Read Maasai Bible – Biblia Sinyati Luka 2 Bible Online

Luka 2 - Maasai Bible – Biblia Sinyati bible

Luka 2

¹Ore te nena olong'i nepuku enkitanapata naing'uaa olaiguanani kitok Kaisari Augustus inchere pee eikeni iltung'ana pooki te nkitoria oo Roma.

²Naa ena enkikena oo ltung'ana e dukuya nataasaki te nkata e Kirinius olgafanai le Siria.

³Neshuko ake oltung'ani enkang enye meigeri.

⁴Nelo sii ninye Yosef te Galilaya aing'uaa enkang e Nasaret, ailep alo enkang e Daudi naji Betlehem amu ole nkaji e Daudi apa te ntalipa,

⁵pee eikeni te nebo enkitok enye, Mariamu, natasayia[1] aa entuaa.

⁶Ore ebikito teine, nebaya inkolong'i pee eisho Mariamu.

⁷Neiu enkerai enye kikau, neishopoki nkilani e keraisho, neirragie ninye te mpeut oo nkishu, amu eitu etum enejing te nkaji oo lomon.

⁸Naa ore teina kop netii apa ilchekuti ootoni arrip intare kewarie.

⁹Neipang'aki olmalaika lo Laitoriani, neimerlelu enkitoo o Laitoriani too nkaloli pooki, neureishoyu ninche oleng.

¹⁰Nejoki olmalaika ninche, “Emiureishoyu amu ilomon supati le ng'ida sapuk ayau naaku too ltung'ana pooki,

¹¹amu ore te nkanasa e Daudi, netoiwuoki Olaitajeunoni, te nkaraki intae, laa ninye Kristo, Olaitoriani.

¹²Naa ele olmonekie te intae: itumutumu elooyo naishopokino nkilani e keraisho, neirragita te mpeut oo nkishu.”

¹³Neboitare ilo malaika, olorora kitok le keper oisisita Enkai aajo,

¹⁴“Meisisi Enkai te shumata naisul te pooki, netumi osotua te nkop, too ltung'ana pooki laa ninche eshipakino ninye!”

¹⁵Ore pee epuo lelo malaika keper aaing'uaa ninche, nejokino ilchekuti, “Enyoito emaape aabaya Betlehem, aadol ena bae nataase naitayiolo iyiook Olaitoriani.”

¹⁶Neisarrisar aapuo neinepu Mariamu o Yosef, nedol eirrag elooyo te mpeut.

¹⁷Ore pee edol ilchekuti ninye neinosu ninche lomon ootiaakaki te nkaraki ina looyo.

¹⁸Ore lelo pooki ootoning'o nena naatolimutuo ilchekuti neing'asia.

¹⁹Kake eiteng'ela Mariamu nena baa pooki edamu to ltau lenye.

²⁰Neshuko lelo shekuti eisho Enkai enkitoo neisis too mbaa pooki naatoning'o o naatoduaa anaa enatiaakaki ninche.

²¹Ore pee eaku enkiting'oto e nkolong e isiet, nemurati neji enkarna enye Yesu, ina arna apa natudung'oko olmalaika eton eitu enutaini.

²²Ore pee ebaya nkolong'i e nkata e nkipooto anaa enatiu too nkitanapat e Musa, neriku ninye Yerusalem pee eitarasakini Olaitoriani,

²³anaa enatisiraki too nkitanapat o Laitoriani nchere, “Ore pooki lee kikau, neng'amari te dukuya Olaitoriani.”

²⁴Nejo sii pee eishooyo olasar anaa enajo nkitanapat o Laitoriani, aa, “Nturkuluoni are, aashu nkera are e nturkuluo.”

²⁵Naa ketii apa Yerusalem oltung'ani oji Simeon, naa oltung'ani apa supat nenyor Enkai, neanyita apa meitajeu Enkai Siraeli. Netii Enkiyang'et Sinya tiatua ninye.

²⁶Neitayiolo Enkiyang'et Sinyati ninye nchere meye eitu edol Olaitajeunoni oisiligie apa Olaitoriani.

²⁷Nelotu enkaji e Nkai, erikito Enkiyang'et Sinyati ninye, ore pee eyaki intoiwuo enkerai Yesu meitaasa anaa entipat oo nkitanapat e Musa,

²⁸neng'amu Simeon Yesu too nkaik enyena, neisis Enkai nejo,

²⁹“Olaitoriani, inchoo taata osinka lino meshomo te seriani, anaa enisiligie.

³⁰Amu etoduaa nkonyek aainei enjeunoto ino

³¹nintobira meibalayu too loreren pooki:

³²ewang'an naboloki loreren enkoitoi ino, neaku errepet oo Siraeli linono.”

³³Neing'asia menye o ng'otonye Yesu te nena naairoroki te nkaraki ninye.

³⁴Nemayian Simeon ninche nejoki Mariamu, ng'otonye Yesu, “Eitaaki ena kerai olobatatare naa olodumunore sii ilkumok ootii Siraeli. Neaku olmonekie le nkai ogilunoreki,

³⁵naa aikiim olalem oltau lino, pee eibalunyeki indamunot oo ltauja kumok.”

³⁶Netii enkoiboni naji Ana entito e Fanuel, o losho le Asheri: naa entasat moruo, naa larin oopishana ake etotona eeta olmoruo.

³⁷Naa enkoliai oo larin ntomoni isiet o oong'uan. Nemepuku tiatua enkaji e Nkai, neen kewan aitupukoo.

³⁸Nelotu ninye teina kata, neisho Enkai enashe, neimaki ina kerai aliki lelo pooki ooanyita metalaku Enkai Yerusalem.

³⁹Ore pee eidip intoiwuo e Yesuaaitabai inaaitanapishoteki pooki, too nkitanapat o Laitoriani, nerrinyo aapuo Galilaya, enkang enye te Nasaret.

⁴⁰Nebulu ina kerai negolu, neiput eng'eno nagut, netii enkirotetisho e Nkai shumata ninye.

⁴¹Kepuo apake ntoiwuo e Yesu Yerusalem to lari ake pooki pee enyiku osirua le Pasaka.

⁴²Ore pee eaku Yesu oloo larin tomon o aare neilep aapuo anaa olkuaak le ilo sirua.

⁴³Ore pee ebaya nkolong'i naashukore, neing'uari enkayioni Yesu te Yerusalem. Neitu eyiolou intoiwuo enyena.

⁴⁴Kake ore ejo ninche etii ake atua encholiek enye, nepuo endama nalulung'a, neing'oru te lelo lo lgilata lenye, o too le latia enye.

⁴⁵Ore pee elau ninye, neshuko Yerusalem aapuo aaing'oru.

⁴⁶Ore etulusoitie nkolong'i uni, netum te nkaji e Nkai, etonita te rishata ilaiteng'enak, einining'ito neikilikuanishore.

⁴⁷Ore ilootoning'o pooki, neing'asia te ng'eno enye o too naawalu.

⁴⁸Ore pee edol intoiwuo enyena neing'asia. Nejoki ng'otonye, “Na kerai; aainyo pee inkuna iyiook inji? King'orutua iyie, nanu o papaai lino te nkirutoto o to sina.”

⁴⁹Nejoki Yesu, “Kainyoo pee king'oruru? Aimiyiololo aajo keishiaakino tenatii enkaji e Papa?”

⁵⁰Neitu eibung ele rorei otiaaka.

⁵¹Nedou Yesu airiamunore ninche nebau Nasaret, nening ninye ninche. Neshum ng'otonye nena baa pooki to ltau lenye.

⁵²Neponari Yesu eng'eno, nebulu, neitiship Enkai o ltung'ana.