Read Maasai Bible – Biblia Sinyati Enkigilata oo Nkitanapat 33 Bible Online

Enkigilata oo Nkitanapat 33 - Maasai Bible – Biblia Sinyati bible

Enkigilata oo Nkitanapat 33

¹Ena ninye ina mayianata apa e Musa ilo tung'ani le Nkai natamayiana inkera oo Siraeli eton eitu eye.

²Nejo ninye, “Eewuo Olaitoriani eing'uaa Sinai, neilepie iyiook anaa enkolong te Seir, newang'u to ldoinyo le Paran, nelotu ninye eing'uaa nkalifuni iip tomon oo sinyat, eeta enkima nayupuyup te nkaina enye.

³Ee kenyor ninye iltung'ana lenyena ore apa lelo pooki ooiteng'elakaki ninye netii atua enkaina enye; nesujaa ninche orrekie lenye, neng'amu eutaroto te iyie.

⁴Ore apa pee eitanap iyiook Musa enkitanapata, metaa enjung'ore to lturrur le Yakobo.

⁵Neaku Olaitoriani olaiguanani le Yoshurun, ina kata apa pee etumo ilkituaak loo ltung'ana iloshon pooki le Israel tenebo.

⁶Nejo Musa ena tialo olosho le Ruben: ‘Nchoo Ruben eton eishu, mincho eye, nimincho iltung'ana lenyena eaku kuti.’”

⁷Nejo ninye ena tialo Yuda, “Toning'o Olaitoriani, oltoilo le Yuda, niyau ninye aitijing'u enetii iltung'ana lenyena, tomitu iyie too nkaik inono, niaku eretoto too lmang'ati lenyena.”

⁸Ore too le Lawi nejo, “Nchoo Lawi Tumimu ino nincho Urimu ino ilo osinya ilo apa litetema te Masa ninchankarrare ninye too nkariak e Meriba;

⁹ilo apa otejo tialo menye o ng'otonye ‘Mashilaa nanu ninche’; eiturrayie ninye ilalashera lenyena, nepalaa inkera enyena, amu eibung'a ninche ororei lino neibung olning'o lino.

¹⁰Keiteng'en ninche Yakobo nkiguanat inono; neiteng'en Israel inkitanapat inono kepik ninche enkorropil dukuya iyie o lasar opejori enchumata olperere lino lo lasar.

¹¹Olaitoriani, tamayiana imasaa enyena, ning'amaa esiaai oo nkaik enyena; tarrarra mpolosi oo lmang'ati lenyena, e lelo ooiba ninye, pee meigil aadumunye.”

¹²Ore te Benchamen nejo ninye, “Olkirotet lo Laitoriani keton ninye te seriani te ninye; Keimulumul ninye endama pooki, neitaa ninye erishata oo ronyi lenyena emanyisho enye.”

¹³Ore tialo Yosef nejo ninye, “Metamayiana Olaitoriani enkop enye, too ntokitin enyena supati e shumata, o too naatii ineegut olodo le nkop,

¹⁴too lng'anayio sidain le nkolong o te nena kumok oo lapaitin,

¹⁵o te nena sidain naaimu lelo doinyo o ina borei naing'uaa nena doinyo musan oo ntarasi

¹⁶tenebo nena kishoorot sidain enkop o enkiputakinoto enye, o enyorrata eilo apa otii osanag, meetu kuna shumata e ndukuya e Yosef o enerang'irang te lukunya eilo ora olkitok tiatua ilalashera lenyena.

¹⁷Ore oloing'oni lenye kikau neeta engolon, ore mowuarak enyena naa imowuarak o larro, naa ninche errumorie iloreren, nerrumoo pooki omeitabaiki ineeiting'ie enkop; ore lelo naa lelo oora nkalifuni iip tomon le Efraim, ore kulo naa lelo oora nkalifuni le Manase.”

¹⁸Ore tialo Sebulon nejo ninye, “Ting'idayu iyie Sebulon, te nimpang auluo, ning'idayu Isaakar tiatua ilng'oborri linono.

¹⁹Keipotu ninche iloreren meetu ilo doinyo lenye; ore teine neitayu ilasarri lenye; sidain amu keaku ninche enkarsisisho oo naaiposha, o nena masaa naaisudoro o sinyai.”

²⁰Ore tialo Gad nejo ninye, “Metamayiana Enkai ilo oitalala Gad! Etiu Gad anaa olng'atuny, kepolos ninye enkaina, o enerang'irang te ndukuya.

²¹Etegelaka ninye kewan ewueji neisul te nkop, amu teine apa eiteng'elaki erubata oloitoreisho; nelo ninye enetii ilkituaak loo ltung'ana, nedung'oki Israel enkiguana, o nena kiguanat naasipa o Laitoriani.”

²²Ore tialo Dan nejo ninye, “Ore Dan naa enkerai o lng'atuny, ina naipidito te Bashan.”

²³Ore tialo Naftali nejo ninye “Oo Naftali, kindipakinote ntokitin supati, nikimputa esupatisho o Laitoriani iwa enaiposha o kopikop.”

²⁴Ore tialo Asheri nejo ninye, “Metamayiani aaitulus too layiok, nchoo ninye etum omom too lalashera lenyena, naa nchoo eitadoiki enkeju enye eilata.

²⁵Metaa nchomito inono ine sekenkei neponari engolon ino anaa nkolong'i inono.”

²⁶“Meetae likae onyaanyukie Enkai, iyie, Yeshurun, ilo olo te keper pee kilotu aret, neimu nkatampo te nkitoo enye.

²⁷Ina Ai oo ntarasi ninye emanyisho ino ore abori iyie netii nkaik oo ntarasi naa kerewaa ninye olmang'atinta te dukuya iyie, nejo, Ndaikie.

²⁸Neaku etobiko apa Israel te seriani, te nchorro e Yakobo ake, teinakop e ntapa o enaisho oo sabibu ee, shumata enye naitadou enkoileelio.

²⁹Imayiana iyie Israel, Oo Israel! Kaing'ae likinyaanyukie, olorere oitajeu Olaitoriani, ina long'o e retoto inyi, o lalem le nkisulata inyi! Kepuonu ilmang'ati linyi aasai intae naa ipuopuo intae aaituny iwuejitin enye e shumata.”