Read Maasai Bible – Biblia Sinyati Matayo 4 Bible Online

Matayo 4 - Maasai Bible – Biblia Sinyati bible

Matayo 4

¹Ore ina kata neilepie Enkiyang'et e Nkai Yesu arik ong'ata metetema oloirirua.

²Ore pee eidip atupukoi nkolong'i artam dama o kewarie.

³Nelotu olatemani nejoki, “Te naa ira iyie Enkerai e Nkai, tiaaki kulo soito metaa mukateni.”

⁴Kake newaliki Yesu ajoki, “Etisiraki nchere, ‘Meishuyie oltung'ani emukate ake, kake eishuyie pooki rorei oing'uaa enkutuk e Nkai.’ ”

⁵Neitoki Sheitani arik Yesu enkanasa sinyati neitoton ninye te ntopij e nkaji e Nkai.

⁶Nejoki. “Te naa ira iyie Enkerai e Nkai, tusulai kewan enkop; amu etisiraki aajo: ‘Keitanap Enkai ilmalaika lenyena te nkaraki iyie, eikinap ninche too nkaik enye, pee mikinkob osoit enkeju ino.’ ”

⁷Nejoki Yesu ninye, “Etisiraki sii aajo, ‘Mitem iyie Olaitoriani Enkai ino.’ ”

⁸Neitoki Sheitani arik ninye oldoinyo oado oleng, neitodol ninye inkitoriat pooki e nkop o enkitoo enye.

⁹Nejoki ninye, “Ekaaisho nanu iyie kuna tokitin pooki ti nikigilaki kung aserem.”

¹⁰Nejoki Yesu ninye, “Shomo Sheitani amu, etisiraki aajo, ‘Teserema Olaitoriani Enkai ino naa ninye ake openy isiaai.’ ”

¹¹Neing'uaa Sheitani ninye teina kata; nepuonu ilmalaika aaisiaai ninye.

¹²Ore pee ening Yesu ajo eteenaki Yohana neibelekenya alo Galilaya.

¹³Neing'uaa Nasaret nelotu abik te Kapernaum, enkang natii embata e naiposha te nkop e Sebulon o Naftali,

¹⁴pee ebaya enatejoki to loiboni le Nkai oji Isaya pee ejo,

¹⁵“Enkop e Sebulon o enkop e Naftali ineeshepita enkoitoi nalo enaiposha, lido kekun lo lkeju le Yordan te Galilaya oo loreren,

¹⁶etoduaa ewang'an kitok olorere otonita tiatua enaimin, ore lelo ootonita te nkop o to loip lee keeya, etabaikia ewang'an.”

¹⁷Ore ebaiki ina kata neiteru Yesu alikioo ororei le Nkai ejo, “Erridutu amu etinyikua enkitoria e keper.”

¹⁸Ore eloito Yesu te mbata e naiposha e Galilaya nedol ilalashera oaare, Simon oji Petero o lalashe lenye Anterea, enang'aki o rreshet atua enaiposha, amu ilarreshok apa loo sinkir.

¹⁹Nejoki ninche, “Wootu, erukurukoreki, naa kaitaa intae ilarreshok loo ltung'ana.”

²⁰Neing'uaa nabo kata irresheta lenye neirukurukore Yesu.

²¹Ore pee enyikaa Yesu penyo nedol kulikae alashera oaare. Yakobo le Sebedayo, o Yohana olalashe lenye, tiatua empeut eboitare papaai lenye Sebedayo, eripita irresheta lenye neipot ninche.

²²Neing'uaa nabo kata empeut o papaai lenye neirukurukore.

²³Nemanaa Yesu te Galilaya pooki eiteng'enisho too nkajijik enye e ntumo, nelikioo ilomon Supati le ina kitoria, neishiunye pooki keeya o emuoyian tiatua olorere.

²⁴Neibula olning'o lenye te enkop pooki e Siria; neyakini Yesu iltung'ana pooki oomuoyiaa ooibung'a nkeyaitin oo mpukunot kumok o looata iloiriruani o looata emuoyian e nkiterria o lmaiman o looidimua emion; neishiunye ninye ninche.

²⁵Nesuj iltung'ana kumok ooing'uaa Galilaya o Dekapoli o Yerusalem o Yudea o lido kekun lo lkejule Yordan.