Read Maasai Bible – Biblia Sinyati Yohana 1 Bible Online

Yohana 1 - Maasai Bible – Biblia Sinyati bible

Yohana 1

¹Ore te nkiterunoto netii apa Ororei, netii ilo Rorei te nebo Enkai, naa Enkai ilo Rorei.

²Netii ilo Rorei te nkiterunoto te nebo Enkai.

³Etaa pooki toki te ninye, nemeetae hoo toki te nena nataa, naitaaki metii ninye.

⁴Atua ninye etii enkishui, ore ena kishui naa ewang'an oo ltung'ana.

⁵Newang'u ewang'an tiatua enaimin nemeidimu enaimin ninye.

⁶Etii apa oltung'ani oirriwuaki oing'uaa enetii Enkai; oji enkarna enye Yohana.

⁷Neewuo ele te nkaraki shakenisho, pee eishakenoo ina wang'an, pee etum pooki aairuko te ninye.

⁸Neme ina wang'an ninye, kake eewuo pee eishakenoo ina wang'an.

⁹Ewang'an nadede naitawang pooki tung'ani, nalotu enkop.

¹⁰Netii Ororei enkop, naa te ninye eitobira Enkai enkop, neitu eyiolou enkop ninye.

¹¹Neewuo enetii ilenyena, neitu eng'amu ltung'ana lenyena ninye.

¹²Kake ore lelo pooki ootang'amutua ninye, lelo ooiruko enkarna enye, neishoo engolon naakunye nkera e Nkai,

¹³ilo otoiwuoki neme to sarge neme te yieunoto o sesen aashu te yieunoto o lee, kake ene Nkai.

¹⁴Neaku Ororei osesen neton tiatua iyiook, nikitoduaa enkitoo enye, naa enkitoo o Inoti Obo le Papa, obore empiris o esipata.

¹⁵Neishakenoo Yohana ninye nebuak ajo, “Ele taa atolimuo ajo, ‘Ore ololotu te siadi nanu ninye olkitok te nanu, amu etii apa ninye te dukuya nanu.’ ”

¹⁶Ore te mborei e supatisho enye, kitang'amutua pooki, empiris kitok oleng.

¹⁷Amu te Musa eishoruaki Nkitanapat; nelotu empiris o esipata te Yesu Kristo.

¹⁸Meetae oltung'ani ai kata otoduaa Enkai; kake ilo inoti obo laa Enkai, otii olgoo le Papa, oibalunye ninye.

¹⁹Naa ena shakenisho e Yohana pee eirriwaki Lyahudi lapolosak o Lawi ooing'uaa Yerusalem pee epuo aaikilikuan ninye aajoki, “Ira iyie ng'ae?”

²⁰Neibalunye, neitu emiki, neibalunye ajo, “Mara nanu Kristo.”

²¹Neikilikuan aajoki, “Ira Eliya?” Nejoki, “Mara.” Nejoki, “Ira ilo oiboni?” Newaliki ajoki, “A'a,”

²²Nejokini, “Ira ng'ae, pee kitum ewalata nikiyaki lelo ooirriutua iyiook? Aijo iyie aa te nkaraki enkorrok ino?”

²³Nejo, “Ara oltoilo lo lobuaku ti ong'ata, ‘Entorioi enkoitoi o Laitoriani,’ Anaa enatejo oloiboni Isaya.”

²⁴Ore lelo ooirriwakaki Yohana naa Ilfarisayo eing'uaa.

²⁵Neikilikuan ninche ninye aajoki, “Kainyoo naa pee imbatisisho iyie, ti nimira ilo Kristo, aashu Eliya aashu ilo oiboni?”

²⁶Newaliki Yohana ajoki ninche, “Te nkare aibatisisho nanu. Eitashe tiatua intae Obo limiyiololo,

²⁷laa ninye ilo olotu te siadi nanu, lemaaishiakino nalak nkeenta o namuka enyena.”

²⁸Etaasate kuna baa te Betania te lido kekun le Yordan, teine apa neibatisishore Yohana.

²⁹Ore te nkolong nasujita ina nedol Yohana Yesu elotu enetii, nejo, “Ing'ura, olkuoo le ker le Nkai oya eng'oki e nkop.

³⁰Ele taa atolimuo ajo, ‘Ore te siadi nanu kelotu oltung'ani kitok te nanu, amu etii ninye te dukuya nanu.’

³¹Neitu ayiolou nanu ninye, kake te nkaraki ena pee aeuo nanu aibatisisho te nkare, pee etumi aataboloki ninye Siraeli.”

³²Neishakenoki Yohana ejo, “Atoduaa Enkiyang'et edou anaa enturkuluo eing'uaa keper netonie shumata ninye.

³³Neitu ayiolou nanu ninye, kake ilo laairriwua maibatishisho te nkare, ninye laatiaaka nanu, ‘Ore olidol edoiki Enkiyang'et netonie, ninye oibatisisho te Nkiyang'et Sinyati.’

³⁴Natoduaa nanu naishakenoko nchere Enkerai e Nkai ele.”

³⁵Neitoki te nkolong nasujita ina, neitashe Yohana o lkipaareta aare lenyena;

³⁶neing'or Yohana Yesu eloito nejo, “Ing'ura olkuoo le ker le Nkai!”

³⁷Nening lelo ooiteng'eni lenyena aare nesuj ninche Yesu.

³⁸Neibelekenya Yesu, nedol esujita nejoki, “Kainyoo ing'oruru?” Nejoki ninche ninye, “Rabi, (aa nchere olaiteng'enani), kaji nikimanya?”

³⁹Nejoki ninche, “Wootu entodol.” Nepuonu nedol enemanya; nebik o ninye ina olong. Netaa keaku saa tomon ina kata.

⁴⁰Ore obo le lelo oaare ootoning'o Yohana eiro, nesuj ninye, naa Andrea, olalashe le Simon Petero.

⁴¹Olalashe lenye Simon etang'asa atum nejoki ninye, “Kinoto Mesia,” laa ninye eji Kristo.

⁴²Neriku Simon arikoki Yesu. Neing'or Yesu nejoki, “Ira iyie Simon, enkerai e Yohana, naa aikiji Kefa.” Aa nchere keji Petero aashu Osoit.

⁴³Ore te nkolong nasujita ina, nelo Yesu Galilaya, netum Filipo. Nejoki Yesu ninye, “Tusujaki.”

⁴⁴Ore apa Filipo naa Betsaida eing'uaa, enkanasa oo Andrea o Petero.

⁴⁵Netum Filipo Natanael nejoki, “Kinoto olapa otisira Musa tiatua nkitanapat nesir too loibonok, le Nkai Yesu le Nasaret olayioni le Yosef.”

⁴⁶Nejoki Natanael, “Keidim atupukunye Nasaret entoki sidai?” Nejoki Filipo, “Wou toduaa.”

⁴⁷Nedolu Yesu Natanael elotu enetii, nelimu ninye ajo, “Ing'ura Osiraeli odede lemeeta eleyiata.”

⁴⁸Nejoki Natanael Yesu, “Ai ti aji kitayiolo?” Newaliki Yesu ajoki, “Aatoduaa eton eitu kimpot Filipo, itii entonata o lng'aboli.”

⁴⁹Newaliki Natanael ajoki, “Rabi, ira iyie Enkerai e Nkai, Iyie Olaiguanani loo Siraeli.”

⁵⁰Newaliki Yesu ajoki, “Te nkaraki naatiaaka aatoduaa te ntonata o lng'aboli pee iruko? Iyooki adol imbaa kituaak naalang kuna.”

⁵¹Nejoki ninye, “Esipa, esipa, ajoki intae, aidolidolo keper etabole neilep nedou ilmalaika le Nkai aadoiki Enkerai e Tung'ani.”