Read Maasai Bible – Biblia Sinyati Enkigilata oo Nkitanapat 23 Bible Online

Enkigilata oo Nkitanapat 23 - Maasai Bible – Biblia Sinyati bible

Enkigilata oo Nkitanapat 23

¹“Ore ilo lee pooki oidong'oki aashu ilo otudung'ori elewaisho nemejing atua eumata o Laitoriani.

²“Meetae olotaluno ojing atua eumata o Laitoriani; ometabaiki eishoi e tomon meetae obo leishoi enye olo ajing ina umata o Laitoriani.

³“Meetae oltung'ani loo Lamoni aashu ole Moab olo ajing eumata o Laitoriani, ore ninye ebaiki eishoi e tomon meetae obo lenye olo ajing atua eumata o Laitoriani ntarasi;

⁴te nkaraki neitu apa ninche kintanang'are iyie enkare o endaa te nkoitoi, ina kata apa pee ipuku aing'uaa Misiri, o te nkaraki nayautua Baalam olayioni le Beor aaitung'uaa Petor e Mesopotamia meeu adek intae.

⁵Ore ake eyia mening Olaitoriani Enkai ino Balaam; kake eibelekenya Olaitoriani Enkai ino ilo deket metaa emayianata te iyie, amu eikinyor iyie Olaitoriani Enkai ino.

⁶Ming'orunye ninche eseriani aashu karsisisho too nkolong'i inono pooki intarasi.

⁷“Mimenaa ilo tung'ani le Edom amu olalashe lino; nimimenaa oltung'ani le Misiri amu ira apa iyie olomoni te nkop enye.

⁸Ore nena kera eishoi e uni naaikini ninche neidim aatijing eumata o Laitoriani.

⁹“Tenilo iyie aarare ilmang'ati linono nijing atua ilng'oborri lenye, nigolie naa kewan te pooki toki torrono.

¹⁰Tenetii atua intae oltung'ani lemesinya te nkaraki enataase te ninye kewarie, nchoo naa eipang ninye alo auluo, mejing'u ninye atua ilng'oborri;

¹¹kake teneaku enteipa, neituku kewan te nkare, ore pee edoyio enkolong neidim ninye atijing'u atua ilng'oborri.

¹²“Ntobira ewueji tiauluo nepuoyieki ntonat.

¹³Tanapa sii enchata napi tenebo iyie; peyie tenilo atonie enkop, niturunye engumoto, nintoki anukaa nena kik inono.

¹⁴Amu keloolo Olaitoriani Enkai ino te mpolos oo lng'oborri linyi, pee eitajeu intae neirragie ilmang'ati linyi te dukuya intae, metaa enchoo ilng'oborri linyi esinyayu pee medol ake ninye entoki suuji tiatua intae, neibelekenya aing'uaa intae.

¹⁵“Mincho ake olkitok ilo rrindik lenye apa oisika aing'uaa ninye nelotu enitii;

¹⁶nchoo ninye eton tenebo iyie, tiatua intae, teine wueji negelu ninye tiatua nabo oo nkang'itie inyi, teine neitiship ninye oleng; nimimbooki ninye enkop.

¹⁷“Meetae olayioni le Israel olo aiborrie onyek tiatua enkaji Enkai, nemeetae entito e Israel nalo aiborrie onyek tiatua enkaji Enkai.

¹⁸Miyau mpisai e laakinoto e mulayoi, anaa elaakinoto oldia atua enkaji o Laitoriani Enkai ino, alakie olmumai ake ninye pooki amu ore kuna pokira naa olminong to Laitoriani Enkai ino.

¹⁹“Misilenoki iyie te dupoto olalashe lino, te dupoto oo mpisai, aashu te dupoto e ndaa aashu te dupoto e pooki toki ake ninye.

²⁰Ore to ltung'ani leiking'a indim iyie aisilenoki te dupoto kake ore to lalashe lino misilenoki te dupoto; pee kitum Olaitoriani Enkai ino atamayiana teina pooki nilo aas teinakop niloito aya.

²¹Teninya olmumai to Laitoriani Enkai ino, miyiata te laata, amu keikilikuanu tukul Olaitoriani Enkai ino te iyie, naa keaku eng'oki teyie.

²²Kake tenilam enkinosata o lmumai, nemeitoki aaku eng'oki te iyie.

²³Ing'ura pee intabaya ina naimua enkutuk ino, amu te yieuna ino inosie olmumai Olaitoriani Enkai ino teina nisiligishore te nkutuk ino.

²⁴“Tenilo atua enkurma oo lng'anayio eilo tung'ani le latia ino, nindim ainosa ataraposhoyu ilng'anayio, ilo oba anaa liyieu, kake mipik ake hoo obo olbene lino.

²⁵Tenilo iyie atua enkurma eilo tung'ani le latia ino, indim atigilu e ntapa te nkaina ino, kake midung te nkalem ina kurma oltung'ani le latia ino naitashe.