Read Maasai Bible – Biblia Sinyati Luka 15 Bible Online

Luka 15 - Maasai Bible – Biblia Sinyati bible

Luka 15

¹Ore lasotok le kodi o laasak loo ng'ok neaku kepuonu aanyikaki Yesu aainining.

²Neing'unyung'uny Ilfarisayo o lasirak aajo, “Keitoomon ele tung'ani ilaasak loo ng'ok neng'arie endaa.”

³Ore te nkaraki ina, neliki Yesu ninche ena kitanyaanyukoto:

⁴“Kalo te ntae laa te neeta intare iip pee eimin nabo, lemeing'uaa kunda ntomoni naaudo o naaudo ti ong'ata, alo aing'oru ina nabo naimina, o menoto ade?

⁵Ore pee etum, neiteleiki oloililai te nchipai.

⁶Ore pee ebau ang, neiturrurru ilchoreta lenyena o elatia enye ajoki ninche, ‘Matishipata, amu anoto enaduoo kerai naimina.’

⁷Ajoki ntae, nejia etiu, ai kitok oleng enchipai natumi te keper to laasani loo ng'ok obo oirridu alang iltung'ana ntomoni naaudo o naaudo supati lemeetayie ninche tipat enkirridunoto.

⁸“Anaa kaa kitok ina, naa te neeta mpisai tomon e nkosholai, pee eimin nabo, nemeinok oltaa neor enkaji neing'oru ade o menoto?

⁹Ore pee etum, neiturrurru nchorueta enyena o elatia ajoki, ‘Matishipata amu anoto enkosholai ai naimina.’

¹⁰Ajoki ntae, nejia etiu, keshipa sii lmalaika le Nkai to laasani loo ng'ok obo oirridu.”

¹¹Nejo Yesu, “Etii apa oltung'ani oata layiok aare;

¹²nejoki oloti menye, ‘Papa, nchooki nanu masaa naaku inaainei.’ Neoriki pokira masaa enyena.

¹³Ore pee elusoo nkuti olong'i, neiturrurru ilo oti masaa pooki naata nemir newalunye mpisai nelo enkop nalakua, nelo aishang'itie masaa enyena teine te nkiwushuush.

¹⁴Ore pee eidip atumuta pooki toki, nelotu olameyu sapuk teina kop, neiteru atir esumash.

¹⁵Ore te nkaraki ina nelo aibung'are olkarsis obo le ina kop, neirriwaa ilo shoo meshomo airrita lbitiro.

¹⁶Neaku nena kinyat naanya lbitiro eng'uar pee enya; nemeetae oloisho toki.

¹⁷Kake ore pee eirrash kewan nejo, ‘Kaja pasa laisiaayiak le papa ooata endaa nanya neleku, kake eji nanu ele oya olameyu te ne!

¹⁸Kainyototo alo enetii papa, najoki: Papa, ataasa eng'oki te Nkai o te dukuya iyie,

¹⁹meekure eishiaakino naaji kara enkerai ino; ntaaki anaa abo le kulo aisiaayiak linono.’

²⁰Neinyototo nelotu enetii menye. Kake ore eton elakua, nedolu menye neing'urrie, nekuetiki aibung ang'utut.

²¹Nejoki olayioni menye, ‘Papa, ataasa eng'oki te Nkai o te dukuya iyie; meishiaakino naaji kara enkerai ino.’

²²Kake etiaaka menye laisiaayiak lenyena, ‘Entasieku olkila oisul, enchopoki; naa entipik olgisoi olkimojino lenye, ninchopokiki namuka nkejek enyena;

²³entereu olkiteng opir enteyieng, ematishipata emating'idata;

²⁴amu ore ena kerai ai ketua apa, nenyaaka apiu.’ Neimina apa, nenyaakaki aatum.

²⁵“Netiooyo ina kata olayioni lenye botor te nkurma; ore pee elotu anyikaki ina aji, nening'oo osinkolio eranyishoi.

²⁶Neipot olaisiaayiani obo aikilikuan enaasitae.

²⁷Nejoki, ‘Eewuo olalashe lino, neyiang'aki papaai lino olashe opir, amu enoto menye eserian.’

²⁸Kake negoro neany ejing'u. Nepuku menye ailejilej.

²⁹Kake etawalikia ninye menye ajoki, ‘She, aaisiaayia nanu iyie kulo arin kumok, neitu ai kata aany aas enikijoki, neitu ai kata kincho nanu olkuoo ninye, pee atum atishipayu tenebo o lchoreta laainei.

³⁰Kake ore pee elotu ele ayioni lino, otumutaka masaa inono malayoni, niyieng'aki olkiteng opir.’

³¹Nejoki, ‘Enkerai ai, itii oshi ake iyie ene natii naa enino entoki pooki naata.

³²Keishiaakino pae duoo niking'ida, nikishipa amu ketua apa ele alashe lino, neishu taata, eimina apa nenotoki.’ ”