Read Maasai Bible – Biblia Sinyati Enkigilata oo Nkitanapat 24 Bible Online

Enkigilata oo Nkitanapat 24 - Maasai Bible – Biblia Sinyati bible

Enkigilata oo Nkitanapat 24

¹“Teneya oltung'ani enkitok ayam, nelo neaku eitu etum omom too nkonyek enyena te nkaraki natoduaa ninye embae suuji te ninye, neigeroki ilo moruo ninye empalai eoro nepik enkaina enye, nearaa ninye aitung'uaa enkaji enye, nelo ina kitok te nkaji enye.

²Tenelo ninye aaku enkitok e likae moruo,

³ore ilo likae nemenu ninye neigeroki empalai eoro nepik enkaina enye nearaa ninye te nkaji enye, tenelo neye ilo moruo le siadi apa oowa ninye aitaa enkitok enye,

⁴ore ilo moruo apa le dukuya otaarayie ninye meshomo, nemeidim anyaaki aawa ninye ayama eidipaki aatipik olduruk. Amu olminong ilo te dukuya Olaitoriani, nemeishiaakino teniyauu entorroni shumata ena kop naishoo intae Olaitoriani Enkai inyi entujung.

⁵“Ore aa enayamishore oltung'ani, nemeishaakino ninye nelo enjore aashu ae siaai; nchoo ninye eton tiang olari obo, pee eshipa tenebo o ina kitok enye nayama.

⁶“Meetae oltung'ani oen osoit oidong'ishoreki liabori aashu le shumata; amu keaku enkishui eteena.

⁷“Teneibung'i oltung'ani etupurroyie obo loo lalashera lenyena, lelo tung'ana loo Siraeli, naa tenelo aiko ninye anaa orrindik aashu emir ninye, neari ilo apurroni metua; pee itum aiwuang'ie entorroni te mpolos inyi.

⁸“Tenikijing enkeeya oo lbolot, toduaa pee, ias te risioroto e nena pooki nikiutaki lelo apolosak loo Lawi; anaa apa enaitanapa nanu ninche, ina taasa.

⁹Tadamu ina apa naitaasa Olaitoriani Enkai inyi Miriam ina kata te nkoitoi ipuonunu aaing'uaa Misiri.

¹⁰“Tenisilenoki olelatia ino entoki ake ninye e ae pukunoto, milo iyie enkaji enye aya entoki nalak esile.

¹¹Ntasho iyie tiaulou, ore ilo tung'ani lisilenoko, nikiyaki ninye entoki alak ina sile.

¹²Naa tenaa oltung'ani aisinani, nimirrag iyie iata ina toki enye nalakie esile.

¹³Tenedoyio enkolong nirrinyoki iyie ina toki enye nalakie esile, pee etum ninye airraga eeta olkila lenye nikimayian ninye iyie, naa keaku ina esupatisho te iyie te dukuya o Laitoriani Enkai ino.

¹⁴“Mimbooki enkop olaisiaayiani aisinani oigeroki aa obo loo lalashera linono aashu aa obo loo lomon ootii enkop inyi, atua nkang'itie inyi;

¹⁵nchoo ninye olekoisiaayiolenye te nkolong naishiaakino, eton eitu edoyio enkolong (amu oltung'ani aisinani ninye ina eisiliga oltau lenye); pee mikinchiraki ake to Laitoriani, neaku eng'oki te iyie.

¹⁶“Meari ilpayiani metuata te nkaraki inkera enye, nemeari nkera metuata te nkaraki iloo menye; oltung'ani ake eari metua te nkaraki eng'oki enye makewan.

¹⁷“Mimbelekeny esipata teilo tung'ani omoni, aashu teilo okishi aashu iya olkila le nkoliai te enata e sile;

¹⁸kake tadamu nchere ira apa iyie orrindik te Misiri nikikordu iyie Olaitoriani Enkai ino ainyiang'u teine; metaa kaaitanap nanu iyie taasa ena.

¹⁹“Teninturrur enkurma ino aikesu, nikirikino ilkuti ng'osil loo lukuny tiatua enkurma, mirrinyo alo ayau; nchoo eaku oleilo tung'ani omoni o lokishi o enkoliai; pee kitum Olaitoriani Enkai ino atamayiana te siaai pooki oo nkaik inono.

²⁰Tenirrarru ilng'anayio linono, mingil arrarru aishu; nchoo eaku ileilo tung'ani omoni o lokishi o enkoliai.

²¹Tenisotu isabibu linono mingil asotu ilootelekutua nchoo eaku ileilo tung'ani omoni o lokishi o enkoliai.

²²Tadamu nchere ira apa iyie orrindik tiatua enkop e Misiri; metaa kaaitanap nanu iyie taasa ena.