Read Maasai Bible – Biblia Sinyati Yohana 16 Bible Online

Yohana 16 - Maasai Bible – Biblia Sinyati bible

Yohana 16

¹“Atolikio intae kuna baa pooki pee merrorri intae.

²Kearaa intae aaipung'ie too nkajijik e ntumo: ee kelotu enkata naa kejo pooki ng'ae oar intae entuata ke Nkai eisiaita.

³Neitaas intae kuna baa amu eitu eyiolou Enkai aashu nanu.

⁴Kake atolikio intae kuna baa pee te nebau enkata enye, nidamumu ninche nchere atolikio intae. “Neitu aliki intae kuna te nkiterunoto, amu kaboitare apa intae.

⁵Kake kalo taata enetii ilo laairriwua, kake metii obo linyi laaikilikuan ajoki, ‘Kaji ilo?’

⁶Kake ore amu atolikio intae kuna baa, eiputa iltauja linyi osina.

⁷Kake esipata ena naliki intae, intae eret te nalo; amu te neitu alo nemelotu Olautaroni enitii; kake te nalo, nairriwaki intae ninye.

⁸Ore te nelotu ninye neitayiolo enkop enetii eng'oki o esipata o enkiguana;

⁹te mbae naipirta eng'oki amu maairuk nanu,

¹⁰too mbaa naaipirta esipata amu kalo enetii Papa nimikintokiki aadol;

¹¹nitapong'ori sii too mbaa naipirta enkiguana amu eidipaki aiguanare olkitok lena kop.

¹²“Eton aata mbaa kumok najoki intae, kake mindimaa taata;

¹³kake te nelotu ninye, ina Kiyang'et e sipata nerik intae atua esipata pooki, amu melotu airo anaa makewan, kake enaning pooki elimu, neliki intae imbaa naapuonu.

¹⁴Naa ninye laaitaa nanu kitok; amu inaainei eng'amu neitodol intae.

¹⁵Ore nena pooki naata Papa inaainei; ina pee atejo, inaainei; eng'amu neitodol intae.

¹⁶“Ore te nkiti kata nimikintokiki aadol, ore ake sii te nkiti kata nikintokiki aadol.”

¹⁷Nejokino, ematua oo lkipaareta, “Kalo rorei ele ojoki Yesu iyiook, ‘Enkiti kata, nimikintokiki aadol ore ake sii te nkiti kata nikintokiki aadol?’ Nejo naa, Te nkaraki naa kalo enetii Papa?

¹⁸Nejo, “Kalo rorei ele ojo, ena ‘kiti kata?’ Mikiyiolo iyiook enajoito.”

¹⁹Neyiolou Yesu ajo keyieu neikilikuanishore, nejoki ninche, “Kena doi iyieuu nikinkilikuanana natejo, ‘Keng'or enkiti kata pee mikintokiki aadol, ore ake sii te nkiti kata nikintokiki aadol’?

²⁰Kesipa, kesipa, ajoki intae, ainchirishiri niyietutu to sina, kake keng'ida enkop; keinosieki intae osina, kake keibelekenya osina linyi aaku eng'ida.

²¹Ore eisho enkitok neeta osina le mion sapuk amu etabawua enkata enye; kake ore pee eidip atoiu enkerai, meitoki adamu osina te nkaraki eng'ida to ltung'ani otoiwuoki te nkop.

²²Ore sii intae iatata taata osina, kake kaitoki ake adol intae, neng'ida iltauja linyi, nemetii oltung'ani ooru intae eng'ida inyi.

²³Ore teina olong mikinkilikuanana nanu ae toki. Kesipa, kesipa, ajoki intae, ti niomonunu toki te Papa, neisho intae te nkarna ai.

²⁴Ore o taata eton eitu iomonunu toki te nkarna ai; entoomonu, naa itumutumu, pee eboreyu eng'ida inyi.

²⁵“Airorie intae too nkitanyaanyukot te kuna baa. Kelotu enkata nemaitoki airorie intae too nkitanyaanyukot, kake kaibalakinye intae aliki imbaa e Papa.

²⁶Ore teina olong, niomonono te nkarna ai, nemajoki intae kaomonoki intae te Papa;

²⁷amu kenyor ninye Papa openy intae, amu kitonyorra intae nanu niruko nchere kaewuo aing'uaa Enkai.

²⁸Enetii Papa aing'uaa, nalotu enkop; naa kaitoki aing'uaa enkop alo enetii Papa.”

²⁹Nejoki lkipaareta lenyena, “Aha, iroro taata aibalie, neme te nkitanyaanyukoto iroro.

³⁰Kitayioloito taata aajo iyiolo iyie pooki toki, nimikinare nikinkilikuanishore oltung'ani; te na kiruko inchere iewuo iyie aing'uaa Enkai.”

³¹Newaliki Yesu ninche ajoki, “Iruko taata?

³²Kelotu enkata, neewuo taata, naisardakieki intae, nelo pooki tung'ani enkang enye, naaing'uari aa nanu ake; kake mme nanu ake, amu kaaboitare Papa.

³³Atolikio intae kuna baa pee iatata osotua tiatua nanu. Iatata osina tiatua ena kop, kake entagoluoto! Atimira nanu enkop!”