Read Maasai Bible – Biblia Sinyati Luka 24 Bible Online

Luka 24 - Maasai Bible – Biblia Sinyati bible

Luka 24

¹Ore te nkolong e dukuya e wiki aa enasirie, nepuo nkituaak enkurare, neshoroo isonkoyoni naaitobira.

²Neinepu osoit eibeleleng'oyioki te nkurare,

³kake ore pee ejing atua neitu etum ilo sesen.

⁴Ore eton eing'asia te nkaraki ina bae, neipang'aki iltung'ana aare ooata nkilani naaimerlel;

⁵ore pee eirut neirrugo aaing'orie nkomomi enye enkop, nejoki lelo lewa, “Kainyoo pee ing'oruru oloishu to lootuata?

⁶Metii ninye ene, kake etopiwuo. Entadamu anaa enatiaka intae, eton etii Galilaya,

⁷nchere, keitarasari ake Enkerai e Tung'ani aaitarasaki inkaik oo looas ing'ok, neshei, nepiu te nkolong e uni.”

⁸Nedamu nena kituaak irorei lenyena,

⁹ore pee errinyo aaing'uaa enkurare neinosaki lelo pokira tomon o obo nena baa neliki sii ilkulikae.

¹⁰Naa Mariamu Magdalene, Yoana o Mariamu ng'otonye Yakobo o nkulie kituaak naatii te nebo ninche naatolikitio lkipaareta kuna baa.

¹¹Kake etotiwuo lelo rorei te ninche anaa le pesho, neaku eitu eiruk ninche.

¹²Kake einyo Petero neipirri alo enkurare; neirrugo aing'or atua, nedol lkarash le kitani eirrag oopeny; nerrinyo alo ang eing'asia te nena naatotiwuo.

¹³Ore teina olong ake epuoito aare loo loiteng'eni enkang naji Emmaus, naa mael naapishana ing'uaa Yerusalem,

¹⁴neimaki pokira aare nena baa naataasate.

¹⁵Ore einosaa lomon eiguana pokira aare, neinepu Yesu openy airiamariyie ninche.

¹⁶Neikeno nkonyek enye pee meyiolou.

¹⁷Nejoki Yesu ninche, “Kakua omon kulo liimakiki ipuopuo pokira aare?” Neitashe, neisinanuo.

¹⁸Ore obo lenye, oji Kleopas, newaliki ajoki ninye, “Keiyie doi ake olomoni te Yerusalem lemeyiolo kuna baa naataasate teine te kuna olong'i?”

¹⁹Nejoki, “Akua baa?” Nejoki ninche ninye, “Mbaa e Yesu le Nasaret, ora apa oloiboni le Nkai ogol too nkiasin o to rorei tialo Enkai o te dukuya ltung'ana pooki

²⁰o enaikuna lapolosak lang kituaak o laitoriak pee eitarasaa metudung'okini enkiguana metari metua, neshei ninye.

²¹Kake kisilig apa iyiook aajo ninye olaku Siraeli. Ee pae naa ore etii nena pooki, enkolong e uni duoo taata anaa neasayu nena baa.

²²Ore sii, eing'asiayie iyiook kulie kituaak e ncholiek ang. Etayookito enkurare duoo enasirie

²³neitu einepu ilo sesen; neshukunye aajoki iyiook eji etoduaa ilmalaika, ootiaakita keishu.

²⁴Nepuo sii kulikae lang enkurare, nepuo ainepu etiu ake anaa ina natolimutuo nkituaak; kake eitu ake edol ninye.”

²⁵Nejoki ninye ninche, “Lo tung'ana moda, nirara yietuti ltauja mirukuruku nena pooki naatejo loibonok le Nkai!

²⁶Keeta apa kata nemeitamei Kristo aaiko nejia pee ejing enkitoo enye?”

²⁷Neiteru too mbukui e Musa o too loibonok pooki, neibalakinye ninche ilkigerot ooipirta enkorrok enye.

²⁸Ore pee eaku kenyikaki ninche ina ang apa napuoito, neiko ninye anaa keyieu negiroo.

²⁹Kake neibok ninche ninye, aajoki, “Irraga iyiook amu emuto netaa kewarie.” Nejing taa aton te nebo ninche.

³⁰Ore enyaita endaa te nebo ninche, nedumu emukate nemayian, negil, neisho ninche.

³¹Nebolo nkonyek enye neyiolou ninye; neimisilori ina kata ake neitu eitoki ninche aadol ninye.

³²Nejokino, “Keitu eyupuyup iltauja lang eirorie iyiook te nkoitoi, eboloki iyiook, ilkigerot?”

³³Neinyototo ake teina saa nerrinyo Yerusalem; neinepu lelo tomon o obo o lelo ooboitare,

³⁴nejoki, “Etopiwuo taa ninye Olaitoriani neipang'aka Simon!”

³⁵Neliki taa ninche nena baa naataasate te nkoitoi, o eneikuna pee eitayiolo kewan ninche ebelaki emukate.

³⁶Ore ejoito ninche nena, neitashe Yesu makewan te mpolos enye, nejoki, “Entaseriana!”

³⁷Kake eirriang'a ninche, neureishoyu, ejo koloip etoduaa.

³⁸Nejoki ninche, “Kainyoo pee inyamalala? Naa kaji etiu pee etii olng'ash iltauja linyi?

³⁹Eng'ura nkaik aainei o nkejek nchere kewan ai, nanu makewan ele; embung'aki pee idolidolo; amu meeta enkiyang'et inkiri o loik anaa kulo lidolitata aata.”

⁴⁰Ore pee ejoki nejia, neitodol inkaik enyena o nkejek.

⁴¹Ore eton ake eitu eiruk te nkaraki eng'ida o nking'asia nejoki ninche, “Iatata tene toki nanyae?”

⁴²Neisho embelati o sinkirri oyiera,

⁴³nedumu nenya te dukuya ninche.

⁴⁴Nejoki ninche, “Ilapa rorei laainei kulo latiaaka intae, eton atii te nebo intae, nchere ore mbaa pooki naatisiraki naaipirta nanu too nkitanapat e Musa o too loibonok le Nkai o to Lkerempe le Nkai, meeta nchere meitabari.”

⁴⁵Nebol iltauja lenye metayiolo ilkigerot,

⁴⁶nejoki ninche, “Etisiraki aajo, keitamei Kristo naa ore te nkolong e uni nepiu aing'uaa lootuata,

⁴⁷naa te nkarna enye elikiori enkirridunoto o empalakinoto oo ng'ok too loreren pooki, neiteruni te Yerusalem.

⁴⁸Irara intae ilchakenini le kuna baa.

⁴⁹Naa kairriwaki intae ilo otejo Papa keisho intae; kake entotoni te na anasa, o meishopokini intae engolon naing'uaa keper.”

⁵⁰Neitoki Yesu arik lkipaareta lenyena o metabaiki Betania, neilepie inkaik enyena nemayian.

⁵¹Ore emayianita ninye ninche, neilep aing'uaa ninche.

⁵²Nerrinyo ninche aapuo Yerusalem te ng'ida sapuk,

⁵³nebik anaa ake te nkaji e Nkai eisisita Enkai.