Read Maasai Bible – Biblia Sinyati Enkigilata oo Nkitanapat 26 Bible Online

Enkigilata oo Nkitanapat 26 - Maasai Bible – Biblia Sinyati bible

Enkigilata oo Nkitanapat 26

¹“Tenilotu kenya ina kop nikincho Olaitoriani Enkai ino tujung'o niya iyie ina kop, nimany,

²iwa embata e lelo ng'anayio le dukuya le nkop, lelo linkesua teinakop nikinchoo iyie Olaitoriani Enkai ino, nipik iyie ninche enkikapu, nilo iyie ine wueji negelu Olaitoriani Enkai ino, pee eitamany enkarna enye ine.

³Nilo iyie enetii ilo apolosani oasisho teina kata, nijoki ninye, ‘Aibalie nanu ena olong to Laitoriani nchere, atabaua atua ina kop apa nainosie Olaitoriani olmumai too loo papa pee eisho iyiook.’

⁴Neya olapolosani enkikapu too nkaik inono neirragie te dukuya olperere lo lasar lo Laitoriani Enkai ino.

⁵“Niwalu iyie te dukuya Olaitoriani Enkai ino, ajo ‘Oltung'ani le Aramea alotoni apa papa, nedoyio ninye alo Misiri nebik teine, naa eikuti apa ninche, nebul teine neaku olosho, ogol, magilani naa kitok.

⁶Neisorutuo apa iyiook iltung'ana le Misiri, neisomit iyiook, neiteleiki shumata iyiook rrindikisho nagol.

⁷Nikinchiraki iyiook Olaitoriani Enkai oo loo papa nening Olaitoriani oltoilo lang, nedol enkitamioto ang, o eyekenyata ang, o enkitorogonyata ang;

⁸eyaua iyiook Olaitoriani aitupuku te Misiri te nkaina magilani o te nkaina naitoriori o te nkiputukuny kitok o too nkitoduaat o mbaa e nking'asia

⁹neyau ninye iyiook atua ene wueji neisho iyiook ena kop, enkop naruko naishi o kule.

¹⁰Naa ore taata ayawua nanu ilng'anayio le dukuya lena kop, naa iyie Olaitoriani likinchoo nanu.’ Niragie te dukuya Olaitoriani Enkai ino; niserem te dukuya Olaitoriani Enkai ino.

¹¹Ning'idayu iyie te nena pooki supati nikinchoo iyie Olaitoriani Enkai ino o lmarei lino, iyie o Lawi o ilo tung'ani omoni otii atua intae.

¹²“Ore tenindip aitayu e matua pooki e tomon oo nkishorunot inono e nkikesare to lari liokuni, aa ninye olari oitayunyeki e matua e tomon eishori Olawi o lomoni o lokishi o enkoliai pee etum ninche aainosa tiatua inkang'itie inyi neraposho,

¹³nitum taa atejo te dukuya Olaitoriani Enkai ino, ‘Aiwuang'ie nanu ina rubata nasinya tiatua enkaji ai, naidipa aishoo Olawi o Lomoni o Lokishi o enkoliai, te risioroto eina kitanapata pooki nikintanapa iyie nanu; eitu nanu agil nabo oo nkitanapat inono neitu aarikino nabo.

¹⁴Eitu nanu anya ae nabo e matua e tomon ina kata aishirita to sina; aashu aiwuang'ie nabo enye ina kata aata olminong, aashu aisho ae nabo ilootuata; atoning'o nanu oltoilo lo Laitoriani Enkai ai, ataasa nanu te risioroto e nena pooki nikintanapa nanu.

¹⁵Ng'ura itii emanyisho ino sinyati, itii shumata, nimayian iltung'ana linono Israel o ena kop ninchoo iyie iyiook, anaa apa eninosie olmumai too loo papa, enkop naruko naishi o kule.’

¹⁶“Ore ena olong kintanapa iyie Olaitoriani Enkai ino pee ias kuna kitanapat o nkikoot. Toduaa naa pee ias ninche to ltau lino pooki o te nkishui ino pooki.

¹⁷Indipa iyie aibalunye ena olong tialo Olaitoriani nchere ninye Enkai ino, naa ilo iyie too nkoitoi enyena o nkitanapat enyena o nkikoot enyena naa eilo aning oltoilo lenye.

¹⁸Neibalunye Olaitoriani ena olong tialo iyie nchere ira olorere lenye makewan, anaa apa enaisiligie intae, naa imbung'ubung'u intae inkitanapat enyena,

¹⁹pee etum ninye ailepie intae te shumata lelo oshon pooki ooitobira, te nkisisa o to lning'o o te nkanyit naa iakuku sii olorere osinya to Laitoriani Enkai inyi anaa enairoro ninye.”