Read Maasai Bible – Biblia Sinyati Matayo 23 Bible Online

Matayo 23 - Maasai Bible – Biblia Sinyati bible

Matayo 23

¹Neirorie Yesu ina kata siamon o lkipaareta lenyena ajoki,

²“Laiteng'enak loo nkitanapat o Lfarisayo ootonita to lorika le Musa.

³Ore imbaa pooki naajoki ninche intae entaas, niaasiasa; amu keiro ninche nemeas.

⁴Amu keeniki ilolan sapuki ooiroishi aaiteleiki iloilila loo ltung'ana; nemeyieu ninche neiseie to lkimojino lenye.

⁵Neas isiaaitin enye pooki pee edol iltung'ana, amu keitalala ilkerreti lenye neitulus enkikodo oo nkilani enye.

⁶Nenyor iwuejitin enkanyit too siruai, o lorikan sidain tiatua inkajijik e ntumo,

⁷neshipa te neirorokini too wuejitin neemirishoreki, nenyor te neipoti aajo ‘Olaiteng'enani’.

⁸Kake eminchosho eipoti intae aajo ‘Olaiteng'enani’ amu obo olaiteng'enani linyi, nirara pooki ilalashera.

⁹Nimijojo oltung'ani papa te nkop, amu obo Papa linyi otii keper.

¹⁰Niminchosho eji intae ilarikok amu obo olarikoni linyi naa Kristo.

¹¹Ore ilo ora kitok te intae, keaku osinka linyi.

¹²Ore oloilepie kewan, neitadouni; ore oloitadou kewan neilepieki.

¹³“Oi! Intae isunkuro loo laiteng'enak loo nkitanapat o Lfarisayo! Amu irishieshie ltung'ana enkitoria e Keper, nimijing'jing'i intae maate, ore ilooyieu nejing, nimitikiki ejing.

¹⁴‘Ee kake ayia! Isunkuro o laiteng'enak loo nkitanapat o Lfarisayo, amu idaarere nkajijik oo nkolia, niomonono enkomono naado aaitaakuno; ore te nkaraki ina itumutumu enkiguana nagol oleng.’

¹⁵“Ee kake ayia! Ilaigerok o Lfarisayo sunkuro! Amu imanimana naaiposha o enkop natoyio aaing'oru obo osuj intae, ore pee eibelekenya, nintaa ninye ololmoti le nkima katitin are alang ninye intae.

¹⁶“Ee kake ayia! Ilarikok modook oojo, ‘Te nenyayie oltung'ani enkaji e Nkai olmumai neme toki; kake te nenyayie olmumai saabu e nkaji e Nkai neen ilo mumai.’

¹⁷Lo moda modook; kaa nalusoo, ai saabu ana kenkaji e Nkai naitisiny ina saabu?

¹⁸Ijojo sii ore oloinosie olmumai olperere lo lasar, neme toki kake ore oloinosie olmumai enkishorunoto natii olperere lo lasar, neen ilo mumai.

¹⁹Lo tung'ana modook, kaa nalusoo, e ina kishorunoto ana kolperere lo lasar oitisiny ina kishorunoto?

²⁰Ore oloinosie olmumai olperere lo lasar, einosie olperere lo lasar o pooki toki natii enchumata enye.

²¹Ore oloinosie olmumai enkaji e Nkai neinosie o ilo obik tiatua.

²²Ore oloinosie keper olmumai neinosie olorika le nkitoo le Nkai neinosi ilo otonita.

²³“Ee kake ayia! Ilaigerok o lfarisayo sunkuro! Amu intayuyu ematua e tomon o enkorropil o sinantei o empeu naitorropil endaa, nitapalaitie mbaa kituaak oo nkitanapat, aa isipat e nkiguana, o lng'ur o enkirukoto; kuna eishiaakino nitaasa nimipalipala nena kulie.

²⁴Lo arikok modook, isilulu enkojong'ani nimurgutaa entames!

²⁵“Ee kake ayia! Ilaigerok o Lfarisayo sunkuro amu intukuku oriong enkikompe o esaani kake ebore atua intae eului o enkarri nemeeta enkiririkinoto.

²⁶Lo Farisayoi modooni! Tang'asa intukuo atua enkikompe o esaani pee etum sii oriong ataa sidai.

²⁷“Ee kake ayia! Ilaigerok o Lfarisayo! Amu itiuu intae anaa nkuraren naaelieki enturoto meiborra, nedoli anaa ai sidain ti oriong kake ore atua eiputa loik loo lmeneng'a o loirerioni pooki.

²⁸Naa neijia sii itiuu intae, kedoli intae ti oriong aa ijo irara supati kake ore tiatua, nebore esunkuroisho o enkarruoisho.

²⁹“Ee kake ayia! Ilaigerok o lfarisayo sunkuro amu ishetishete inkuraren oo loibonok ninkodikodo inkuraren e lelo asipak le Nkai,

³⁰nijojo, ‘Te naa ai kitii apa too nkolong'i oo loo Papa, anaata eitu kishulare ninche te nkibukoroto osarge loo loibonok.’

³¹Nitaa intae shakeni nchere irara inkera e lelo ootara lelo oibonok le Nkai.

³²Emputa eneitong'oro iloo minyi.

³³Naishoi oo lasuriaa o nturbubuani, kaji inkoko pee ilanyilanya enkiguana o lmoti le nkima.

³⁴“Ore te nkaraki ena, eng'urai airriwaki intae iloibonok o ltung'ana ng'eni o laiteng'enak loo nkitanapat; niariara kulikae, metuata nisheshe, niariara kulikae too nkajijik inyi e ntumo, niaraa kulikae too nkang'itie aaisikie;

³⁵pee etum ainepu intae osarge loo ltung'ana le Nkai oibukori te nkop ebaiki osarge le Abel lemeeta entiyoto, o metabaiki osarge le Sakaria le Barakia litaara intae te rishata ewueji sinyati o olperere lo lasar.

³⁶Esipa ajoki intae, kepuonu kuna baa pooki shumata kulo tung'ana le na kata.

³⁷“Woi Yerusalem, Yerusalem naar iloibonok le Nkai, nenang too soito lelo ooirriwakini ninye! Ai katitin aja atonyuaa ajo aiturrur inkera inono anaa elukunku naiturrur inkuoo enyena too naipuko enyena, nitanyaita!

³⁸Neina enkaji inyi natung'eikiaki eliyio.

³⁹Amu ajoki intae, mikintokiki aadol katukul, metaba anaa nijojo, ‘Emayiana ilo olotu te nkarna o Laitoriani.’ ”