Read Maasai Bible – Biblia Sinyati Enkigilata oo Nkitanapat 28 Bible Online

Enkigilata oo Nkitanapat 28 - Maasai Bible – Biblia Sinyati bible

Enkigilata oo Nkitanapat 28

¹“Naa tinining iyie oltoilo lo Laitoriani Enkai ino, ning'or pee ias nena kitanapat pooki naaitanapa nanu iyie ena olong, nikilepie ninye iyie Olaitoriani Enkai ino aitulusoo tenining iyie too loreren pooki le nkop.

²Ore kuna mayianat pooki naa kepuonu shumata iyie, nedooyo tenining oltoilo lo Laitoriani Enkai.

³“Eikimayian iyie tiatua enkanasa, nikimayiani iyie tiong'ata.

⁴“Kemayiani ilng'anayio lo sesen lino, o lng'anayio le nkop ino o lng'anayio loo nkishu inono, o ina ponunoto oo nkerrai inyi.

⁵“Kemayiani olbene lino o ina tapa ino naipurjaki.

⁶“Eikimayiani iyie ijing'u o impang auluo.

⁷“Keisho Olaitoriani lelo mang'ati linono likidumakino iyie metimirari ninche te dukuya iyie; eikipuonu ninche aadumakino eimu enkoitoi nabo neisik te dukuya iyie eim, inkoitoi naapishana.

⁸Keirriu Olaitoriani imayianat shumata ino tiatua ilchumat linono o leina pooki nias iyie; nikimayian iyie teinakop nikincho Olaitoriani Enkai ino.

⁹Keitubul intae Olaitoriani pee iakuku iltung'ana sinyat te nkaraki kewan enye, anaa apa enainosa olmumai te intae, tenimbung'ubung'u inkitanapat o Laitoriani Enkai inyi, nipuopuo too nkoitoi enyena.

¹⁰Ore iltung'ana le nkop pooki nedol nchere eipotoki intae te nkarna o Laitoriani; naa keureyu ninche intae.

¹¹Naa eikincho iyie Olaitoriani tudupoyu te karsisisho o too lng'anayio lo sesen lino o too lng'anayio loo nkishu inono o too lng'anayio le nkop ino tiatua ina kop nainosie Olaitoriani olmumai too loo papaai lino pee kincho iyie.

¹²Eikiboloki iyie Olaitoriani olchumati lenye le shumata, pee eishoru enchan te nkop ino too rishat enyena, nemayian esiaai oo nkaik inono; neaku isilenoki iyie inkuapi kumok kake misilenu iyie.

¹³Naa eikintaa iyie Olaitoriani endukuya, mme olkidong'oe, naa eilepu ake alotu shumata, nimidoyio; tenimbung nena kitanapat o Laitoriani Enkai ino, naaitanap nanu iyie ena olong, ing'ura pee ias ninche,

¹⁴nimimbelekenya tiobo le kulo rorei laaitanap nanu iyie ena olong, alo enkalo e tatene aashu ene kedianye, alo asujaa kulie aitin aisiaai ninche.

¹⁵“Kake tenimining iyie oltoilo lo Laitoriani Enkai ino aashu teniming'or pee ias inkitanapat enyena pooki o nkikoot enyena naaitanap nanu iyie ena olong, ore kulo deketa pooki nepuonu shumata iyie.

¹⁶Aikideki iyie te nkanasa nikideki ti ong'ata.

¹⁷Etediaaki enkikapu ino netediaaki ina toki ino naipurjishoreki.

¹⁸Etediaaki ilng'anayio lo sesen lino o lng'anayio le nkop ino, o ina ponaroto oo nkishu inono o le lelo loo ntare inono.

¹⁹Kitediaki iyie tenijing'u, nikitediaki tenimpung.

²⁰“Kepik Olaitoriani shumata iyie ildeketa o lmilo, osina tenena pooki nilo iyie aas, ometaba anaa nikindaikieki nindaaya asioki, te nkaraki entorroni oo nkiaasin inono te nkaraki nikitung'uayie iyie nanu.

²¹Keisho Olaitoriani olmeitai mikindikidikore ometaba anaa nikimut aishu teinakop niloito aya.

²²Eikiosh iyie Olaitoriani te njipai o lgoo o to lkirobi o te ng'ion o te nkiyupuyup enkima o to lameyu o too oshot o too nkirondoni, nikisuj iyie kulo meita, o metaba anaa nindaaya.

²³Ore oloing'ang'e neaku osuyai, ore enkop tiabori iyie neaku esekenkei.

²⁴Keitaa Olaitoriani enchan eina kop ino empunyua o enterit, nikidoiki iyie te shumata ometaba anaa nikindaikieki.

²⁵“Eikincho iyie Olaitoriani mikitimira ilmang'ati linono, nimimpang iyie alo aim enkoitoi nabo alo aarare ninche, nisikisiki aaim inkoitoi naapishana te dukuya ninche; naa ipuopuo intae aaku entaboi e nking'asia too nkitoriat pooki enkop.

²⁶Ore impopoki inyi neaku endaa too motonyi o loing'ang'e o too lowuarak le ntim; nemeitokini aata hoo obo oiture ninche meshomo.

²⁷Eikiosh iyie Olaitoriani too ldututa le Misiri oo too nkirondoni o too lpepedo o te ng'ion nemeishiunoyu.

²⁸Eikiosh iyie Olaitoriani to loirirua o te modoo o te miloi oo ndamunot;

²⁹naa ilo iyie irrapirrapisho dama, anaa enairrapirrapisho oltung'ani modooni te naimin, nimidupoyu iyie too nkoitoi inono; naa keaku eikintorogonyi nikipurri anaake, nemetumi hoo obo likiretu iyie.

³⁰Isai iyie enkitok, nelotu likae lee ayiolou; nishetu enkaji kake mimany, niun enkurma oo sabibu kake minya isabibu lenye.

³¹Keyieng'i olkiteng lino te dukuya inkonyek inono, niminya iyie inkiri enyena. Ore osikiria neisimari aaya te dukuya enkomom ino, nimikirrinyokini iyie; ore nkerra inono neishori ilmang'ati linono, nemetii hoo obo likiretu iyie.

³²Ore ilayiok linono o ntoyie inono naa keishori likae orere, eing'orita inkonyek inono, omeiliilai eyieu ninche endama pooki; nemetii engolon e nkaina ino pee eibooyo ina.

³³Ilo osho limiyiolo iyie olotu anya lelo ng'anayio le nkop ino o le siaai ino pooki, naa iaku ake oloibookini enkop o loinyali anaake,

³⁴ometaba anaa nikijing oloirirua teina nadol inkonyek inono.

³⁵Eikiosh Olaitoriani nkung o lorroki too ldututa torrok lemikindimi aaishiunye, ebaiki endap enkeju ino ometabaiki enerang'irang te ndukuya ino.

³⁶“Eikiyaki iyie Olaitoriani, oilo aiguanani litipika shumata ino ilo osho leitu aekata iyiolou neitu eyiolou loo papaai linyi, ore teine nisiai kulie aitin oo nkeek o noo soito.

³⁷Naa ilo iyie aaku entoki naimakini, endung'et e rashe o entoki naimakini tiatua iloreren pooki teine nereu intae Olaitoriani.

³⁸Iya iyie ilanterera kumok aun te nkurma, naa ilkuti ake ilo aikesu tiatua amu kelotu olmaati nemut ninche.

³⁹Iun iyie nkurman oo sabibu nintobir ninche, kake miok iyie enaisho enye, niminturrur ilng'anayio amu kelo anya olkurto tiatua enkop inyi pooki.

⁴⁰Ilo iyie atum iloirienito tiatua enkop ino pooki, kake miyelare eilata enye, amu kerrarrunye ilng'anayio lenye.

⁴¹Iiu iyie ilayiok o ntoyie, kake meaku ninche ninono, amu keyae ninche aaraya.

⁴²Ore ilkeek linono pooki o lng'anayio le nkop ino naa keaku ilo lmaati.

⁴³Ore ilo tung'ani omoni otii atua intae naa keilepieki meeu shumata iyie oleng nidou iyie alotu abori oleng.

⁴⁴Eikisilenoki ninye kake misilenoki iyie ninye; keaku ninye endukuya niaku iyie olkidong'oe.

⁴⁵Ore kulo deketa pooki naa kepuonu shumata iyie nikisuj nikigiroo iyie, ometaba anaa nikindaikieki, te nkaraki neitu ining oltoilo lo Laitoriani Enkai ino, aibung inkitanapat enyena o nkikoot enyena apa nikintanapa ninye iyie.

⁴⁶Kepuonu ninche shumata iyie anaa enkitoduaata o enking'asia o shumata eishoi ino ntarasi.

⁴⁷“Ore te nkaraki neitu iyie isiai Olaitoriani Enkai ino te ng'ida o te nchipai o ltau lino, te nkaraki enkumoi oo masaa,

⁴⁸ore naa ilo iyie aisiaai lelo mang'ati linono likirriwaki Olaitoriani mikietu aar, te sumash o te nkure, te masipaisho o te yieunoto oo ntokitin pooki; naa kepik ninye enapet e sekenkei emurt ino ometaba anaa nikindaikie ninye.

⁴⁹Eikirriwaki iyie Olaitoriani olosho likilotu aarare eing'uaa enelakua, eing'uaa eneiting'ie enkop, olosho oneneng anaa olmotonyi olo ti ai, ilo osho limiyiolo iyie enkutuk enye.

⁵⁰Olosho ogogong lemeshilaa likae tung'ani moruo nemeing'urrie oloti,

⁵¹naa kepuo aanya ilasho loo nkishu inono o lng'anayio le nkop ino, ometaba anaa nikindaikieki ilo osho sii limikilekaki iyie entapa aashu enaisho oo sabibu aashu eilata aashu emponaroto oo nkishu inono aashu ilkuoo loo ntare inono ometaba anaa nikindaikie ninche.

⁵²Eikimuat ninche aaman too nkang'itie inono pooki, ometaba anaa neurori nena sunta inono adoru naagol apa nisiliga tiatua enkop ino pooki, nikimuat ninche aaman too nkang'itie inono pooki, tiatua enkop ino pooki apa nikinchoo Olaitoriani Enkai ino.

⁵³Naa ilo iyie anya eishoi o sesen lino makewan, nkiri oo layiok linono o ntoyie, nena nikinchoo Olaitoriani Enkai ino, teina nikimani aamuat o to sina likipik ilmang'ati linono.

⁵⁴Ore ilo lee biyoto oitubuluaki te supatisho te ntae keroku oshoke tialo olalashe lenye, o te nkitok enye o teilo pisiai otelekua loo nkera enyena;

⁵⁵ometaa meisho ninye nabo oo nena kiri oo nkera enyena naainosita ninye, amu meetae entoki natelekakaki ninye, teina namani aamuat o teilo sina oisomit intae ilmang'ati linyi tiatua nkang'itie inono pooki.

⁵⁶Ore ina kitok biyoto neitubuluaki te supatisho, neitu aekata eroro enkop eji amu eisikarre negogong'u ninye tialo olmoruo lenye, o te nkayioni enye o te ntito enye.

⁵⁷Ore ina mudong naimua erishata oo nkejek enyena, o nkera enyena naatoiwuo ninye, neisudoo pee errinyokino anya, amu kaa naa easi teina namani aamuat enkang o to sina likisomit iyie ilmang'ati linono too nkang'itie inono.

⁵⁸“Teniming'or iyie pee ias kulo rorei pooki lena kitanapata ooigero tena buku pee itum aturia ena arna kitok naitureisho o Laitoriani Enkai ino,

⁵⁹nikirriwaki iyie Olaitoriani o eishoi ino ilmeita le nking'asia, ilmeita torrok oobik o emuoyian torrono nabik.

⁶⁰Naa aikintoki ninye airriwaki iyie imuoyiaritin pooki e Misiri, nena apa niure; naa eikisuj ninche.

⁶¹O pooki muoyian sii o pooki meitai le meigero tena buku oo nkitanapat, eikirriwaki iyie Olaitoriani ometaba anaa nindaaya.

⁶²Ore hoo nibaba apa anaa osinyai le naiposha te nkumoi iakuku kuti; te nkaraki neitu ining'ining'i oltoilo lo Laitoriani Enkai inyi.

⁶³Naa ore apa anaa enikitonyorra Olaitoriani aitaas esidai nikintubul neijia eiko Olaitoriani eyau enkidaaroto o emutata shumata iyie; nikiwuang'ieki iyie teinakop nijing'ita alo aya.

⁶⁴Neidapash intae Olaitoriani tiatua iloreren pooki ebaiki eluboto nabo e nkop ometabaiki enkae. Ore teine nilo aisiaai kulie aitin, oo nkeek o noo soito apa neitu aekata iyiolou neitu eyiolou loo papaai linyi.

⁶⁵Ore tiatua lelo oshon nimitum enkiyagata nimitum eneitasheyie inkejek inono, kake eikilo iyie aisho Olaitoriani teine oltau oikirikira o nkonyek naailiilaa o ltau olepori.

⁶⁶Neisiong'a e nkishui ino te dukuya iyie, ore dama o kewarie iaku ole batisho nimiata osiligi le nkishui, nemeidim aitadedeyie osiligi le nkishui ino.

⁶⁷Ore tadekenya nijo iyie, ‘Oi naaji tenaa teipa!’ Ore teipa nijo iyie, ‘Oi naaji tenaa tadekenya’ te nkaraki ina batisho naure oltau lino o nena baa naadol inkonyek inono.

⁶⁸Naa eikirrinyu iyie Olaitoriani too melin ayau Misiri, elototo naisiligishoreki nchere mingil aekata alo. Ore teine ninyoraa aaishooyo ate meinyang'ai intae ilmang'ati linyi anaa rrindiki, lewa o ng'oruo, kake meetae oltung'ani oinyang'u intae.”