Read Maasai Bible – Biblia Sinyati Matayo 25 Bible Online

Matayo 25 - Maasai Bible – Biblia Sinyati bible

Matayo 25

¹“Etiu enkitoria e keper anaa ntoyie tomon, naatudumutua ltaai lenye aapuo aanang'are oloyamisho.

²Ore imiet nemoda, ore inkulie imiet naa ng'eni.

³Amu ore nekua naamoda ewaita iltaai lenye neitu eya eilata

⁴Ore nekua ng'eni, neya eilata too ltuleta lenye o too ltaai.

⁵Ore pee eimutie oloyamisho, neimug pooki neirura.

⁶Ore te mpolos e nkewarrie, nebuaki aajo, ‘Neilo oloyamisho, entupuku entanang'are.’

⁷Neinyototo ina kata nena toyie aaitobir iltaai lenye.

⁸Nejoki naamoda kunda ng'eni, ‘Enchoo iyiook enkiti ilata inyi; amu keye iltaai lang.’

⁹Kake newaliki ng'eni ajoki, ‘A'a mebaiki iyiook o ntae; enaikash ti nipuopuo enetii iloomir aainyang'aki ate.’

¹⁰Ore pee einyototo aapuo aainyiang'u, nebau oloyamisho, nejing nena naaterretenate tenebo oloyamisho atua osirua le nkiyama; neikeni kutuk aji.

¹¹Neitoki te siadi aapuonu nekua toyie aajo, ‘Lo kitok, Lo, kitok, tabolu iyiook.’

¹²Newaliki ajoki, ‘Kesipa ajoki, intae, mayiolo ntae.’

¹³Entorripisho naa, amu miyiololo ntae ina olong aashu esaa.

¹⁴“Etiu enkitoria e keper anaa te neyieu oltung'ani nelo enkop nalakua neipot isinkan lenyena neitaaki ntokitin enyena.

¹⁵Neitaaki obo ntalantani imiet, neitaaki olikae are neitaaki likae nabo; aisho pooki tung'ani anaa enkidimata enye; nelo.

¹⁶Ore lido oitaakaki ntalantani imiet nelo nabo kata aasishore netum kulie talantani imiet.

¹⁷Netumie sii elde oitaakaki are kulie are.

¹⁸Kake ore elde oitaakaki nabo, nelo aturoo aisudoo empisai o lkitok lenye.

¹⁹Ore etulusoyie enkata naado nelotu olkitok le lelo sinkan, neyieu esiana oo ntokitin enyena.

²⁰Neng'asunye oloitaakaki ntalantani imiet neyau kulie talantani imiet; nejoki, ‘Lo Kitok kinchoo apa ntalantani imiet; ng'ura ajo anoto kulie imiet.’

²¹Nejoki olkitok lenye, ‘Ee osinka supat laisilig, itaa oloisiligayu too nkuti, kaaisho intoria kumok; tijing'a eng'ida o lkitok lino.’

²²Nelotu oloitaakaki ntalantani are nejoki, ‘Lo Kitok, kintaaka apa ntalantani are, ng'ura ajo, anotie kulie are.’

²³Nejoki olkitok lenye, ‘Ai sidai enitaasa iyie osinka supat oisiligayu; tijing'a eng'ida o lkitok lino.’

²⁴Nelotu sii elde oitaakaki entalanta nabo nejo, ‘Lo Kitok, kayiolo ajo ira iyie oltung'ani ogol oikes ineitu iun, ninturrur ineitu isuaaya.

²⁵Neaku atureishie nanu nalo aturoo aisudoo ina talanta ino tiatua enkop, ing'ura, nena enino, inko.’

²⁶Neng'amaa olkitok lenye, nejoki, ‘Lo sinka torrono oshal, itayiolo ajo kaikes ineitu aun, nasotu ineitu aisuaaya;

²⁷anaata naa inchoo ina pisai ai lelo ooasishore pee te nalotu natum enaai o kulie.

²⁸Entooru naa ina talanta enchoo ilo oata ntalantani tomon.

²⁹Amu ore pooki oata neponikini pee eaku naata nkumok kake ore olemeeta, ore ninye enda naata neoruni.

³⁰Entanang'aki ilo sinka lemeeta tipat enaimin e auluo; neaku enkishirata o eonyoto oo lala.’

³¹“Ore te nelotu Enkerai e Tung'ani te nkitoo enye, eboitare ilmalaika pookin, neton ina kata to lorika lenye le nkitoo.

³²Neiturrurrokino iloreren pooki dukuya ninye negel ninche anaa olchekut ogelu nkerra arishie nkineji.

³³Nepik nkerra enkaina enye e tatene, nepik inkineji ene kedianye.

³⁴Naa kejoki ina kata olaiguanani lelo ootii enkaina enye e tatene, ‘Wootu intae ilootamayiana Papa lai, entujung enkitoria naitobirakaki apa intae apa ebaiki enkiterunoto e nkop.

³⁵Amu kaata apa esumash nikinchosho endaa; naata enkure nikinchosho enkare naok; nara omoni nikirikiriki ang;

³⁶nemaishopo nikinchopishopo; namuoi nikirumurumu, naena nikibaikiki.’

³⁷Neng'amaa ina kata ltung'ana le Nkai aajoki, ‘Lo kitok, kanu kitoduaa iyie iata esumash nikintoti iyie? Aashu iata enkure nikintook iyie?

³⁸Ana kanu kitaduaa iyie ira omoni nikirik iyie ang? Anaa minchopo nikinchop iyie?’

³⁹Ana kanu kitaduaa iyie imuoi anaa iena nikibaiki iyie?

⁴⁰Neng'amaa olaiguanani ajoki, ‘Kesipa, ajoki intae, ore anaa enintaasa lelo alashera laainei ooti, nanu intaasa.’

⁴¹Neitoki Yesu ina kata ajoki ilootii enkaina enye e kedianye, ‘Enyoito intae entung'uayioki iloodiaa, enchom enkima oo ntarasi naitobirakaki Sheitani o lmalaika lenyena.

⁴²Amu aata apa esumash neitu kintotiti; naata enkure neitu kinchosho enkare naok.

⁴³Nara omoni neitu kirikiriki ang; nemaishopo neitu kinchopishopo; namuoi, naena neitu kibaikiki.’

⁴⁴Neng'amaa sii ninche aajoki, ‘Kanu kitaduaa iyie iata esumash, anaa enkure, anaa ira omoni, anaa minchopo, anaa imuoi anaa iena neitu kisiai iyie?’

⁴⁵Naa keng'amaa ajoki, ‘Kesipa ajoki intae, ore anaa eneitu intaasiasa obo le kulo ooti, nanu eitu intaasiasa.’

⁴⁶Naa kepuo ninche enkitamioto oo ntarasi; nejing iltung'ana le Nkai enkishui nemeish.”