Read Maasai Bible – Biblia Sinyati Marko 13 Bible Online

Marko 13 - Maasai Bible – Biblia Sinyati bible

Marko 13

¹Ore ina kata epuku Yesu te nkaji e Nkai, nejoki obo loo lkipaareta lenyena ninye, “Olaiteng'enani, ng'ura eneba kulo soito le nking'asia o kuna ajijik e nking'asia!”

²Nejoki Yesu ninye, “Idol kuna kituaa ajijik sapuki? Meing'uari tene osoit obo oiteleikino olikae lemesulakini enkop.”

³Ore etonita Yesu to Ldoinyo loo Loirienito eipirare enkaji e Nkai, neikilikuan Petero o Yakobo o Andrea too nkurrat aajoki,

⁴“Toliki iyiook, kanu ebau kuna baa, naa kalo olmonekie oitodolu enkata nataanu kuna baa pee eitabari?”

⁵Neiteru Yesu ajoki, “Enteng'enuoto meitapong'oo intae oltung'ani.

⁶Kepuonu lkumok te nkarna ai, ejo, ‘Nanu ilo!’ Neitapong'oo lkumok.

⁷Naa te nining'ining'i njoreitin o lmarenke loo njoreitin, eming'aing'ae; amu meeta nchere pee metiu neijia; kake eton eng'or ina kiting'oto.

⁸Amu kedumakino olorere olikae orere, nedumakino enkitoria enkae kitoria; netumi olokirikiri le nkop too wuejitin kumok, netumi lameitin; naa ena enkiterunoto oo sinaitin.

⁹“Kake entodol ate. Amu keitarasakini intae nkiguanat; neari intae too nkajijik enye e ntumo; nintasheshe te dukuya ilaitoriak o laiguanak te nkaraki nanu, pee iakuku shakeni te dukuya ninche.

¹⁰Nemeeta nchere pee meng'asi aalikioo ele rorei supat too loreren pooki.

¹¹Naa ore pee erikuni intae enkiguana aaitarasaa, eming'aing'ae te dukuya aajo aikijo aa; kake ina naishori intae teina saa entejo, amu mme intae ooiro, kake Enkiyang'et Sinyati.

¹²Naa keitarasaa olalashe olalashe lenye metari metua, neitarasaa menye enkerai enye, nedumakino nkera iloomenye, neitarasaa metari metuata.

¹³Naa keibayuni intae iltung'ana pooki te nkaraki enkarna ai. Kake ore olong'iri ometabaiki enkiting'oto naa keitajeuni.

¹⁴“Kake ore pee idolidolo ina taboi nayau emutata eitashe te wueji nemeishiaakino (tayiolo taa ake oloisuma ena), esikaki ildoinyo ilootii Yudea.

¹⁵Ore olotii shumata enkaji nemedou ajing aji ashoroo ae toki.

¹⁶“Ore olotii enkurma nemeshuko ang ajo ashoroo olkila lenye.

¹⁷Wooi nena tuaan o naaitanakisho te nena olong'i!

¹⁸Entasaisho pee mebau nena te nkata e nkirobi.

¹⁹Amu ore te nena olong'i kepuonu isinaitin leitu ae kata etumi anaa apa pee eitayu Enkai enkop o te nne, nemeitokini ae kata aatum intarasi.

²⁰Te neme Olaitoriani oitodorropa nena olong'i, anaata meetae hoo oltung'ani obo opok. Kake ore te nkaraki ilgelunot lenyena ootegelua ninye, neitodorropa ninye nena olong'i.

²¹Ore ina kata te nejoki intae oltung'ani, ‘Ng'ura, nele Kristo otii ende!’ Anaa ‘Ng'ura, nelido otii ende!’ Emiruk.

²²Keinyototo loo Kristo le lejare o loibonok le lejare neitoduaaya lmonek o mbaa e nking'asia, ejo maitapong'oi, te naa keidimayu, ebaiki lelo ootegeluaki.

²³Kake entodol ate; aidipa atoliki intae mbaa pooki te dukuya.

²⁴“Kake ore te nena olong'i, etulusoitie lelo sinaitin, nemisimisu enkolong, nemeitoki olapa awang'u

²⁵nesulunye ilakir te keper, neikirikirieki engolon o loing'ang'e.

²⁶Nedoluni ina kata Enkerai e Tung'ani elotu too nkatampo te ngolon sapuk o te nkitoo.

²⁷Neirriwaa teina kata ilmalaika, meiturrurro lelo gelunot lenyena aaitung'uaa ilubot pokira ong'uan, neitung'uaa ineeiting'ie enkop o neeiting'ie keper.

²⁸“Enteng'ena ate te nkitanyaanyukoto o lng'aboli; laa ore ake pee enanau ilng'osil neiturumisho mbenek, niyiolouu aajo etinyikua erishata oladalu.

²⁹Neijia naa etiu, ti nidolidolo nena baa etabautua, niyiolouu aajo etataana ninye, auluo etii.

³⁰Esipa ajoki intae, meishari ena ishoi eitu eitabari kuna baa pooki.

³¹Keishari keper o enkop, kake meishari irorei laainei.

³²“Kake ore ina olong o ina saa, meetae hoo obo oyiolo, aimeyiolo ninche lmalaika le keper, nemeyiolo Enkerai e Tung'ani, Papa ake oyiolo.

³³Entodol ate, entashololoto; amu miyiololo aajo kanu ebau ina kata.

³⁴Etiu anaa oltung'ani oshomo elototo, ore elo ti ang, neing'ueiki ilaisiaayiak, neisho ake oltung'ani eramatare enye, neitanap olorrip kishomi metashololoyu.

³⁵Entashololoto naa amu miyiololo aajo kanu elotu olopeny enkaji, anaa ae te nteipa, anaa ae te nasirie

³⁶pee melotu ake neluamisho neinepu intae irurara.

³⁷Naa ore ina najoki intae, neijia ajoki pooki: entashololoto.”