Read Maasai Bible – Biblia Sinyati Luka 10 Bible Online

Luka 10 - Maasai Bible – Biblia Sinyati bible

Luka 10

¹Ore te siadi nena, negelu Olaitoriani kulikae tung'ana ntomoni naapishana neirriwaa maare, meturuko nena ang'itie o pooki wueji neyieu neitoki openy alo.

²Ejoki Yesu ninche, “Aisapuk enkikesare kake aikuti ilaisiaayiak, entoomon naa olopeny enkikesare meirriu ilaisiaayiak meetu enkikesare enye.

³Enchom! Airriwaa intae anaa lkuoo le kerra ooirrikini atua suyian.

⁴Emiya embene, aashu nkilani, aashu namuka, nimirorokiki hoo oltung'ani te nkoitoi.

⁵Ore enkaji pooki nijing'ijing'i entang'as entejo, ‘Metijing'a eseriani ena aji.’

⁶Naa te netii oltung'ani onyor eseriani ine netum ninye eseriani inyi, naa te nemetii, neshukokino intae eseriani inyi.

⁷Entotoni teina aji ninyanya, niokioko entoki naba anaa enaishori intae, amu kenare olaasani le siaai olekoisiaayio lenye; emipuo aarukurukoo nkajijik.

⁸Ore enkang pooki nijing'ijing'i neitoomon intae, enosa endaa naishooki intae;

⁹ninchiunyenye iloomuoi ootii nijokiki etinyikua enkitoria e Nkai.

¹⁰Ore enkang nijing'ijing'i nemeitoomon intae, enchom inkoitoi enyena naalala nijojo,

¹¹‘Ore ninye enterit e nkang inyi nikiaata too nkejek ang, kimpiripiroki intae, kake entayiolo nchere, etinyikua enkitoria e Nkai.’

¹²Esipa ajoki intae, ore teina olong e nkiguana, Sodom eikashieki alang enaitaasi ina ang!

¹³“Ee kake ayia iyie Korasin! Ee kake ayia iyie Betsaida! Amu tenaa ketaasaki apa te Tiro o Sidon nena e nking'asia naatasaki tiatua intae, anaata eirridutua apa moitie, neishop lkuniyiani, neelare nkuruon.

¹⁴Kake Tiro o Sidon eikashieki te nkolong e nkiguana aaitalang intae.

¹⁵Oi iyie Kapernaum, eijo shumata kilepieki! Kintadouni shomo enemeneng'a.”

¹⁶Nejoki Yesu lkipaareta lenyena, “Ore pooki oning intae, nanu ening, ore oloany intae, nanu eany, ore olaany nanu, naa ilo laairriwua etanya.”

¹⁷Neshukunye lelo kipaareta ntomoni naapishana o aare te ng'ida. Nejo, “Olaitoriani, ore ebaiki loiriruani, etoning'o iyiook kiaaraa te nkarna ino!”

¹⁸Newaliki Yesu nejoki, “Atoduaa Sheitani esulunye anaa enkiwuang'ata eing'uaa shumata.

¹⁹Enining'o! Aishoo intae enkidimata, metaa indimidimi aaitunyoi ilasuriaa o nkulupani, o engolon pooki e ilo mang'atinta, nemeeta enaiko intae.

²⁰Kake eming'idare ina naning intae iloiriruani; kake enting'idata amu eigero nkarn inyi te keper.”

²¹Ore ina kata ake neshipayu Yesu eiputa Enkiyang'et Sinyati, nejo, “Ashe Papa Olaitoriani le keper o enkop! Amu isudorie kuna baa ilang'eni o loata eyiolounoto niboloki inkera naanana, amu ina eyieunoto e mpiris ino.

²²Nanu eishoo Papa pooki toki, nemeetae oloyiolo Oinoti leme Papa ake, nemeetae oloyiolo Papa leme Oinoti lenye ake, o pooki ng'ae ake ogelu enkerai aboloki ninye.”

²³Neibelekenyakino Yesu lkipaareta lenyena, neirorie too nkurrat nejo, “Emayiana inkonyek naadol kuna nidolitata intae.

²⁴Amu ajoki intae, keyieu apa iloibonok o laiguanak, nedol kuna nidolidolo, kake eitu hoo edol; neyieu apa nening kuna nining'ining'i kake eitu hoo ening.”

²⁵Neinyototo olang'eni obo aikilikuanishore Yesu, eyieu netem, nejoki, “Lo Aiteng'enani, kaji aiko pee ajung enkishui nemeish?”

²⁶Nejoki Yesu, “Kakua baa naaigero too nkitanapat e Nkai? Kejo aa enisuma iyie?”

²⁷Newaliki olang'eni ajoki, “Tonyorra Olaitoriani Enkai ino to ltau lino pooki, o te nkiyang'et ino pooki, o te ng'eno ino pooki, o te ngolon ino pooki, ninyorru o le latia ino anaa eninyor kewan.”

²⁸Nejoki Yesu ninye, “Itawalua aitobiraki, taasa ina pee ibik inchu.”

²⁹Neyieu ninye neitaa kewan asipani, nejoki Yesu, “Ai ng'ae doi ole latia ai?”

³⁰Newaliki Yesu ajoki, “Etadowuo oltung'ani eing'uaa Yerusalem alo Yeriko, neinepu ilaisimak ninye neoru nkilani, near neing'uaa etaa keye.

³¹Nelotu olapolosani aim ina oitoi, ore pee edol nepaash, nelo.

³²Nelotu sii ninye ole Lawi aim ine ore pee edol nepaash, nelo.

³³Kake ore pee elotu Osamariyiai olo sii ninye nkang'itie, ore pee edol neing'urrie.

³⁴Nebaiki neen ilbaa lenyena nebukoki eilata neisho enaisho oo sabibu, neitoki aitaked esikiria enye, nerik enkaji naitoomonishoreki neramat teine.

³⁵Ore pee ekenyu, neitayu dinari are aisho olopeny ina aji nejoki, ‘Ing'ura taa ele tung'ani, ore pooki toki nanya nalusoo te nena, nalotu alak tenashukunye.’

³⁶Kaa idol iyie te lelo tung'ana pokira okuni, kalo otaa ole latia teilo otara ilaisimak?”

³⁷Nejo ninye; ilo oing'urrie ninye. Nejoki Yesu Ninye shomo sii iyie taasa ina.

³⁸Ore epuoito Yesu o lkipaareta lenyena neimaa Yesu enkang namanya enkitok naji Marisa, neitoomon te nkaji enye.

³⁹Neeta enkanashe naji Mariamu, nelotu ina aton too nkejek e Yesu, aton aainining inkiteng'enat e Yesu.

⁴⁰Nenyamalu Marisa too siaaitin enyena kumok, nelotu enetii Yesu nejoki, “Olaitoriani, aimidol ajo emakua te naasisho openy, naapalaki enkanashe ai? Tiaaki naa maaeu aret.”

⁴¹Kake etawalikia Olaitoriani ajoki, “Marisa, Marisa, intanyamaluo nimposha too mbaa kumok;

⁴²kake nabo bae ake naata tipat, ena bae natudutayie Mariamu naisul; nemeyae aaitung'uaa ninye.”