Read Maasai Bible – Biblia Sinyati Luka 19 Bible Online

Luka 19 - Maasai Bible – Biblia Sinyati bible

Luka 19

¹Ore pee ejing Yesu Yeriko, nepolos alo.

²Netii oltung'ani oji Sakayo; naa olkitok loo lasotok le kodi, naa karsis.

³Neing'oru enaiko pee edol Yesu ajo ai ng'ae, nelaikino, te nkaraki olorere, amu eidorrop ninye.

⁴Neipirri aituruk neked olng'aboli pee edol Yesu, amu ine wueji, eim ninye.

⁵Ore pee ebaiki Yesu ine neraposhu nkonyek nejoki, “Sakayo, tasieku tadou; amu enkaji ino ade taata alo.”

⁶Nesieku taa nedou neng'amu te ng'ida.

⁷Ore pee edol iltung'ana neing'unyung'uny pooki aajo, “Eshomo meitoomoni te nkaji o ltung'ani aing'okoni.”

⁸Neinyototo Sakayo nejoki Olaitoriani, “Olaitoriani, kaitorit aor imasaa aainei naisho laisinak naa te neetae hoo oltung'ani latooruo toki enye, te nkoitoi nemeishiaakino, nalaaki katitin ong'uan.”

⁹Nejoki Yesu ninye, “Eewuo taata ena olong enjeunoto ena aji, amu ole Abraham sii doi ninye.

¹⁰Amu eewuo Enkerai e Tung'ani aing'oru pee eitajeu ilooimina.”

¹¹Ore einining'ito ltung'ana nena, neitoki Yesu aliki ninche enkitanyaanyukoto, amu etinyikaka ninye Yerusalem naa kejo ninche etaa keibalunyeki enkitoria e Nkai teina kata.

¹²Ore te nkaraki ina, nejoki, “Eshomo olaiguanani obo kitok enkop nalakua meishori enkitoria pee eshukunye.

¹³Neipot isinkan lenyena tomon, neisho ake obo empisai e saabu nejoki, ‘Entaasishore o maeu.’

¹⁴Kake ore te nkaraki naiba ltung'ana le ina kop enye ninye, neitusuj olkilikuai ojo, ‘Mikiyieu neitore iyiook ele tung'ani.’

¹⁵Ore pee eitu, eidipa atang'amai enkitoria, neipot lelo sinkan lenyena apa ootung'eikia mpisai, meetu, pee eyiolou dupoto nanoto te nkinyang'a.

¹⁶Neituruku ole dukuya, nejo, ‘Olaitoriani, enoto ropiyiani inono tomon kulie katitin tomon.’

¹⁷Nejoki, ‘Intobira, osinka supat! Ore te nkaraki nitaa oloisiligayu too nkuti oleng, iyiooki aitore nkanas tomon!’

¹⁸Nelotu ole aare, nejo, ‘Olaitoriani, enoto ropiyiani inono kulie tomon katitin imiet.’

¹⁹Nejoki ilo, ‘Intore sii iyie nkanas imiet.’

²⁰Neitoki alotu likae sinka nejo. ‘Olaitoriani, nena empisai ina e saabu naisudoyie apa te nkarasha;

²¹amu iyie aturia, amu ira oltung'ani ogol pukunoto; odumu ineitu irragie, nidung neme iyie otuno!’

²²Nejoki ninye, ‘Ekaadung'oki naa enkiguana te nkiroroto ino makewan, lo sinka torrono! Iyiolo apa ajo kara oltung'ani ogol pukunoto, odumu ineitu airragie, nasotu ineitu aun?

²³Kaji naa etiu pee eitu ishum mpisai aainei te mbenki, pee te na lotu, natum nena aainei o naaiu?’

²⁴Nejoki lelo ooitashe teine, ‘Entooru ina pisai e saabu naata ninye enchoo elde oata tomon katitin tomon.’

²⁵(Nejoki ninche ninye, ‘Olaitoriani, keeta ninye ropiyiani tomon!’)

²⁶Nejo ninye, ‘Ajoki intae, ore pooki ng'ae oata keponikini aaisho; kake ore elde lemeeta, keoruni ninye ina kiti naata.

²⁷Kake ore ninche kulo mang'ati laainei, apa lemeyieu naitore, eyau entaar metuata tene natii.’ ”

²⁸Ore pee eidip Yesu atejo nejia, negiroo alo ailepaki Yerusalem.

²⁹Neaku ore pee enyikaki Betfage o Betania to Ldoinyo oji oloo Loirienito, neirriwaa lkipaareta lenyena aare,

³⁰nejoki, “Enchom enda ang naipirare intae, ore pee ijing'ijing'i nidolidolo enkurrarru naena, neitu ae kata eked oltung'ani; entalaku nireuu ene.

³¹Naa te neikilikuani intae aajoki, ‘Kainyoo pee ilakuku?’ Entejo nji, ‘Olaitoriani oata enadung'ie.’ ”

³²Nepuo lelo ooirriwayioki neinepu etiu anaa ina natiaaka Yesu.

³³Ore egira aalaku olkurrarru, nejoki lopeny, “Kaji etiu pee ilakuku olkurrarru?”

³⁴Nejoki ninche, “Olaitoriani oata enadung'ie.”

³⁵Nerewaki Yesu, ore pee eirotoki enkurrarru nkilani enye, neitaked ninye.

³⁶Ore eloito etii enchumata osikiria, neisalaash iltung'ana nkilani enye te nkoitoi.

³⁷Ore pee enyiku, to loshong'ishong'i lo Ldoinyo loo Loirienito, neiteru aashipa iltung'ana pooki oo lkipaareta neisis Enkai to ltoilo sapuk too nkiaasin e ngolon naatoduaa.

³⁸Nejo, “Emayiana Olaiguanani olotu te nkarna o Laitoriani, Eseriani te keper naa enkitoo te Nkai!”

³⁹Nejoki kulikae loo Lfarisayo ootii atua olorere, “Olaiteng'enani, intigira lkipaareta linono.”

⁴⁰Newaliki Yesu ajoki, “Ajoki intae, ore te negira kulo nebuaku ninche kulo soito.”

⁴¹Ore pee enyikaki Yesu ina anasa nedol neishiraki;

⁴²nejo, “Ooi te naa iyiolo sii ake tele kekun imbaa naayau eseriani! Kake ore taata keisudoro medol inkonyek inono.

⁴³Amu kepuonu nkolong'i, naman lmang'ati linono oolkerenket, nikipunyaki too nkaloli pooki,

⁴⁴nikinang'ie enkop, iyie taa, o nkera niata tiatua, nemeetae osoit obo tiatua iyie oing'uari eiteleikino olikae; amu eitu iyiolou olkekun likibaikinye Enkai.”

⁴⁵Nejing Yesu enkaji e Nkai neiteru aaraa lelo oomirisho.

⁴⁶Nejoki ninche, “Etisiraki aajo, ‘Ore enkaji ai keaku ene nkomono;’ kake intaa intae enkapune oo laisimak.”

⁴⁷Neiteng'enisho anaa ake te nkaji e Nkai. Neing'oru ilapolosak kituaak, o lasirak o ltung'ana kituaak le ilo orere enaiko pee eidaikie ninye;

⁴⁸kake etalaita enaas, amu eteenikinote ltung'ana pooki irorei lenyena.