Read Maasai Bible – Biblia Sinyati Marko 6 Bible Online

Marko 6 - Maasai Bible – Biblia Sinyati bible

Marko 6

¹Neing'uaa Yesu ine nelotu enkop enye e Nasaret, nesuju lkipaareta lenyena.

²Ore te nkolong e Sabato neiteru aiteng'enisho te nkaji e ntumo; ore ilkumok ootoning'o ninye neing'asia, ejo, “Kaji enotie ele tung'ani kuna pooki. Kaa ng'eno eishooki ninye? Kebaa kuna baa e nking'asia naas inkaik enyena!

³Mme olaguetani loo nkeek doi ele, olayioni le Mariamu, naa olalashe Yakobo o Yosef, Yudas o Simon, naa aimetii inkanashera enyena atua iyiook?” Neany ninche eiruk ninye.

⁴Nejoki Yesu ninche, “Meishori oloiboni le Nkai enkanyit te nkop enye, o tiatua enkaji enye.”

⁵Nelaikino Yesu ataasa inenking'asia teine; ilkuti tung'ana ake oomuoi eiteleikia inkaik neishiunye.

⁶Neing'asia ninye te nkaraki nemeeta ninche enkirukoto. Nemanaa too nkang'itie eiteng'enisho.

⁷Neipotu Yesu lelo Ooiteng'eni lenyena tomon o aare, neisho meitoria iloiriruani torrok.

⁸Neitanap ajoki, “Emishoroo toki te lototo inyi, eng'udi ake; naa emiya emukate, aashu olbene, aashu impisai too ilkonosi linyi.

⁹Enchopoi inamuka kake eminchopoo lkilani maa are.”

¹⁰Nejoki ninche, “Ore ake enkaji nijing'ijing'i, entotoni teine o entung'uai ine wueji.

¹¹Naa te neitu eng'amu intae dikae[1] wueji, nemening intae, ore ipuopuo, empiripiroi enterit niaatata too nkejek inyi metaa shakeni te ninche.”

¹²Nepuo aalikioo nchere keishiaakino neirridu ltung'ana.

¹³Nearaa ninche iloiriruani kumok, neelie eilata iltamuoyia kumok neishiunye.

¹⁴Nening olaiguanani oji Herode ina; amu etayioloki enkarna e Yesu. Nejo kulikae, “Eitopiwuoki Yohana Olaibatisani too lootuata; ina pee easisho ena golon tiatua ninye.”

¹⁵Nejo kulikae, “Eliya doi.” Nejo sii kulikae, “Oloiboni le Nkai otiu anaa iloibonok le Nkai li apa.”

¹⁶Kake ore pee ening Herode nejo, “Yohana, olapa latudung'oyie elukunya eitopiwuoki.”

¹⁷Amu eirriwayie Herode ltung'ana meibung'i Yohana, neen apik jila te nkaraki Herodias, enkitok o lalashe lenye oji Filipo amu eyama apa ninye.

¹⁸Amu etiaaka Yohana Herode, “Mikinchoro too nkitanapat iyama enkitok o lalashe lino.”

¹⁹Neetayie Herodias elap Yohana neaku keyieu near metua, Kake etalaikine,

²⁰amu keure Herode Yohana, eyiolo ajo oltung'ani supat naa sinyati, nerrip eseriani enye. Ore pee elo neinining nemiloyu; eji neng'ida sii te nening.

²¹Kake eewuo erishata to lkekun otoinyieki Herode neitoomonisho ninye neipot ilkituaak lenyena o ltung'ana arikok le Galilaya.

²²Ore pee elotu entito e Herodias aranyaki, neitiship Herode o lomon lenyena; nejoki olaiguanani ina tito, “Toomonoki entoki ake pooki niyieu, naa kaaisho.”

²³Nenya olmumai ajo, “Ore entoki ake pooki nikiomon, kaaisho o metabaiki ematua e nkop naitore.”

²⁴Neipang nelo ajoki ng'otonye, “Kainyoo aomonu?” Nejoki ng'otonye, “Elukunya e Yohana Olaibatisani.”

²⁵Nejing'u nabo kata asieku enetii olaiguanani, neomon ajoki, “Ayieu nikincho nabo kata elukunya e Yohana Olaibatisani te mbeshen.”

²⁶Neisinanuo naleng olaiguanani; kake ore te nkaraki ilmuma lenyena o lelo omon lenyena neaku, meyieu nedot ina natiaaka.

²⁷Neirriwaa olaiguanani nabo kata osikari le rripore, neitanap ninye meyau elukunya e Yohana. Nelo ilo nedung'u elukunya te jila,

²⁸neyau ina lukunya te mbeshen, neisho ina tito; neisho entito ng'otonye.

²⁹Ore pee ening lkipaareta le Yohana, nepuonu aaya osesen lenye, neturoo te nkurare.

³⁰Nerrinyunye ilkipaareta enetii Yesu, neliki ninye nena pooki naataasa o naaiteng'enishote.

³¹Nejoki Yesu ninche, “Wootu oopeny emaape eneliyio, eyeng'iyeng'ata enkiti kata.” Amu aikumok iloopuonu epuo, neaku meeta ninye erishata nainosie endaa.

³²Nepuo te mpeut ewueji neliyio aa ninche ake oopeny.

³³Netoduaaitie iltung'ana kumok, neyiolou, neipirri aapuo too nkejek ine eing'uaa nena ang'itie pooki, neng'asie ine wueji.

³⁴Ore pee edou Yesu te mpeut nedol iltung'ana kumok, neing'urrie ninche, amu etiu anaa ntare nemeeta olchekut; neiteru aiteng'en mbaa kumok.

³⁵Ore pee emutu, nepuonu lkipaareta lenyena enetii nejoki, “Keliyio ene wueji, nemuto;

³⁶intanapa iltung'ana, meshomo nkurman o kuna ang'itie naamanita ene aainyang'aki ate entoki nanya.”

³⁷Kake etawalikia Yesu ajoki ninche, “Enchoo intae ninche entoki nanya.” Nejoki ninche ninye. “Aikipuo aainyiang'u mukateni oo ndinarii iip are, pee kincho meinosa?”

³⁸Nejoki ninche, “Kaja mukateni niatata intae? Enchom eng'urai.” Ore pee eing'uraa neyiolou, nejoki, “Imiet o sinkir aare.”

³⁹Neitanap Yesu lkipaareta lenyena meitotona olorere too nkujit naanyori, anaa ltimito.

⁴⁰Netoni aaitayu ltimito maa iip, anaa maa onom.

⁴¹Ore pee edumu Yesu nena mukateni imiet o sinkir aare neshumu inkonyek aing'or shumata, nemayian, nebel imukateni neisho lkipaareta lenyena meishoo lelo tung'ana; neoriki lelo sinkir aare ninche pooki.

⁴²Nenya pooki neraposho.

⁴³Nesotu mbelat naatelekuaki o noo sinkir sii neiput inkikapuni tomon o aare.

⁴⁴Ore lelo ooinosa nena mukateni nera nkalifuni imiet ilewa.

⁴⁵Nejoki Yesu lkipaareta lenyena nabo kata meshomo, nejing empeut neituruk aapuo lido kekun, aapuo Betsaida eitanapare ninye olorere.

⁴⁶Ore pee eorore, nelo aomon to ldoinyo.

⁴⁷Ore etaa teipa, eidipa empeut ashomo empolos e naiposha, netii ninye openy enkop natoyio.

⁴⁸Nedol ajo keekenya lkipaareta lenyena earare enkurtoroto e mpeut amu kenang'are osiwuo ninche. Ore saa naudo e nkewarie nelotu enetii ninche, elo eporito enkare. Neyieu negiroo.

⁴⁹Kake etoduaa ninche Yesu eloito te shumata e nkare nejo ke nkukuu tung'ani, nebuaku aaishir;

⁵⁰amu etoduaa pooki ninye, neiputukuny. Kake eirorie Yesu ninche nabo kata nejoki, “Entagoluoto, nanu doi, emiureisho.”

⁵¹Nejing ninye atua empeut te nebo ninche negira osiwuo. Neing'asia pooki,

⁵²amu eitu ejing'aa enapa kias oo mukateni, kake eitagoloki iltauja lenye.

⁵³Ore pee elang ninche lido kekun, nepuonu enkop e Genesaret, neen empeut te mbata e naiposha.

⁵⁴Ore pee epuku te mpeut neyiolou iltung'ana Yesu teina kata ake.

⁵⁵Nekuet aaman ina kop pooki, neiteru aariku ltung'ana pooki oomuoi too rruatin enye aaya ewueji ake pooki nening'oki aajo etii.

⁵⁶Neaku ore pooki wueji nelo, too nkang'itie, too nkanas kituaak, o teina kop, nerikokini iloomuoyiaa aairragie too wuejitin neemirishoreki, nesai Yesu meishoo eiseyie ninye olcholoi lo lkila lenye; ore lelo pooki ooiseyie neishiunyeki.