Read Maasai Bible – Biblia Sinyati Yohana 20 Bible Online

Yohana 20 - Maasai Bible – Biblia Sinyati bible

Yohana 20

¹Ore enasirie te nkolong e dukuya e wiki, eton emisimis nelotu Mariamu Magdalena enkurare nedol ajo eiwuang'ieki osoit te nkurare.

²Nekuet alo enetii Simon Petero o enetii olikae oiteng'eni apa onyor Yesu, nejoki ninche, “Eitayutuo Olaitoriani te nkurare, nimikiyiolo enetipika ninye.”

³Nepuku Petero o ilo likae oiteng'eni aapuo enkurare.

⁴Nekuet aairiamari pokira aare; kake neing'ataa ilo likae oiteng'eni Petero nemurutoki enkurare.

⁵Neirrugo arum nedol inkarash e kitani naapuyiapui eirrag teine, kake eitu ejing atua.

⁶Nelotu sii ninye Simon Petero, esujita, nejing atua enkurare; nedol nena arash e kitani naapuyiapui teine, kake eitu ejing atua,

⁷o ina anka natii apa endukuya enye. Nemeboitare inkarash e kitani naapuyiapui, kake keirina ti ai wueji openy alamita.

⁸Nejing taa sii ninye ilo likae oiteng'eni otumurutoko olikae enkurare, atua nedol neiruk;

⁹amu eton apa eitu eyiolou olkigeroto ajo meeta nchere pee mepiu aing'uaa lootuata.

¹⁰Neitoki lelo ooiteng'eni aapuo nkang'itie enye.

¹¹Kake eitasho Mariamu te nkutuk e nkurare, eishirita. Ore eishirita neirrugo arum enkurare,

¹²nedol ilmalaika oaare ooishopito nkilani naaibor, neton obo te nkalo e ndukuya ore olikae neton te nkalo oo nkejek e ine duo neirragie osesen le Yesu.

¹³Nejoki ninche ninye, “Na kitok, kainyoo pee inchirita?” Nejoki ninche, “Amu ewaita ninche Olaitoriani lai, nemayiolo nanu eneshomo aapik ninye.”

¹⁴Ore pee ejo nejia, neibelekenya nedol Yesu eitashe, neitu eyiolou ajo Yesu.

¹⁵Nejoki Yesu ninye, “Na kitok, kainyoo pee nchirita? Ai ng'ae ing'oru?” Ore amu kejo kolaturoni le nkurma nejoki, “Lo Kitok, te naa iyie owa ninye, tolikioki enishomo apik ninye, pee alotu aya.”

¹⁶Nejoki Yesu, “Mariamu!” Neibelekenya nejoki te nkutuk oo Lbrania, “Rabboni!” Eji Olaiteng'enani.

¹⁷Nejoki Yesu ninye, “Mikimbung, amu eton eitu ailep alo enetii Papa, kake shomo enetii lalashera laainei tiaaki ninche, ‘Kailep alo enetii Papa lai laa Papa linyi, enetii Enkai ai naa Enkai inyi.’ ”

¹⁸Nelo Mariamu Magdalena aliki lelo ooiteng'eni ajoki, “Atoduaa Olaitoriani,” neliki nena baa naatiaakaki ninye.

¹⁹Ore ina olong teipa aa enkolong e dukuya e wiki, eikeno nkutukie e ina aji nasotore lelo ooiteng'eni te nkaraki naure Ilyahudi. Nelotu Yesu neitashe te mpolos, nejoki ninche, “Entaseriana.”

²⁰Ore pee eidip atejo neijia, neitodol ninche inkaik enyena o ematua enye. Neng'ida lelo ooiteng'eni pee edol Olaitoriani.

²¹Neitoki ake Yesu ajoki ninche, “Entaseriana. Ore anaa enairriwayie Papa, kairriwaa sii nanu intae.”

²²Ore pee eidip atejo nejia neyang'aki ninche nejoki, “Entang'amu Enkiyang'et Sinyati.

²³Tenipalakiki oltung'ani ing'ok nepalakini, tenimipalakiki oltung'ani ing'ok, nemepalakini.”

²⁴Ore Tomas otejoki Olmaoi, laa obo le lelo tomon o aare, nemetii te nebo ninche pee elotu Yesu.

²⁵Nejoki lelo kulikae ooiteng'eni, “Kitoduaa Olaitoriani.” Nejoki Tomas ninche, “Te neitu adol nanu inkiporo oo lmushumaani too nkaik enyena napik olkimojino lai ine wueji oo lmushumaani napik enkaina ai ematua enye, mairuk nanu katukul.”

²⁶Ore etulusoitie nkolong'i isiet neitoki aatii lelo ooiteng'eni atua aji, netii Tomas te nebo ninche. Nelotu Yesu eikeno nkutukie e ina aji, neitashe te mpolos nejo, “Entaseriana.”

²⁷Neitoki ajoki Tomas, “Tipika olkimojino lino ene, ing'ura inkaik aainei; nipik enkaina ino ene mbung'a ematua ai nimiaku olemeeta enkirukoto kake iruko.”

²⁸Newaliki Tomas ajoki, “Olaitoriani lai naa Enkai ai!”

²⁹Nejoki Yesu ninye, “Iruko iyie te nkaraki nikitoduaa nanu? Emayiani lelo leitu edol neiruko.”

³⁰Etaasa, Yesu kulikae monek kumok etii lelo oiteng'eni lenyana neitu esiri tena buku;

³¹kake etisiraki kuna pee itumutumu aairuko nchere ore Yesu ninye Kristo, Enkerai e Nkai, naa tenirukuruku, nitumutumu enkishui tiatua enkarna enye.