Read Maasai Bible – Biblia Sinyati Luka 13 Bible Online

Luka 13 - Maasai Bible – Biblia Sinyati bible

Luka 13

¹Netii apa kulikae ootii ine ina kata ootolikitio Yesu eneikuna Pilato Ilgalilaya ootara metuata neitushulaki osarge loo lasarri lenye.

²Newaliki Yesu ajoki, “Ijojo pasa ai lelo Galilaya ooata ing'ok aalang ilkulikae Galilaya pooki, eji amu nejia eikunaki enkitamioto?

³Ajoki ntae, mme nejia; kake te neitu iridudu sii ntae nindaayaya aaiko nejia.”

⁴Aashu doi lapa oora tomon o isiet ootuurokine enkaji naado te Siloam near metuata, ijojo pasa ninche larruok aalang ilkulikae pooki oomanya apa Yerusalem?

⁵Ajoki ntae mme nejia; kake te neitu irridudu sii ntae nindaayaya aaiko nejia.

⁶Neinosaki Yesu ninche ena kitanyaanyukoto: “Eeta apa oltung'ani olng'aboli ouno te nkurma enye oo lng'anayio nelotu aing'orunye lng'anayio neitu etumie.

⁷Nejoki oloramat ilng'anayio, ‘Eji larin okuni taata alotu ake aing'orunye ele ng'aboli lng'anayio, nematumie, tudung'o tuuroi; oo pee etumuta empiron e nkop?’

⁸Newaliki ajoki, ‘Tapala, lo kitok, tele ari sii taata, matuturoki napik entulugumi.

⁹Ore pee etoiwuo lng'anayio tele ari olotu naa sidai; kake te neitu, nidung auroo.’ ”

¹⁰Neaku eiteng'enisho apa ninye Yesu te nkaji e ntumo te nkolong e Sabato.

¹¹Netii enkitok naata oloirirua le lepori too larin tomon o isiet; neaku keirrugori meidim ataraposhunye.

¹²Ore pee edol Yesu ninye, neipot, nejoki, “Na kitok, kitooruoki emuoyian ino.”

¹³Neiteleiki nkaik enyena, neraposhunye teina kata. Neisis Enkai.

¹⁴Kake etagore olkitok le nkaji e ntumo te nkaraki naishiunye Yesu olorere te nkolong e Sabato nejoki olorere, “Eetai nkolong'i ile naaishiaakino neasieki esiaai; wootu te nena olong'i meishiunyeki ntae, neme te nkolong e Sabato.”

¹⁵Newaliki taa Olaitoriani nejoki, “Lo sunkuro! Keetae obo linyi lemelaku olkiteng anaa osikiria lenye to lale te nkolong e Sabato, nerik aitook enkare?

¹⁶Paa aimeishiaakino ninye ena kitok, entito e Abraham nateena Sheitani larin tomon o isiet, aimeishiaakino netalakuaki te nkolong e Sabato?”

¹⁷Ore pee ejo nejia, nekurru lelo pooki ooing'orunore; neshipa olorere pooki too mbaa pooki e nkisisa naataasa ninye.

¹⁸Neitoki taa Yesu aikilikuan ajoki, “Kaji eikununo enkitoria e Nkai? Naa kainyoo pasa eitanyaanyukieki?

¹⁹Etiu anaa enkantererai e karadali natuuno oltung'ani te nkurma enye; nebulu aaku olchani, nemany imotonyi ilng'osil lenyena aapik inkajijik enye.”

²⁰Neitoki ake Yesu aikilikuan ajoki, “Kainyoo pasa aitanyaanyukie enkitoria e Nkai?

²¹Etiu anaa enkasuishoi natudumua enkitok neitushulaki mboreitin uni e nkano, o metaba anaa neisuishoyu pooki.”

²²Neimaa Yesu nkang'itie sapuki oo nkutiti neiteng'enisho eloito enkalo e Yerusalem.

²³Nejoki oltung'ani obo, “Olaitoriani, ai kuti pasa lelo oojeu?” Newaliki ninche ajoki,

²⁴“Entonyok eimu kutuk aji napirik; amu ajoki ntae, eyooki lkumok aaing'oru pee eimu nelaikino.

²⁵Ore ake pee eaku einyo olopeny enkaji aiken kutuk aji, ninteruru aaitashoo te boo ioshiosho kutuk aji ijojo, ‘Olaitoriani, tabolu iyiook.’ Newaliki ninye ntae ajoki, ‘Mayiolo nanu ajo kaji ing'uaa.’

²⁶Nintokiki taa aajo, ‘Kitadaate nikitookishote o iyie, ninteng'enishe too nkoitoi ang naalala oo nkanas.’

²⁷Kake kejoki ninye ntae, ‘Ajoki ntae, mayiolo nanu ajo kaji ing'uaa; entalamaki nanu, intae pooki oora laasak loo ntorrok?’

²⁸Ore teine ninchirishiri nionyionyo lala, idolidolo Abraham o Isaak o Yakobo o loibonok le Nkai pooki etii enkitoria e Nkai nimanikiki ate etanang'ayioki ntae auluo.

²⁹Naa kepuonu ltung'ana ooing'uaa enkilepunoto o endoyioroto, o looing'uaa kopikop o moikuape aatoni te misa tiatua enkitoria e Nkai.

³⁰Naa ketii ile siadi ooaku ile dukuya, netii ile dukuya ooaku ile siadi.”

³¹Ore teina saa ake nepuonu embata oo Ilfarisayo, nejoki Yesu, “Inyo shomo te ne amu keyieu Herode nikiaar tua.”

³²Nejoki ninye ninche, “Enchom entiaaki ilo barie, ‘Kaaraa nanu loiriruani naishiunye iltamuoyia taata o taaisere o te nkolong e uni; naidip inkolati aainei.

³³Kake ore etiu nejia enkoitoi ai ake asuj taata o taaisere o idia olong; amu meidimayu metaa kenang oloiboni le Nkai dikae neme Yerusalem.’

³⁴Oi Yerusalem, Yerusalem naar iloibonok le Nkai ninang too soito lelo likirriwakini. Aikat aja pasa ajo aiturrur inkera inono te nebo anaa elukungu naiturrur inkuoo enyena ti abori inaipuko enyena nimiyieu.

³⁵Eitaa Enkai enkaji ino mijooni. Naajoki meekure kintoki aekata adol o tejo, ‘Emayiana ilo olotu te nkarna o Laitoriani!’ ”