Read Maasai Bible – Biblia Sinyati Luka 4 Bible Online

Luka 4 - Maasai Bible – Biblia Sinyati bible

Luka 4

¹Neiput Yesu Enkiyang'et Sinyati apa pee errinyunye eing'uaa olkeju le Yordan, Nerik Enkiyang'et ninye ong'ata,

²nkolong'i artam, metetema oloirirua. Neitu enya Yesu ae toki te nena olong'i. Ore pee eishunye nena olong'i netir esumash.

³Nejoki Sheitani ninye, “Te naa ira iyie Enkerai e Nkai, tiaaki ele soit metaa endaa.”

⁴Newaliki Yesu ajoki, “Etisiraki aajo, ‘Mme endaa ake eishuyie oltung'ani.’ ”

⁵Neilepie Sheitani Yesu enchumata o ldoinyo oodo, neitodol enkitoo o pooki e nkop, te nkiti kata,

⁶nejoki Sheitani ninye, “Kaaisho ntoria kuna pooki, o enkitoo enye, amu aaishooki, pee aisho pooki layieu naisho;

⁷metaa te nikiserem iyie nanu neaku ninono pooki.”

⁸Newaliki Yesu ajoki ninye, “Etisiraki aajo, ‘Olaitoriani Enkai ino ake iserema, naa ninye ake isiaai.’ ”

⁹Nerik Sheitani Yesu Yerusalem neitasheyie te ntopij e enkaji e Nkai, nejoki, “Te naa ira Enkerai e Nkai, tusulai kewan,

¹⁰amu etisiraki aajo, ‘ekirriwaki Enkai lmalaika, mikitorripo,’ netejoki sii,

¹¹Eking'amaa too nkaik enye, pee mikinkob osoit enkeju ino.”

¹²Newaliki Yesu ajoki, “Eigeroki aajo, ‘Mitem iyie Olaitoriani Enkai ino.’ ”

¹³Ore pee emitunye Sheitani too ntemat enyena pooki nelo aing'uaa eanyu ai rishata enye.

¹⁴Nerrinyo Yesu Galilaya ebore engolon e Nkiyang'et Sinyati, neibulaa enkisisa enye, nkuapi naamanita ilo kerenket.

¹⁵Neiteng'enisho too nkajijik enye e ntumo nerrep iltung'ana pooki ninye.

¹⁶Neito Yesu Nasaret ine netubulaka, nejing enkaji e ntumo te nkolong e nkiyeng'iyeng'ata, anaa enaiko apake, neitashe aisum ilkigerot.

¹⁷Neishori embuku o loiboni le Nkai Isaya. Nebol ina buku netum ewueji netisiraki aajo,

¹⁸“Etii Enkiyang'et o Laitoriani atua nanu, amu aatubukoko ninye eilata, aput, naairriwua matoliki ilaisinak ororei supat, nalaku te sinkaisho ilooena, naliki lmodook emboloto oo nkonyek enye, nalaku aisho epuo lelo ooitorogonyaki,

¹⁹nalimu olari osarunye Enkai ltung'ana lenyena.”

²⁰Neiken Yesu embuku, neshukoki olashumani neton. Neibelekenya lelo pooki ootoni te nkaji e ntumo aaing'or ninye.

²¹Neiteru ajoki ninche, “Eitabayioki taata kulo sirat ining'itoto too nkiyiaa inyi.”

²²Neimaki pooki ninye aarrep eing'asia too rorei le mpiris ooimu enkutuk enye. Nejo, “Ae mme olayioni le Yosef doi ele?”

²³Nejoki ninye ninche, “Meeta nchere pee eitu kiyiookiki aadung'ie rashe aajoki, ‘Olabaani tabaa kewan,’ nijojo, ‘Taasa sii iyie teine nitubulaka, mbaa naaijo nena nikitoning'o nchere itaasa te Kapernaum.’ ”

²⁴Nejo Yesu, “Esipa ajoki intae, meetae oloiboni le Nkai oyanyiti te murua natubulaka.

²⁵Esipa nchere keetae apa nkolia kumok tiatua Siraeli te nkata o loiboni Eliya, pee elai enchan too larin okuni o lapaitin ile, neibulu olameyu ina kop pooki;

²⁶kake ore eyia, eitu eirriwakini Eliya oltung'ani hoo obo te Siraeli, enkoliai e Sarepta ake eirriwakaki te nkop e Sidon.

²⁷Kumok sii iltung'ana le nkeeya oo lbolot ootae te Siraeli te nkata o loiboni le Nkai Elisha, nemeetae hoo likae obo oishiunyeki, leme Naaman ake le Siria.”

²⁸Ore pee ening iltung'ana nena baa pooki etoni tiatua enkaji e ntumo neiput engoro.

²⁹Neinyototo, nearaa Yesu auluo eina anasa neriku embata e marti nataaniki ina anasa, ejo pee esulaa teina marti;

³⁰kake etapaashare Yesu apolos atua lelo tung'ana nelo ninye.

³¹Nedoyio Yesu alo Kapernaum, enkanasa natii Galilaya, neiteng'en iltung'ana te nkolong e nkiyeng'iyeng'ata naji Pasaka.

³²Neing'asia iltung'ana te nkiteng'enare enye, amu keiro anaa oloata enkitoria.

³³Netii atua ina aji e ntumo oltung'ani oata oloirirua oiduruk. Nebuak aishir to ltoilo sapuk ejo,

³⁴“Ooi Yesu le Nasaret, ainyoo iatakinore iyiook? Iewuo aidaikie iyiook? Kaayiolo ajo ira ng'ae: ira ilo obo Sinyati le Nkai.”

³⁵Neisikong Yesu ilo oirirua nejoki, “Tigirayu! Tupuku tung'uai ninye.” Nebatat ilo oirirua torrono ilo tung'ani te dukuya ninye nepuku aing'uaa meeta enaitaasa ninye.

³⁶Neing'asia iltung'ana pooki nejokino, “Kaa kiroroto ena nairo ele tung'ani? Aaku kearaa te nkitoria o te ngolon iloiriruani ooiduruk, nepuku ninche.”

³⁷Neibulu enkisisa e Yesu pooki wueji te nena murua naamanita.

³⁸Ore pee eing'uaa Yesu enkaji e ntumo nejing enkaji e Simon. Neitirrishaka olkirobi enkaputani e Simon, neomoni Yesu meishiunye.

³⁹Neitashe arumaki ninye kop nearaa ilo kirobi, neishiu olkirobi. Neinyototo nabo kata aisiaai ninche.

⁴⁰Ore edoyio enkolong, neyau lelo pooki ooata ltamuoyia loo mpukunot kumok aayaki Yesu meishiunye. Neiteleiki ake pooki tung'ani nkaik neishiunye ninche.

⁴¹Nepuku sii iloiriruani ooiduruk kumok, aaing'uaa iltung'ana ebuaaya aajo, “Ira iyie Enkerai e Nkai.” Neing'ode amitiki eiro, amu keyiolo ninche aajo Kristo ninye.

⁴²Ore pee ekenyu nelo Yesu ewueji neliyio; kake eing'orutua olorere ninye. Nepuonu enetii, nejo maiboo neing'uaa ninche;

⁴³kake etiaaka ninche, “Kalo ake pee aliki sii ninche kulie ang'itie kulo omon supati le nkitoria e Nkai. Ina pee aairriwuaki.”

⁴⁴Nelikioo lelo omon too nkajijik e ntumo e Yudea.