa kejo Daudi ninye Olaitoriani, kaji eiko pee eitoki ninye aaku enkerai enye?”

⁴⁶Nemetii ho obo oidima atawaliki ninye ororei hoo obo, nemetii oltung'ani ebaiki ina olong onyaaka aitieu aikilikuana likai rorei.