Read Maasai Bible – Biblia Sinyati Yohana 11 Bible Online

Yohana 11 - Maasai Bible – Biblia Sinyati bible

Yohana 11

¹Etii apa oltung'ani obo omuoi, oji Lasaro le Betania, le nkang oo Mariamu enkanashe Marisa.

²Enapa Mariamu naelie Olaitoriani eilata narropil nejut nkejek too lpapit lenyena, ninye emuoi olalashe lenye Lasaro.

³Neirriwaki taa nkanashera Lasaro Yesu olkilikuai nejoki, “Lo Kitok, kemuoi oloshi linyor.”

⁴Ore pee ening Yesu ina nejo, “Mme ene keeya ena muoyian, kake ene nkitoo e Nkai, paa ore teina neitaae kitok Enkerai e Nkai.”

⁵Kenyor apa Yesu Marisa o enkanashe o Lasaro.

⁶Ore pee ening inchere kemuoi Lasaro, nebik nkolong'i are teine netii;

⁷ore pee eidipayu nena, nejoki ninye lkipaareta lenyena, “Enyoito manyaai Yudea.”

⁸Nejoki lkipaareta lenyena, “Rabi king'oru det Ilyahudi aar too soito; nintoki ake aito ine?”

⁹Newaliki Yesu ajoki, “Ai mera saai e ndama tomon o are? Ore te nelo oltung'ani dama nemerrorro, amu kedol ewang'an ena kop.

¹⁰Kake te nelo oltung'ani kewarie nerrorro amu metii ewang'an atua ninye.”

¹¹Ore pee eidip Yesu atejo kuna baa, neitoki ajoki ninche, “Eirure olchore lang Lasaro; kake kalo pee alo ainyeyie ninye.”

¹²Nejoki lkipaareta lenyena, “Lo Kitok, te naa keirure ninye, keishiu.”

¹³Naa ore enaimaka Yesu naa keeya enye. Kake nejo ninche enkirura oo njio eimaka.

¹⁴Neliki taa Yesu ninche aibalakinye nejoki, “Etua Lasaro,

¹⁵nang'ida nanu te nkaraki intae inchere matii ine, pee itumutumu aairuko. Kake enyoito emaape enetii ninye.”

¹⁶Nejoki Tomas oji Olmaoi lkulikae ooiteng'eni, “Emaape sii yiook pee kiye te nebo ninye.”

¹⁷Ore pee elotu Yesu nenyorriki etobiko Lasaro te nkurare nkolong'i ong'uan.

¹⁸Naa ketaaniki Betania Yerusalem, ewueji naa keidim ataa nkilomitani uni.

¹⁹Neetuo ltung'ana kumok loo Lyahudi enetii Marisa o Mariamu aaitigir te nkaraki ilo alashe lenye.

²⁰Ore pee ening Marisa nchere kelotu Yesu nelo anang'are; kake etotona Mariamu ti aji.

²¹Nejoki taa Marisa Yesu, “Lo Kitok, te naa itii apa ene anaata eitu eye olalashe lai.

²²Kake ore sii o taata, kayiolo ajo ore embae pooki niomonu te Nkai, aikincho iyie.”

²³Nejoki Yesu ninye, “Kepiu olalashe lino aitoki.”

²⁴Nejoki Marisa, “Kayiolo ajo keitoki apiu te mpiunoto e nkiting'oto.”

²⁵Nejoki Yesu ninye, “Kara nanu empiunoto nara enkishui. Ore ilo laairuk nanu ore ninye te neye keitoki ake aishu;

²⁶ore pooki oishu laairuk nanu nemeye ntarasi. Iruko iyie kuna?”

²⁷Nejoki, “Ee Olaitoriani, airuko nchere ira Kristo, Enkerai e Nkai nalotu enkop.”

²⁸Ore pee eidip Marisa atejo nejia, nelo arojaa enkanashe enye Mariamu, arik enkilepata nejoki, “Eewuo Olaiteng'enani, nikimpotito.”

²⁹Ore pee ening Mariamu ina neinyototo asioki nelo enetii.

³⁰Neton eitu ejing Yesu ina ang kake eton etii enaduoo wueji netii pee enang'are Marisa.

³¹Ore Ilyahudi ootii aji te nebo ninye aaitigir, pee edol Mariamu einyototo asioki neipang, nesuj ejo, “Enkurare elo aishir teine.”

³²Ore pee elotu Mariamu enetii Yesu nedol nebatata too nkejek enyena nejoki, “Lo Kitok, te naa itii apa ene anaata eitu eye olalashe lai.”

³³Ore pee edol Yesu ninye eishir, neishir sii Lyahudi ooiriamunore, nenyamalu to ltau lenye netum osina,

³⁴nejo, “Ai ti aji irragie?” Nejoki ninche, “Lo Kitok, wou toduaa.”

³⁵Neishir Yesu.

³⁶Nejo taa Lyahudi, “Eng'ura eneba enyorrata nanyor ninye!”

³⁷Kake etejo kulikae lenye, “Ai meidim apa ninye, olotabolo nkonyek o lapa tung'ani modooni ataasa ai pee meye ele tung'ani?”

³⁸Neitoki Yesu aisinanuo, nebaiki enkurare. Enkapune ina kurare, neigarakino to osoit.

³⁹Nejo Yesu, “Ewuang'ie osoit.” Ore Marisa, enkanashe ilo otua, nejoki ninye, “Lo Kitok, etong'ua taata, amu nkolong'i ong'uan anaa neye.”

⁴⁰Nejoki Yesu ninye, “Keitu duoo aajoki ti niruk iyie nidol enkitoo e Nkai?”

⁴¹Neaku, eiwuang'ie ninche osoit te nkurare; nedumu Yesu nkonyek aing'or shumata nejo, “Papa aaisho enashe amu kitoning'o.

⁴²Nayiolo nanu makewan ajo kining oshi ake; kake te nkaraki ele orere laamanita pee atejo nji, pee etum aairuko nchere iyie likirriwua.”

⁴³Ore pee eidip atejo nejia, nebuak ninye to ltoilo sapuk ajo, “Lasaro tupuku boo.”

⁴⁴Nepuku ilo apa otua, neena nkaik o nkejek too nkarash naanukarieki ltung'ana; neena enkomom enye te nkarasha. Nejoki Yesu ninche, “Entalak ninchosho ninye meshomo.”

⁴⁵Ore lkumok loo Lyahudi, ooetuo tenebo Mariamu, pee edol kuna baa naataasa Yesu, neiruk ninye,

⁴⁶kake eshomo kulikae enetii Lfarisayo neliki enataasa Yesu.

⁴⁷Neaku eipotutuo ilapolosak kituaak o Lfarisayo, entumo e Nkiguana nejo, “Kaa kiaas iyiook? Amu easita ele tung'ani ilmonek kumok.

⁴⁸Tinikipalaa iyiook ninye etiu nji, neiruk pooki ninye, neyooki Iroma aapuonu aaidaikie ene wueji ang sinyati neidaikie olorere lang.”

⁴⁹Ore Kaiafas, obo lenye, laa ninye Olapolosani Kitok te ilo ari nejoki ninche, “Miyiololo intae toki

⁵⁰nimidamishosho aajo keikash te yiook te nenang oltung'ani obo olosho pee meidaaya olorere olulung'a.”

⁵¹Kake eitu ejo ninye nena te ngolon enye makewan; kake te nkaraki nara ninye Olapolosani Kitok te ilo ari nelimu ajo kenang Yesu ilo orere,

⁵²neme ilo orere ake kake keji sii pee eiturrurru nkera e Nkai pooki naaisardaka aitaa nabo.

⁵³Neaku ore ebaiki ina olong nemut enkiguana pee ear Yesu.

⁵⁴Ore te nkaraki ina neitu eitoki Yesu aibalie kewan aloolo tiatua Lyahudi, kake eshomo enkalo e nkop nanyikita ong'ata, nelo enkanasa naji Efraim, nebik teine te nebo lkipaareta lenyena.

⁵⁵Netinyikua Pasaka oo Lyahudi, neilep ilkumok aapuo Yerusalem eing'uaa ina kop eton eitu ebau Pasaka, pee epuo aaipok ate.

⁵⁶Neing'oru Yesu, ejokino maate eitashe te Nkaji e Enkai, “Aijojo aa? Eji melotu tukul ele sirua?”

⁵⁷Ore lapolosak kituaak o Lfarisayo neitanapisho paa tenetii oltung'ani oyiolo enetii, neitayiolo ninche, pee etum aaibung'a ninye.