Read Maasai Bible – Biblia Sinyati Luka 7 Bible Online

Luka 7 - Maasai Bible – Biblia Sinyati bible

Luka 7

¹Ore pee eidip Yesu atoliki nena baa pooki, nejing Kapernaum.

²Nemuoi naleng osinka kirotet lo sajini kitok loo Roma, etaa keye.

³Ore pee ening ilo kitok eimakini Yesu, neirriwaki lpayiani loo Lyahudi meeu ninye aishiunye ilo sinka lenye.

⁴Ore pee epuonu ninche enetii Yesu, neitirrishaki aasai aajoki, “Keishiaakino nintaas ninye ena:

⁵amu kenyor olorere lang, neteshetaka ninye iyiook enkaji e ntumo.”

⁶Neiriamariyie Yesu ninche. Ore etataanikia enkaji enye, neirriwaki ilo kitok loo sikarini ilchoreta lenyena ajoki, “Olaitoriani, mintanyamal kewan, amu maaishiaakino nanu te nijing'u enkaji ai;

⁷nemajo kara hoo ng'ae likilotu anang'are: kake olomoni obo doi ake tejo neishiu osinka lai.

⁸Amu ara sii nanu oltung'ani otii enkitoria, naaitorei, naata sii nanu sikarini laitore. Naitore ele ajoki, ‘Shomo!’ Nelo; najoki elde ‘Wou!’ Nelotu; naitore osinka lai ajoki, ‘Taasa ena!’ Neas.”

⁹Ore pee ening Yesu nena, neing'asia te nkaraki ninye. Neibelekenya, nejoki lelo tung'ana oosujita, “Ajoki intae, eitu ai kata atum enkirukoto kitok naba nji tiatua Siraeli, eitu atum.”

¹⁰Nejo matorrinyoto aji iladuoo ooirriwuaki eishiwuo oladuoo sinka omuoi.

¹¹Ore te nkiti kata nelo Yesu enkanasa naji Nain; neiriamariyie ninye lkipaareta lenyena o lorora kitok.

¹²Ore etii auluo etinyikaka kishomi e ina anasa, nedol enapitai olmeneng'ani aaya, naa ilo otua ake eeta ng'otonye, naa enkoliai; nerubare ltung'ana kumok le ina anasa.

¹³Ore pee edol Olaitoriani ninye neing'urrie nejoki, “Minchir.”

¹⁴Nenyikaki Yesu neiseyie osanduku neitashe lewa oonapita. Nejoki Yesu, “Lo barnoti! Inyo!”

¹⁵Neinyototo ilo duoo otua aton, neiteru airo. Neisho Yesu ng'otonye.

¹⁶Neureishoyu ninche pooki; neisis Enkai nejo, “Einyo oloiboni kitok le Nkai tiatua iyiook,” nejo sii, “Eewuo Enkai abaiki iltung'ana lenyena.”

¹⁷Neibulu enkisisa e ina nataasa Yesu Yudea pooki, o ina kop namanita.

¹⁸Neliki lkipaareta le Yohana, Yohana nena baa pooki naasita Yesu.

¹⁹Neipot Yohana aare le lelo kipaareta lenyena neirriwaki Yesu meikilikuana aajoki, “Aa iyie doi apa olotu? Anaa ai likae kiaanyu?”

²⁰Ore pee epuonu lelo tung'ana enetii Yesu nejoki, “Yohana Olaibatisani oirriwua iyiook enitii ejo, ‘Aa iyie doi apa olotu anaa ai kianyu likae?’ ”

²¹Ore teina kata ake neishiunye Yesu iltung'ana ooata nkeyaitin o muoyiaritin kumok, nearaa nkiyang'eta torrok. Ore ilmodook kumok nebol inkonyek nedolishoyu.

²²Newaliki Yesu ninche nejoki, “Enchom entoliki Yohana kuna nitoduaa o nitoning'o; etodolishote ilmodook, nepuo lmaiman, neishiunyeki aasik ilooata enkeeya oo lbolot, nening'ishoyu lming'anta, neitopiuni ilootuata, nelikini laisinak ororei supat.

²³Emayiana ilo tung'ani lemetum olkob te nanu.”

²⁴Ore eidipa aashom ilkipaareta le Yohana neiteru Yesu ainosaa Yohana to lorere nejo, “Kainyoo nawa intae enchom entodol ti ong'ata? Kolperesi oyuk enkijape?

²⁵Mme ninye? Kainyoo naa ishomo intae aadol? Ko ltung'ani oishopito nkilani naapuyiapui o naaitintil? Nkang'itie oo laiguanak etumieki lelo ooishop nkilani naapuyiapui o ne nkuso.

²⁶Kake kainyoo doi ishomo aadol? Koloiboni le Nkai? Ee pae naa kelang ninye oloiboni le Nkai.

²⁷Ninye doi eimakita lkigerot aajo, ‘Nele olkipaaret lai laiturukie te iyie, olaa ninye likintobiraki enkoitoi ino.’

²⁸Ajoki intae, kitok Yohana alang pooki tung'ani oiu enkitok kake ore eyia, ore olobayie te nkitoria e Nkai naa kitok alang ninye.”

²⁹Ore pee ening iltung'ana pooki o loosotu kodi neitadedeyie Enkai amu eibatisaki te nkibatisare e Yohana.

³⁰Kake etanyaita ninche Lfarisayo o laiteng'enak loo nkitanapat enayiewuaki Enkai amu etanyaita ninche maate eibatisa Yohana.

³¹Nejo Yesu, “Kainyoo atemaki kulo tung'ana le kuna olong'i? Kainyoo enyaanyukie?

³²Kenyaanyukie nkera naatoni te nemirishoreki, naaipotuno ejo, ‘Kitooshokito intae ndulen, neitu iranyishosho; nikinchirakita intae, neitu nchirishiri.’

³³Amu eewuo Yohana Olaibatisani neitupukoo kewan, nemeok enaisho oo sabibu; nijojo intae, ‘Keeta oloirirua.’

³⁴Eewuo Enkerai e Tung'ani nedaa neokisho; nijojo, ‘Eng'ura oltung'ani oulu, naa olamerani, naa olchore loo loosotu kodi o laing'okok!’

³⁵Ore naa eng'eno e Nkai, neitadedeyie pooki oora inkera enyena.”

³⁶Neipot oltung'ani obo loo Lfarisayo Yesu pee eitoomon te nkaji enye. Nejing Yesuenkaji e ilo Farisayoi neton anya endaa.

³⁷Netii enkitok ina anasa, naa enkaasani oo ng'ok. Ore pee eyiolou ajo einosita Yesu endaa te nkaji e ilo Farisayoi, neyau oltulet lo soit oji alabasta le ilata narropil,

³⁸neitashe te siadi ninye too nkejek, e Yesu, neiteru aituku nkejek enyena too lkiyio, nejut too lpapit le endukuya enye, neng'utut nkejek enyena, neelie ina ilata.

³⁹Ore pee edol ilo Farisayoi oitoomono Yesu nejo to ltau, “Te naa koloiboni le Nkai ele tung'ani anaata etayiolo ajo aing'ae anaa kaa pukunoto e nkitok ena naibung ninye!”

⁴⁰Neirorie Yesu nejoki, “Simon, kaata embae naaliki.” Nejoki, “Ee Olaiteng'enani.”

⁴¹Neliki Yesu ena kitanyanyukoto, “Eisilenoko oltung'ani iltung'ana aare indinari[2] enyena, neisho obo indinari iip imiet, neisho olikae onom.

⁴²Ore pee elau pokira aare entoki nalakie, nepalaki pokira aare. Amaa te pokira aare, kalo onyorru ninye oleng?”

⁴³Newaliki Simon ajoki, “Amen ajo, elde otapalakaki nkumok.” Nejoki Yesu, “Itisipa ewalata.”

⁴⁴Neibelekenyakino Yesu enkitok, nejoki Simon, “Idol ena kitok? Aewuo enkaji ino neitu kincho enkare oo nkejek; kake aaitashala ena kitok inkejek aainei too lkiyio nejut too lpapit lenyena.

⁴⁵Eitu king'utut; ore ninye, anaa duoo pee ajing'u eitu aapal maang'utut inkejek aainei.

⁴⁶Eitu kiel endukuya te ilata, kake aaela ninye nkejek te na ilata.

⁴⁷Aajoki naa te nkaraki ina, etapalakaki ng'ok enyena, aa kumok, amu etonyorrishe oleng, amu ore doi olopalakini nkuti naa kiti enyorrata enye.”

⁴⁸Nejoki Yesu ina kitok, “Kitapalakaki ing'ok inono.”

⁴⁹Ore lelo ootoni aadaa te nebo ninye neiteru aajo maate, “Ai ng'ae ele eji opalaki oltung'ani ng'ok?”

⁵⁰Nejoki ina kitok, “Kintajewuo enkirukoto ino; shomo te seriani!”