Read Maasai Bible – Biblia Sinyati Marko 15 Bible Online

Marko 15 - Maasai Bible – Biblia Sinyati bible

Marko 15

¹Ore ake pee ekenyu, neiguana ilapolosak kituaak, o lpayiani o laigerok o enkitoo pooki nalulung'a. Neen Yesu, nerik neitarasaki Pilato.

²Neikilikuan Pilato ajoki, “Ira doi iyie Olaiguanani loo Lyahudi?” Newaliki Yesu ajoki, “Iyie otejo neijia.”

³Neitang'or ilapolosak kituaak ninye too mbaa kumok.

⁴Neigil Pilato aikilikuan ninye ajoki, “Aimiata hoo embae niwalu? Nidol eneba mbaa nikintang'orie ninche?”

⁵Kake eitu hoo ewaliki Yesu, o metaba anaa neing'asia Pilato.

⁶Naa ore apake te ilo sirua kelaku apa Pilato oltung'ani obo oena, naa olotoomonutuo ake iltung'ana.

⁷Ore too ltung'ana otigilunore enkitoria ooena te jila, neitayutuo loikop ina kata, netii oltung'ani oji Barabas.

⁸Nepuonu lelo tung'ana neiteru aaikilikuan Pilato meitaasa enoshi ake naitaas.

⁹Newaliki ajoki, “Iyieuu nalaaki intae Olaiguanani loo Lyahudi?”

¹⁰Amu etayiolo Pilato ajo olom ake eitarasarie ilapolosak kituaak Yesu.

¹¹Kake einuaakita ilapolosak kituaak olorere metejo pee elaakini ninche Barabas.

¹²Neitoki ake Pilato ajoki ninche, “Paa kaa naa aitaas ele tung'ani lijojo Olaiguanani loo Lyahudi?”

¹³Neilepilep aaigil aajo, “Tasho ninye.”

¹⁴Nejoki Pilato ninche, “Kainyoo, kaa torrono etaasa ninye?” Kake eilepilepa oleng aajo, “Tasho ninye.”

¹⁵Ore amu keyieu Pilato neitiship lelo tung'ana, nelaaki Barabas neng'as aishooyo Yesu metooshi too nkeenta neitoki aitarasaa metashei.

¹⁶Neriku sikarini Yesu atua enkaji e nkitoo naji praitorio; neipotu esikari e sirit nalulung'a.

¹⁷Neishopoki Yesu olkila mugie neshetu olmarisian loo lkiku neishopoki Yesu elukunya.

¹⁸Neiteru aairoroki aajoki, “Olele Olaiguanani loo Lyahudi!”

¹⁹Neigilie aaosh elukunya te ntiyani, nenotaki, negilaki kung aaitaakuno keserem.

²⁰Ore pee eidip aatadalare, neoru ilo kila mugie neishopoki nkilani enyena. Nerik auluo pee epuo aashe.

²¹Nearakini olpayian obo oji Simon le Kirene, otadokuo ti ae kop, menye taa Aleksanta o Rufus, metanapa osalaba le Yesu.

²²Nerik o meitabaiki Golgota, (eji ewueji e mborbor).

²³Neisho enaisho natipikaki entoki naji manemane, kake etanya ninye eok.

²⁴Neshe ninche ninye, neorikino lkilani lenyena, neoshie enkukuo pee etum oloya.

²⁵Naa saa uni ina kata pee eshe ninche ninye.

²⁶Ore embae naitanang'aki ninye neigero ajo, “Olaiguanani loo Lyahudi.”

²⁷Netashoki lapurrok aare te nebo Yesu, atii obo te tatene netii olikae te kedianye.

²⁸Neitabari olkigeroto ojo, “Eikenayioki ninye te nebo ilarruok.”

²⁹Ore lelo oopuaya o looim ine, nesurdaany ninye eing'unie lukuny, nejo, “Hoo! Eiyie doi ojo igil enkaji e Nkai nintoki ashetu too nkolong'i uni?

³⁰Intajeu kewan tadou te ilo salaba!”

³¹Neiko sii ninche neijia ilapolosak kituaak aaikordod ejokino maate, “Kulikae ake eitajewuo; nemeidim aitajeu kewan.

³²Nchoo naa duoo Kristo, Olaiguanani le Siraeli, edou to salaba matodol pee kiruk.” Ore lelo ootashoki te nebo ninye nemor sii ninche.

³³Ore pee eipir enkolong, neiput enaimin enkop pooki o metabaiki saa naaudo.

³⁴Ore pee eaku saa naaudo nebuak Yesu to ltoilo sapuk ajo, “Eloi, Eloi, lama sabaktani?” Eji, “Enkai ai, Enkai ai, ainyoo pee kitung'uayie?”

³⁵Ore pee ening kulikae ooitashe teine nejo, “Ining, Eliya eipoto.”

³⁶Nekuet obo, neiput osuguroi enaisho naisuisho naji siki, nepik oloomi neisho metooko, nejo, “Ntasho matodol te naa kelotu Eliya aitadou.”

³⁷Nebuaku Yesu oleng, nedung'o tau.

³⁸Neiperra aaku are olkarasha oor enkaji e Nkai, eiteru te shumata o meiting'o ti abori.

³⁹Ore pee edol osajini oitashe aipirare Yesu, ajo etaa etundung'e tau, nejo, “Kedede Oinoti le Nkai ele tung'ani.”

⁴⁰Netii sii nkituaak naaing'orita elakuaniki inaatii Mariamu Magdalene, o Mariamu ng'otonye Yakobo oti o Yosef, netii sii Salome,

⁴¹ninche napa, etii Yesu Galilaya, naatusujutua neisiaai. Netii sii kulie kituaak kumok naairiamunore ninye epuonu Yerusalem.

⁴²Ore pee eaku teipa, naa enkolong e Nkitobirakinoto, aa enoshi olong taa pee eyookini enkolong e Sabato.

⁴³Neshirraki[3] Yosef le Arimatea, obo loo looyanyiti le nkiguana, olaa keanyita ninye enkitoria e Nkai, nelo enetii Pilato neomonu osesen le Yesu.

⁴⁴Neing'asia Pilato pee eji eidipa Yesu atua, ore pee eipotu osajini, neikilikuan te naa keidipa Yesu atua.

⁴⁵Ore pee ening to sajini ajo etua, neisho Yosef ilo sesen.

⁴⁶Neinyang'u Yosef olkarasha le kitani neenie osesen le Yesu, neirragie te nkurare nataguetuaki to soit, neibeleleng'oki osoit enkutuk e ina kurare.

⁴⁷Netoduaa Mariamu Magdalene o Mariamu ng'otonye Yosef eneirragieki osesen le Yesu.