Read Maasai Bible – Biblia Sinyati Yohana 2 Bible Online

Yohana 2 - Maasai Bible – Biblia Sinyati bible

Yohana 2

¹Ore te nkolong e uni neetae apa enkiyama te Kana te Galilaya; netii ng'otonye Yesu ine.

²Neipotoki sii Yesu o lkipaareta lenyena teina kiyama.

³Ore pee eishunye enaisho oo sabibu nejoki ng'otonye Yesu, “Meetae enaisho o sabibu.”

⁴Nejoki Yesu, “Nakitok, kaa kiatayie neton eng'or enkata ai?”

⁵Nejoki ng'otonye laisiaayiak, “Entaas pooki najoki intae.”

⁶Netii ine iltooi ile loo soito, naa iloo mboreitin are aashu uni obo, netushumaki teine to lkerreti le nkitukuore oo Lyahudi.

⁷Nejoki Yesu lelo aisiaayiak, “Emputa iltooi enkare.” Neiput metabaiki nkutukie.

⁸Neitoki ajoki, “Entooku enkiti, eyaki olaitasheikinoni lele sirua.” Neyaki.

⁹Ore pee eishamisham olkitok le nkiyama enaduoo are naitaaki enaisho oo sabibu, nemeyiolo eneing'uaa, hoo neyiolo laduoo sinkan ootookokito enkare, neipot olkitok le nkiyama oloyamisho,

¹⁰nejoki, “Keng'as oshi ake pooki ng'ae aishoru enaisho oo sabibu sidai, ore etookishoteki, neishoru eneme sidai oleng; imboo iyie idia sidai o taata.”

¹¹Tiatua Kana te Galilaya etaasie Yesu ena naa enkiterunoto oo mbaa e nking'asia naitoduaaya enkitoo enye; neiruk lkipaareta lenyena.

¹²Ore etulusoyie ina nedoiyio aapuo Kapernaum, ninye o ng'otonye o lalashera o lkipaareta lenyena; nebik inkuti olong'i teine.

¹³Netinyikua apa osirua le Pasaka loo Lyahudi, neilep Yesu alo Yerusalem.

¹⁴Neinepu lamirak loo nkishu o loo nkerra oo loo nturkuluoni tiatua enkaji e Nkai, netoni ilaibelekenyak loo mpisai.

¹⁵Ore pee eitobir elishiei[1] oo nkopit, nearaa ntare o nkishu pooki aipangie te enkaji e Nkai, neisuaaya mpisai oo laibelekenyak, neibeleleng'oo misai enye.

¹⁶Nejoki lamirak loo nturkuluoni, “Ewaita kuna tokitin te ne emintaa enkaji e Papa enemirishoreki.”

¹⁷Nedamu lkipaareta lenyena enatisiraki nchere, “Kaanya olom le nkaji ino amut.”

¹⁸Newaliki Lyahudi aajoki, “Kainyoo enkitoduaata nintodol iyiook, oo pee ias kuna baa?”

¹⁹Newaliki Yesu ajoki, “Entarruoi enkaji e Nkai, ore too nkolong'i uni naitasheyie.”

²⁰Nejoki taa Ilyahudi, “Artam o ile ilarin eshetitai ena aji e Nkai, eji nijo iyie intasheyie too nkolong'i uni?”

²¹Kake enkaji e Nkai a ilo sesen lenye eimaka ninye.

²²Ore pee eitopiuni too lootuata nedamu lkipaareta lenyena inchere etiaaka nejia, neiruk ilkigerot, o rorei oiroro Yesu.

²³Ore etii ninye Yesu Yerusalem, to sirua le Pasaka, neiruk ilkumok enkarna enye etoduaa inenking'asia naasita.

²⁴Kake eitu eiruk Yesu aisho makewan ninche, amu keyiolo ltung'ana pooki,

²⁵nemeetayie tipat shakenisho te tung'ani amu keyiolo openy naatii atua tung'ani.