Read Maasai Bible – Biblia Sinyati Matayo 8 Bible Online

Matayo 8 - Maasai Bible – Biblia Sinyati bible

Matayo 8

¹Ore pee edou Yesu to ldoinyo, neirukurukore iltung'ana kumok.

²Nelotu enetii oloata enkeeya oo lbolot, negil kung aserem, nejoki, “Lo kitok, ti niyieu kindim atisika.”

³Neitorioo Yesu enkaina enye neiseyie nejo, “Kayieu; tisikayu.” Nesikari nabo kata enkeeya enye.

⁴Nejoki Yesu ninye, “Miliki ake oltung'ani, kake shomo intoduaai kewan to olapolosani, nintayu enkishooroto naitanapishe Musa, metaa shakenisho te ninche.”

⁵Ore pee ejing Yesu Kapernaum, nelotu olkitok loo sikarini enetii asai ninye,

⁶nejoki, “Lo kitok, eirrag olaisiaayiani lai ti aji, etaa olmaima, neitabayie emuoyian oleng.”

⁷Nejoki Yesu, “Kalotu aishiunye.”

⁸Newaliki ilo kitok loo sikarini ajoki, “Lo kitok, kaamakua nanu ti nijing'u enkaji ai, kake tejo ake olomoni obo, naa keishiu olaisiaayiani lai.

⁹Amu ara sii nanu oltung'ani otii abori enkitoo, naata nanu sikarini laatii ti abori, te najoki obo, ‘Shomo,’ nelo; najoki likae, ‘Wou,’ nelotu; naa te najoki osinka lai, ‘Taasa ena, neas.’ ”

¹⁰Ore pee ening Yesu nena, neing'asia nejoki lelo oosujita, “Esipa ajoki intae, eitu ae kata adol likae tiatua Siraeli oata enkirukoto sapuk naba inji.

¹¹Najoki nanu intae, kepuonu ilkumok ooing'uaa oloosaen o loontoluo aatoni te nebo Abraham o Isaak o Yakobo tiatua enkitoria e keper;

¹²kake ore lelo laa ninche naaji ile ina kitoria nenang'akini atua enaimin e auluo; neaku enkishirata o eonyoto oo lala.”

¹³Nejoki Yesu ilo kitok loo sikarini, “Shomo ang; metotiwuo te iyie anaa ina niruko.” Neishiunyeki olaisiaayiani lenye teina kata ake.

¹⁴Ore pee ejing Yesu enkaji e Petero, nedol enkaputani e Petero eirrag emuoi oloirobi.

¹⁵Neiseyie enkaina enye neing'ueki oloirobi, neinyototo aisiaai ninye.

¹⁶Ore pee eaku teipa, neyakini Yesuilkumok ooata iloiriruani nearaa iloiriruani to rorei, neishiunye lelo pooki oomuoi,

¹⁷Pee etum atabai enairoroki to loiboni le Nkai oji Isaya pee ejo, “Ewa ninye openy imuoyiaritin ang, netanapa inkeyaitin ang.”

¹⁸Ore pee edol Yesu iltung'ana kumok emanita, neitanap metalang'a aapuo lido kekun.

¹⁹Nelotu olaiteng'enani loo nkitanapat nejoki, “Lo Aiteng'enani, kaasuj pooki wueji nilo.”

²⁰Nejoki Yesu, “Keeta imbariak ingumot, neeta motonyi o loing'ang'e nkajijik enye kake meeta Enkerai e Tung'ani eneiteleiki endukuya enye.”

²¹Nejoki likai loo lkipaareta lenye, “Lo kitok, inchooki matang'asa alo anukaa papa.”

²²Kake etiaaka Yesu ninye, “Tusujuaki iyie; inchoo ilmeneng'a metunukai ilmeneng'a lenye.”

²³Ore pee ejing Yesu empeut, nesuj lkipaareta lenyena.

²⁴Nedumunye olkutati kitok te naiposha, metaa keimisie ilopir le nkare empeut; kake keirura ninye Yesu.

²⁵Nepuo enetii lkipaareta lenyena, neinyeyie, nejoki, “Intajeu iyiook, Lo Kitok, amu kindaaitie.”

²⁶Nejoki, “Kainyoo pee iureishoyuyu intae ilooti enkirukoto?” Neinyototo neisikong olkutati o enaiposha; nelotu enkitirring'ata kitok.

²⁷Neing'asia lelo tung'ana nejo, “Kaa pukunoto o ltung'ani ele oning olkutati o enaiposha?”

²⁸Ore pee ebaiki Yesu lido kekun le nkop oo Lgadaren, nenang'are iltung'ana oaare ooata iloiriruani oopi oleng ooing'uaa inkuraren o metaa meidim oltung'ani aima ina oitoi.

²⁹Nebuak ninche aajo, “Kainyoo iatakinore iyie iyiook Enkerai e Nkai? Amaa iewuo iyie aitame iyiook eton eng'or enkata?”

³⁰Netii eluaata oo lbitiro nadaa nalakuaniki ninche.

³¹Nesai lelo oiriruani Yesu aajoki, “Te naa iaraa iyiook aipang'ie, inchoo iyiook maape aajing enda boo oo lbitiro.”

³²Nejoki, “Enchom.” Ore pee eipung ninche, nepuo aajing ilbitiro; nekuet emboo pooki, nesulari te marti aajing enaiposha, neye tiatua enkare.

³³Neilanyisho ilchekuti aapuo inkang'itie enye nelikioo imbaa pooki o nena naataasate te lelo ooata iloiriruani.

³⁴Nepuku enkanasa pooki aapuo aanang'are Yesu; ore pee edol nesai metung'uai ilo kirine lenye.