Read Maasai Bible – Biblia Sinyati Yohana 12 Bible Online

Yohana 12 - Maasai Bible – Biblia Sinyati bible

Yohana 12

¹Ore eng'or inkolong'i ile pee ebau Pasaka, nelotu Yesu Betania, enetii Lasaro, ilo oitopiwuo Yesu aitung'uaa keeya.

²Neitobiraki ninche ninye endaa e teipa teine neisiaaisho Marisa; ore Lasaro naa obo le lelo ootonita aanya endaa te nebo o Yesu.

³Neitayu taa Mariamu oltoo le ilata narropil e nardo, nagol enkinyang'a, neyelie nkejek e Yesu, nejut nkejek too lpapit lenyena. Neiput enkaji erropili e ina ilata.

⁴Nejo Yudas Iskariot, obo loo lkipaareta lenyena, (ilo oyooki akaldaa)

⁵“Oo pee eitu emiri ena ilata narropil aainosie indinari[4] iip uni neishori laisinak.”

⁶Ore pee etejo nejia, mme te nkaraki naing'urrie laisinak, kake te nkaraki naa olapurroni, naa ore amu ninye apa onap olbene loo mpisai, neaku keya nena naapiki ine.

⁷Nejo Yesu, “Tapala; aaitobiraka ena te nkaraki enkolong enukaroto ai;

⁸amu ore laisinak iatata anaa ake te nebo intae, kake mikiaata nanu anaake.”

⁹Ore pee eyiolou esiamo kitok oo Lyahudi aajo etii ninye ine nepuonu kake mme te nkaraki Yesu ake, kake eetuo sii aadol Lasaro, oitopiwuo Yesu aitung'uaa keeya.

¹⁰Neiguanate lapolosak kituaak eyieu near sii Lasaro metua.

¹¹Amu ore te nkaraki ninye netoorori Ilyahudi kumok aairuk Yesu.

¹²Ore te nkolong natusujua, nening ina siamo kitok naewuo osirua nchere kelotu Yesu Yerusalem.

¹³Nedumu lng'osil loo ltuka nepuo aanang'are ninye. Nebuakita aajo, “Hosana! Emayiana ilo olotu te nkarna o Laitoriani. Laa Olaiguanani loo Siraeli!”

¹⁴Ore pee etum Yesu olkurrarru netonie; anaa enatisiraki aajo,

¹⁵“Miureisho, Yerusalem! Kelotu olaiguanani lino, ekedito olkurrarru le sikiria.”

¹⁶Neitu eyiolou lkipaareta lenyena kuna baa te dukuya, kake ore pee eidipi aaitaa Yesu kitok, nedamu ninche ina kata nchere etisiraki kuna baa te nkaraki ninye, naa kuna eitaasa ninche ninye.

¹⁷Ore ina siamo naboitare apa Yesu pee eipot Lasaro metung'uai enkurare aitopiu aitung'uaa ilootuata, neishakenoitie ina.

¹⁸Te nkaraki ina sii pee eshomo ina siamo aanang'are amu etoning'o aajo etaasa ele monekie.

¹⁹Nejokino Lfarisayo maate, “Idolitata taa aajo mitumutumu toki. Eng'ura ajo eirukurukore enkop pooki ninye.”

²⁰Naa Ilyunani kulikae ooetuo Yerusalem aaseremisho te ilo sirua.

²¹Nepuonu lelo enetii Filipo le Betsaida te Galilaya, neikilikuan ninye nejoki, “Lo Kitok, ekiiyieu nikidol Yesu.”

²²Nelotu Filipo neliki Andrea; nepuonu Andrea o Filipo neliki Yesu.

²³Newaliki Yesu ninche nejoki, “Etabawua esaa pee eitaae kitok Enkerai e Tung'ani.

²⁴Kesipa, kesipa, ajoki intae, te neitu edoiki enkantererai e nkano enkop neye, nebik aa ninye ake openy; kake te neye, neiu ilng'anayio kumok.

²⁵Ore olonyor enkishui enye neiminie, ore oloibayu enkishui enye te nkop nerrip tiatua enkishui nemeish.

²⁶Te naaisiaai oltung'ani nanu, inchoo aairukurukore, ore enatii nanu neaku ine etii sii olaisiaayiani lai. Ore pooki ng'ae laaisiaai, neyanyitu Papa ninye.”

²⁷“Aatanyamala oltau lai taata, paa kaa naa ajo? Kajo, ‘Papa intajeuoki te na saa?’ Kake te nkaraki ena bae e mion pee atabaikia ena saa.

²⁸Papa, intaa kitok enkarna ino.” Nelotu oltoilo oing'uaa Keper, “Kaitaa kitok, naa kaigil aitaa kitok.”

²⁹Ore ina siamo naitashe teine, nening nejo etadara. Nejo kulikae, “Olmalaika oirorie ninye.”

³⁰Newaliki Yesu nejo, “Mme te nkaraki nanu pee eewuo ele toilo, kake te nkaraki intae.

³¹Taata enkiguana e na kop; taata earari olaitoriani le na kop aaitung'uaa.

³²Te naailepieki nanu te nkop nayietu iltung'ana pooki enatii.”

³³Netejo ninye ena eutu ajo kaa keeya eye ninye.

³⁴Newaliki esiamo aajoki, “Kitoning'o too nkitanapat nchere kebik Kristo ntarasi; oo naa pee ijo iyie meeta nchere pee meilepieki Enkerai e Tung'ani. Ai ng'ae doi ena Kerai e Tung'ani?”

³⁵Nejoki Yesu ninche, “Enkiti kata eton etii ena wang'an atua intae. Enchom eton iatata ina wang'an, pee meidimu intae enaimin, ore ilo olo te naimin nemeyiolo enelo.

³⁶Ore eton iatata ewang'an, eruko ina wang'an, pee itumutumu aataa nkera e wang'an.” Ore pee ejo Yesu kuna baa nelo aisudori pee medol ninche.

³⁷Ore hoo netaasa Yesu ilmonek kumok te dukuya ninche eitu ake eiruk ninche ninye,

³⁸pee eitabari ororei lo loiboni le Nkai Isaya otejo, “Olaitoriani aing'ae oiruko elikioroto ang? Naa aing'ae etabolokoki engolon e Nkai?”

³⁹Ina pee etalaikinote ninche aairuko amu enyaaka sii Isaya ajo,

⁴⁰“Eitamodoo Enkai nkonyek enye, neitagol iltauja lenye, pee medol ake too nkonyek enye, neyiolou too ltauja lenye, neibelekenya, pee aishiunye.”

⁴¹Netejo Isaya kuna baa amu etoduaa enkitoo e Kristo nelimu mbaa enyena.

⁴²Kake ore etiu nejia, eiruko ilkumok loo lkituaak, kake ore te nkaraki Ilfarisayo, eitu eibalunye pee merishieki enkaji e ntumo;

⁴³amu etonyorra enkisisa oo ltung'ana aaitalang enkisisa e Nkai.

⁴⁴Nebuak Yesu ajo, “Ore olaairuk nanu mme nanu eiruk kake lido laairriwua eiruko.

⁴⁵Ore olaaing'or nanu netoduaa lido laairriwua.

⁴⁶Aewuo nanu pee aaku ewang'an e nkop paa ore pooki laairuk nanu nemeton tiatua enaimin.

⁴⁷Te nening oltung'ani irorei laainei nemeibung nemaiguanare nanu ninye, amu eitu alotu pee aiguanare enkop, kake pee aitajeu enkop.

⁴⁸Ore ilo laany nanu, nemeng'amu irorei laainei, neeta oloiguanare. Ilo rorei lairoro oiguanare ninye te nkolong e nkiting'oto;

⁴⁹amu eitu airo nanu makewan; kake Papa laairriwua, ninye openy laaishoo enkitanapata e nena najo o nena nalimu.

⁵⁰Nayiolo nanu nchere ore enkitanapata enye naa puaan oo ntarasi; metaa ore nena najo nanu, naa inaatiaaka Papa pee alimu.”