Read Maasai Bible – Biblia Sinyati Enkigilata oo Nkitanapat 7 Bible Online

Enkigilata oo Nkitanapat 7 - Maasai Bible – Biblia Sinyati bible

Enkigilata oo Nkitanapat 7

¹“Teneyau kenya intae Olaitoriani Enkai inyi atua ina kop nijing'itata aapuo aaya, neiwuang'ie ninye lelo oreren ootii dukuya intae, Ilhiti o Ilgashi o Ilamori o Ilkanaani o Ilperesi o Ilhafi o Lyebusi, lelo oshon pokira oopishana kituaak naa magil aalang intae,

²naa teneishoru ninche Olaitoriani apik inkaik inyi, nimirimiri intae ninche, nitumutumu taa aaidaikie ninche katukul; emipuo ake aaitobir olning'o o ninche, nimintodolulu olng'ur te ninche.

³Nimiyamama intae o ninche aaisho intoyie inyi ilayiok lenye aashu aayamaki intoyie enye ilayiok linyi.

⁴Amu keidim ninche aaibelekenya ilayiok linyi maaitoki aairukurukore nanu, pee eisiaai kulie aitin enye; netum engoro o Laitoriani ayupuyupo tialo intae, naa keidim ninye aidaikie intae nabo kata.

⁵Kake nji intae entaasa ninche: enchom entigil ilpereren lenye loo lasarri nintaa ing'apeta enye mbelibelat, nitururu aadotu ina kitanyaanyukoto enye e nkai naji Asherim aapejoo te nkima nena kitanyaanyukot enye oo nkaitin naaguetuno.

⁶“Amu irara intae olorere oitisinyakaki Olaitoriani Enkai inyi; etegelua intae Olaitoriani Enkai inyi pee iakuku olorere lenye makewan, negelu intae tiatua lelo oreren pooki ootii oriong enkop.

⁷Mme apa te nkaraki nirara intae kumok aalang ilkulikae tung'ana pee etipika Olaitoriani enyorrata enye shumata intae negelu intae, amu intae apa ilkuti aalang iloreren pooki;

⁸kake te nkaraki nanyor intae Olaitoriani; neibung'ita ninye ilo mumai apa oinosie loo papaai linyi, ina pee eyaua intae Olaitoriani aipang'unye te nkaina magilani, nekordu intae Olaitoriani aitupuku te nkop e sinkaisho, aitung'uaa enkaina e Farao ilo aiguanani le Misiri.

⁹Tayiolo naa nchere, Olaitoriani Enkai ino ninye Enkai, ina Ai naisiligayu naibung olning'o o enyorrata nauno te lelo oonyor ninye neibung inkitanapat enyena, ometabaiki iishoritin enkalifu,

¹⁰neitalaku te lelo ooiba ninye, eidaikie ninche; meshololo te lelo ooiba ninye, keitalaku te ninye teine ake.

¹¹Eng'ura naa pee iasiasa ina kitanapata, o nena kikoot o nkiguanat naitanapa nanu intae ena olong.

¹²“Ore te nkaraki nitoning'o intae kuna kiguanat, nimbung'ubung'u niasiasa ninche, keibung Olaitoriani Enkai inyi tenebo intae ilo ning'o o ina nyorrata nauno apa nainosie olmumai too loo papaai linyi nchere keibung.

¹³Kenyorru ninye intae, nemayian intae, nepon intae, kemayian sii lelo ng'anayio lo sesen lino o lelo ng'anayio le nkop ino, enkurma ino o enaisho oo sabibu ino o eilata ino, nepon inkishu inono o ntare inono teinakop apa nainosie olmumai too loo papaai linyi pee eisho intae.

¹⁴Kemayian intae aaitulus too loreren pooki; meitokini aata olee aashu eng'oruoi olupi tiatua intae, aashu tiatua nchoo inyi.

¹⁵Naa kelo Olaitoriani aiwuang'ie tiatua intae emuoyian pooki nemeetae hoo nabo te nena muoyiaritin torrok e Misiri niyiololo, nalotu shumata intae kake keiteleiki ninye shumata lelo pooki ooiba intae.

¹⁶Naa ipuopuo intae aaidaikie lelo oreren pooki ooisho intae Olaitoriani Enkai inyi, melo hoo enkong'u inyi aing'urrie ninche, nimilo iyie aisiaai inkaitin enye, amu kelo ina aaku orreshet te intae.

¹⁷“Tenijo iyie to ltau lino, ‘Eikituaak kulo oshon aalang iyiook, kaji nanu aiko tenaiwuang'ie ninche?’

¹⁸Milo iyie aureyu ninche, kake shomo tadamu ina apa naitaasa Olaitoriani Enkai ino Farao o Misiri pooki,

¹⁹nena baa sapuki nitoduaa iyie too nkonyek inono, nena kitoduaat o nena enking'asia, ina aina magilani, o ina aina naitoriori naa ninye kintupukunye Olaitoriani Enkai ino; naa neijia elo Olaitoriani Enkai ino aiko te lelo oreren pooki liure.

²⁰Keirriu sii Olaitoriani Enkai inyi olmeitai atua ninche, ometaba anaa ore ninye lelo ooleku eisudori eure intae neidaaya.

²¹Mimputukuny te nkaraki ninche; amu ketii Olaitoriani Enkai inyi empolos inyi, ina Ai kitok naitureisho.

²²Keiwuang'ie Olaitoriani Enkai inyi kulo oshon te dukuya iyie aa kutiti; mindaikie iyie ninche pooki nabo kata, pee mikirasaki ake ing'uesi e ntim.

²³Kake eikintarasaki iyie Olaitoriani Enkai ino ninche, nepik ninche olmilo o metaba anaa neidaaya.

²⁴Neishoru ninye ilaiguanak lenye apik inkaik inyi, nimisie iyie enkarna enye aiwuang'ie te nkop. Meetae hoo oltung'ani obo likindim ashomo aipirakinore, o metaba anaa nindaikie ninche.

²⁵Ore nena kitanyaanyukot enye naaguetuno oo nkaitin enye shomo tapejoi te nkima. Ming'uar ina osholai anaa ina saabu napetokino ninche, nimiyaya intae maate, mijing'ijing'i ake orreshet; amu oldeket ina to Laitoriani Enkai inyi.

²⁶Nimiyauu inkajijik inyi ina toki nara olminong, miakuku ake oldeket anaa ninye, mbai tukul nilam amu entoki nadiaa.